1Nde, Títo, emyasãi pe tekombo’e hesãiva ha heko peguáva.
2Ehekombo’e umi kuimba’e tujakuérape tojejokokuaa, tohechauka hekove rupi okakuaamaha ijerovia ha hekopotĩme, ta’iñakãguapy, tojerovia hekópe, toporohayhu, ta’ipaciéncia.
3Ehekombo’e avei kuñakaraikuérape tahekopotĩ Hesu Crísto reheguateévaicha, anítei ijurumy’ỹi, anítei oka’u, toporohekombo’e mba’e iporãvare uvei.
4Umi kuña imitãvévape, tohayhu iména ha imembykuérape,
5ta’iñakãguapy ha’ekuéra, tahekopotĩ, toñangareko porã hóga ha hogayguakuéra rehe, toiko iména poguýpe, ani hag̃ua avave oñe’ẽvai Ñanderuete ñe’ẽ rehe.
6Ehekombo’e karia’ykuérape ojejokokuaa hag̃ua opaite mba’épe.
7Ha ndete voi ehechauka opaite mba’épe ne rembiapo iporãha. Eporombo’e mbo’epy hesãi porãva ha tekopotĩva rehe.
8Eiporu ñe’ẽ iporã ha ipotĩva, ani hag̃ua umi oñemoĩva nderehe ojohu peteĩ mba’e jepe nde rekovépe oñe’ẽvai hag̃ua ñanderehe, totĩ uvei.
9Ehekombo’e umi tembiguái reípe (esclávope) oiko hag̃ua ijára poguýpe opaite mba’épe, tombovy’a ichupe, ani hag̃ua oñemoĩ hese,
10ani omonda, toñangareko porã uvei ijára mba’ére, ani hag̃ua avave oñe’ẽvai Ñanderuete ñe’ẽporãite rehe, tahembiapo porã uvei, ombojegua hag̃ua Ñanderuete ñe’ẽporã tembiapo porãite rupi.
11Ñanderuete mborayhu ojehechaukáma voi osalva hag̃ua opavavépe.
12Imborayhu ñanerekombo’e japoi hag̃ua ñande rete rembipota vaígui ha avei ko yvyarigua rembipota vaígui, jaiko hag̃ua akãguapýpe, justíciape ha ñemomirĩme ko ára atyguasu kóvape.
13Ha ñaha’ãrõ hag̃ua Ñandejára ha Hesu Crísto ou jevy heko jajaipa reheve ñandesalva hag̃ua.
14Ha’e voi ome’ẽ hekove ñandesalva ha ñandepe’a hag̃ua aña reko vaígui, ñanemopotĩ ha jaiko hetã potĩva ramo ichupe g̃uarãnte, ha ñande ñanekyre’ỹve jahávo jajapo hag̃ua tembiapo porã.
15Ko’ã mba’e emoherakuã ha ehekombo’e. Aníke reheja avave nande’apói mba’evéramo hikuái.
Who We AreWhat We EelieveWhat We Do
2025 by iamachristian.org,Inc All rights reserved.
