1Péicha he’i Ñanderuete Amon ra’ykuéra rehe: Israel piko ndaita’yravéi. Naiñemoñarevéi piko oiko hag̃ua ijyvýpe. Mba’érehe piko ijára gua’u Milcom oipe’a ha oguereko imba’éva ramo Gad yvy ha hetãyguakuéra ou oiko hag̃ua itavakuérape.
2Upévare outahína pe ára, he’i pende Ruete, ahendukataha ñorãirõ sapukái Rabápe, Amon ñemoñarenguéra távape; ha itaperéta ha ojehapýta itavakuéra ha Israélpe oñeme’ẽ jevýta ijyvy, ha’ekuéra oipe’a reiva’ekue ichuguikuéra, he’i pende Ruete.
3Ejahe’o, nde Hesbon, oñembyaipámagui Hai; pesapukái, peẽ tavakuéra peiméva Raba jerekuévo ha peñemonde ao vosakuépe, pejahe’o ha pejere rei pe korapy ryepýpe, ojeguerahágui Milcomguakuéra jepokuapýpe, ipa’i ha imburuvichakuérape.
4Mba’érehe piko rejeroviaite umi mba’erepy rehe ha nde yvy porã rehe. Nde yvy porã oñembyaipáta, ha reñembovu rei erévo: Máva piko oúta ojeity hag̃ua cheári.
5Péina ápe Che aguerúta ndeári ñemondyiguasu, he’i pende Ruete, Yvága Atykuéra Jára, opaite nde jerekuévo oikóva guive; ha’ekuéra penemosarambipáta, ha avave nombyatymo’ãvéi umi okañyva’ekuépe.
6Ha ko’ã mba’e ko’ãva rire amboupa jevýta Amon ñemoñare ojeguerahava’ekue jepokuahápe, he’i pende Ruete.
Marandu Edom rehe7Péicha he’i Ñanderuete, Yvága Atykuéra Jára, Edom rehe: Ndaiporivéi piko arandu Temánpe. Opa piko arandu tekombo’e ha naiñaranduvéi piko hikuái.
8Peẽ Dedangua pekañy, pejevy pende rapykuere gotýo, peike umi yvykua ipypukuha rupi; katuete aguerúta Esau ñemoñarenguérape iñehundirã, Che pohaviraha árape.
9Ou ramo parral’a mono’õhára, nomohembýi hikuái mba’eve. Ha pyharekuépe ou ramo mondahakuéra ojapyhýta umi mba’e oipotáva guive.
10Che katu amboíta Esaúpe, Che ajuhúta ichupe okañy haguépe ha upéi nokañymo’ãvéima; ahundíta iñemoñarenguérape, ipehẽnguekuéra ha hogaykereguápe.
11Eheja tyre’ỹnguérape, Che amongakuaáta; ha umi kuña imenave’ỹva tojerovia cherehe.
12Péicha he’i pende Ruete: Pema’ẽ porãke, umi ndoy’uva’erãmo’ãiva pe vásogui, hoy’upáma; ha nde piko rejesalváta. Nde nderejesalvamo’ãi, katuete romboy’úta avei che vásogui.
13Chejehe añe’ẽme’ẽma, he’i pende Ruete, jehasa asy, ñemotĩ, tapere ha maldicion oikóta Bosra távape, ha ambue itavakuéra itaperepaitéta avei.
14Ahendu Ñanderuete marandu og̃uahẽha iñe’ẽ reruhára rupi tetãnguérape, he’ívo: Peñembyaty ha peju peñorãirõ hag̃ua.
15Pema’ẽ porãke, Che pomomichĩta tetãnguéra apytépe, ha’ekuéra oñembohory hag̃ua penderehe.
16Nde voi reñembotavy ndejupe reikógui cerrorusúpe ha reñemomba’égui umi cérro ru’ãre, nde voi reñembotuicha. Nde rejehaitypo ramojepe yvatete ku ñapykanícha, upégui Che roitýta, he’i pende Ruete.
17Edómgui oikóta tapere; ha opaite upérupi ohasáva guive oñemondýita, ha oñembohorýta nderehe ohechávo ko jehaviraguasu.
18Ku ojehu haguéicha Sodóma ha Gomórrape ha ambue táva ijypy pegua rehe, he’i Ñanderuete, upéicha avei avave ndoikomo’ãvéi ndepype, ha avave ndopytamo’ãvéi nde táva ryepýpe.
19Pema’ẽ porãke, ku leõicha osẽva Jordan ka’aguýgui ñu porãme, upéicha sapy’aitépe amosẽta avei Edómpe hetãgui, ha Che aiporavóma pe oikótava upépe, péva opytáta ijyvy jára ramo. Máva piko ikatúta oñembojoja cherehe. Ha mávapa ikatu oñemoĩ cherehe. Mamo piko oĩ tetã ruvicha ikatúva oñembo’y che renondépe.
20Upévagui, pehendu umi ñe’ẽ pende Ruete he’imava’ekue Edom rehe, ha umi mba’e Ha’e oguerekóva iñakãme katuete ojapóta avei Temanguakuéra rehe. Añetehápe ojegueraháta umi ovecha, imichĩvéva jepe, ha umi ñu oñemondyipáta ohechávo ko’ã mba’e.
21Edom ho’ávo, pe yvy oryrýita hyapukuégui, ha isapukái oñehendúta pe Yguasu Pytã meve (Mar Rójo).
22Pema’ẽ porãke, ku ñapykanícha ojupi yvate ojepoi hag̃ua hembi’urã rehe, upéicha ha’e ojeitýta avei Bosra rehe; ha upe ára upévape umi Edomgua ipy’aguasuvéva ojoguáta peteĩ kuña imembypotávape.
Marandu Damásco rehe23Damáscope g̃uarã ko ñe’ẽ kóva. Otĩetéta Hamat ha Arfad tavakuéra, ohendu haguére ko marandu ivaíva; ojepy’apyetereígui ipy’akangypáta, ojeígui ipy’aguapy.
24Damásco ipy’a kangypágui ojere okañy hag̃ua, oryryipa ha ojepy’apy, ojapyhy ichupe mba’asy, ku kuña imembypotávaicha.
25Mba’eichaitépa oheja hikuái pe táva oñemoherakuã porãva, upe táva chembopy’arorýva.
26Upe ára upévape imitãrusu ho’áta táva ryepýpe, ha opaite isoldadokuéra omanombáta he’i pende Ruete, Yvága Atykuéra Jára.
27Ha ajatapýta Damásco korapy jere yvate rehe, ha tata ombokusuguéta Ben-hadad rogaguasúpe.
Marandu Cedar ha Hazor rehe (Arábia rehe)28Cedar ha Hazor retã rehe ou ko ñe’ẽ kóva, umía Nabucodonosor, Babilónia retã ruvicha ombotapereva’ekue. Péicha he’i Ñanderuete: Pepu’ã ha pejeity Cedar ári, ha pehundi pe kuarahyresẽ gotyogua ra’ykuérape.
29Pemonda ichugui hóga rymba pirekueguigua, ijao sãingo, hymbakuéra ha opaite hembiporukuéra. Pejapyhy icamellokuéra pegueraha hag̃ua, ha sapukái kyhyjeguasu oĩva’erã opa rupiete.
30Peẽ Hazorgua pekañy, pya’éke tapeho, peike itakua pypukúpe, he’i Ñanderuete; Nabucodonosor, Babilónia retã ruvicha, ojepy’amongetáma ha he’i ipy’apýpe oñemoĩtaha penderehe.
31Néike, pepu’ã ha pejeity peteĩ tetã rehe oikóva py’aguapýpe ha kyhyje’ỹme, he’i Ñanderuete, nahokẽi ha naiñembotyhái, ha’eñoite oiko hikuái.
32Pemonda icamellokuéra ha hymba hetaitereívape; ha amosarambíta ko’ã Arabiayguápe pe yvytu oipejuha peve, ha oñemombóta ichupekuéra yvy rugua paha peve; ha opa gotýogui rei aguerúta ichupekuéra mba’evai, he’i pende Ruete.
33Hazórgui oikóta jagua saite raity ha itaperéta opaite árape g̃uarã; avave ndoikomo’ãvéi ipype, ha avave ndopytamo’ãi upépe.
Marandu Elam rehe34Sedequías, Juda retã ruvicha, oñepyrũvo oisãmbyhy, Ñanderuete he’i ko ñe’ẽ Jeremíaspe, Elam retã rehe:
35Péicha he’i pende Ruete, Yvága Atykuéra Jára: Péina ápe Che amopẽta Elam guyrapa, pévarupi ha’e oñembotuicháta.
36Umi irundy yvytu ára apýra guive aguerúta Elam retãme umi oñemoĩva hese, ha amosarambíta ichupekuéra ko’ã yvytu ko’ãva rupi ha opaite tetãnguérape, oĩva guive ko yvy ape ári.
37Ha Che amongyhyjéta ichupekuéra umi hese ija’e’ỹvagui ha ijukaháragui; ha aguerúta hi’ári mba’evai ha che pochy, he’i pende Ruete; ha amondóta hapykuéri che kyse puku ajukauka hag̃ua ichupekuéra.
38Ha amoĩta che guapyhaguasu Elámpe, ahundi hag̃ua hetã ruvichaguasu ha imburuvichakuérape, he’i pende Ruete.
39Ha ojehuva’erã ág̃a, pe ára pahávo, amboupa jevytaha umi Elamgua ojeguerahava’ekue jepokuapýpe, he’i pende Ruete.
Who We AreWhat We EelieveWhat We Do
2025 by iamachristian.org,Inc All rights reserved.
