2 Samuel 8 - Biblia en Guaraní - ?anderuete ?e’? Por? 2015

David ombotuichave hetã rembe’y

1Ko’ã mba’e rire David ombopoguy Filisteayguakuérape, péicha ha’ekuéra ohundi pu’akaguasu oguerekova’ekue ambue tetãnguéra ári ha oipe’a pe tavaguasu Filistayguakuéra pógui.

2Ipu’aka rire avei Moabguakuéra rehe, omoñenouka ichupekuéra yvýpe. Upéi oha’ã umi oñenóvape peteĩ inimbópe imétroicha, ha umi ojohúva guive cáda mokõi inimbo pukukuépe, ojukapaite ha umi ojohúva cáda mbohapyha inimbo pukukuépe oheja oikove hag̃ua; ha ko’ã Moabgua hembýva oiko David rembiguái ramo ha opagava’erã impuésto Davidpe g̃uarã.

3David ipu’aka avei Hadadézer rehe, Rehob ra’y, Soba retã ruvicha, ha’e ohóvo oñemomba’e jevy hag̃ua hetã rehe, opytáva pe Éufrates ysyry rembe’ýpe.

4Ha David ogueru ijapytégui 1700 kavaju arigua, ha 20.000 kuimba’e yvy rupigua; ha David oikytĩukapa ñorãirõ cárro kavaju retyma rajygue ohejánte ohungauka’ỹre ichupe g̃uarã umi kavaju oikotevẽva 100 cárrope g̃uarãnte.

5Ha Damáscogui ou Siriayguakuéra oipytyvõ hag̃ua Hadad-ézer, Soba retã ruvichápe; David katu ojuka Siriayguakuéra apytégui 22.000 kuimba’épe.

6Upéi David omoĩ isoldádo aty Damáscope oñangareko hag̃ua Síria rehe, ha umi Siriaygua oiko David rembiguái ramo ha opagava’erã ichupe impuésto. Ha Ñanderuete ome’ẽ Davídpe ipu’aka ombopoguypa hag̃ua mamo ohoha rupi.

7Ha David ogueraha Jerusalénpe umi tete mo’ãha oroguiguáva Hadad-ézer rembiguaikuéra oiporuva’ekue.

8Upéicha avei Beta ha Berotaígui, Hadad-ézer tavakuéragui, David ojapyhy hetaiterei brónce.

9Upérõ Toi, Hamat retã ruvicha, ohendúvo David ipu’akapa hague Hadad-ézer soldádo aty rehe,

10Toi omondo ita’ýra Jorámpe, tetã ruvicha David rendápe, omomaitei hag̃ua ichupe py’aguapy reheve ha ohovasa hag̃ua ichupe, oñorãirõ haguére Hadad-ézer ndive ha ipu’aka haguére hese; Toi voi Hadad-ézer rehe ija’e’ỹva ha Joram ogueraha ipópe jopói ramo tembiporu pláta, óro ha bronceguiguáva.

11Ko’ã mba’e tetã ruvicha David omboyke Ñanderuetépe g̃uarã, omboyke haguéichama avei opaite ambue pláta ha óro umi tetã ombopoguyva’ekuégui:

12Siriayguágui, Moabguágui, Amonguágui, Filisteayguágui, Amalecguágui ha umi mba’e ojepe’ava’ekue Hada-ézer, Rehob ra’y, Soba retã ruvichágui.

13David réra oñemoherakãguasuve ohóvo ha’e ou jevývo Síria ñorãirõgui. Omosarambi avei Edomguakuérape, ojukávo 18.000 kuimba’épe ijapytégui pe juky vállepe.

14Ha omoĩ isoldádo aty oñangareko hag̃ua opaite Edom retã tuichakue rehe, ha upéicha Edomguakuéra oiko avei David rembiguái ramo. Ñanderuete ome’ẽgui Davídpe pu’aka ombopoguy hag̃ua mamo ohoha rupi.

David rembiguái ruvichakuéra

15Ha David oisãmbyhy opaite Israel tríbupe, ha ha’e oñangareko oĩ hag̃ua justícia ha ñembojovake hekoite peguáva Israel retãme.

16Joab, Sarvia memby, oiko isoldádo aty ruvichaguasu ramo ha Josafat, Ahilud ra’y, oiko ñorãirõ haihára ramo,

17Sadoc, Ahitub ra’y, ha Ahimélec, Abiatar ra’y, oiko pa’ikuéra ramo; Seraia kuatia haihára ramo;

18Benaiahu, Joiada ra’y, omoĩ Ceretgua ha Peletguakuéra ári, oñangarekovahína David rekovére; ha David ra’ykuéra oiko avei pa’ikuéra ramo.