Deuteronómio 5 - Biblia en Guaraní - ?anderuete ?e’? Por? 2015

Umi 10 Tembiapoukapy

1Moises ohenói mayma Israelguápe ha he’i ichupekuéra: Israelguakuéra pehendu ko’ã mbo’epy ha ko’ã tembiapoukapy che ha’éva ko ára kóvape pende apysápe; peikuaa ha pejapopa hag̃ua hekoitépe.

2Jahve, Ñanderuete, ome’ẽma iñe’ẽ ñandéve Horébpe.

3Ñanderuete nome’ẽi ñande rukuérape añónte ko ñe’ẽ kóva, ome’ẽ avei ñande jaikovévape g̃uarã.

4Pende rovake Ñanderuete oñe’ẽva’ekue pe cérrogui, tata mbyte guive.

5Upéramo che aimékuri peẽ ha Ñanderuete pa’ũme, aikuaauka porã hag̃ua peẽme iñe’ẽ; pekyhyjégui hatágui, ani hag̃ua pejupi pe cérrope, upévagui che aime upépe, ambohasa hag̃ua iñe’ẽ peẽme g̃uarã Ha’e he’i háicha:

6Chénte Jahve, pende Ruete, poguenohẽva’ekue Egípto retãgui, tembiguái rekógui.

7Ndereguerekoiva’erã ambue jára che ykére.

8Nderejapoiva’erã ndejupe g̃uarã mba’eveichagua ta’ãnga, umi mba’e yvagakuéra térã yvy pegua, y térã yvy guýpe oĩva guive.

9Nereñesũiva’erã henondepekuéra ha ani remomba’eguasútei ichupekuéra; Chénte ha’égui Jahve, nde Jaraite, imbarete ha hakate’ỹva, ahaviráta tuvakuérape chembopochýva, ita’yrakuéra mbohapy térã irundy ñemoñareha (generaciónes) peve.

10Che aiporiahuverekóta katu 1.000 ñemoñare (generaciónes) peve, umi cherayhu ha ojapóvape che rembiapoukapykuéra.

11Nerehenói reiriva’erã Jahve, pende Ruete réra; pende Ruete ohaviráta upe oiporu reívape héra porãite.

12Remboareteva’erã pytu’uha ára ha reñemboyke, Jahve, pende Ruetépe g̃uarã, Ha’e he’i haguéicha ndéve.

13 Seis ára remba’apova’erã ha rejapova’erã opaite ne rembiapo;

14ha pe ára 7-hápe katu repytu’uva’erã, Jahve, pende Ruetépe g̃uarã; mba’eveichagua tembiapo nderejapoiva’erã nde, ni nde ra’y, ni nde rajy, ni ne rembiguái kuimba’e térã kuña, ni ne rymba guéi, ni ne rymba búrro, térã ambue ne rymba, ni pe tetã ambueygua oikóva nde rógape; opaite ne rembiguaikuéra opytu’uva’erã avei nendive.

15Nemandu’áke reiko hague avei tembiguái ramo Egípto retãme, ha Jahve, pende Ruete, nerenohẽ hague upégui pyapy mbarete ha jyva jepysópe; upévagui Jahve, pende Ruete, he’i ndéve emboarete hag̃ua pe pytu’uha ára.

16Emboetéke (ehayhu) nde ru ha nde sýpe, Jahve, nde Jaraite, he’i haguéicha ndéve, reikove puku ha oho porã hag̃ua ndéve ko yvy kóvape, Ha’e ome’ẽmava ndéve.

17Ani reporojukátei.

18Ani rejoguereko menda’ỹre.

19Ani remondátei.

20Ani erétei nde rapicha rehe japu.

21Ani reipotátei nde rapicha rembireko, ni nde rapicha róga, ni ijyvy, ni hembiguaikuéra, ni hymba guéi, ni hymba búrro, ni mba’evete nde rapicha mba’éva guive.

22Opaite ko’ã ñe’ẽ Ñanderuete he’i pende atyguasúpe pe cérrope, tata mbyte ha arai pytũha guive, ñe’ẽ hatã rupi he’iva’ekue ko’ã ñe’ẽ. Ha ohai ko’ã ñe’ẽ mokõi ita ipéva rehe, ha ome’ẽkuri chéve.

Tetãyguakuéra okyhyje

23Ha peẽ pehendúvo Ha’e oñe’ẽha arai ypytũ guive, ha pehecha pe tata hendýva cérrope, peẽ, karai ancianokuéra ha tríbu ruvichakuéra,

24pejékuri: Ñanderuete ohechauka oréve heko jajaipa ha ipu’aka, ha rohendu iñe’ẽ tata mbyte guive; pe ára pévape rohecha Ñanderuete ikatuha oñe’ẽ tata mbyte guive avave omano’ỹre.

25Ha ág̃a mba’érehepa romanóta. Ko tataguasuete orembokusuguepáta; rohendu jevýrõ Ñanderuete ñe’ẽ, romanombáta.

26Ha moõpa ojehecha peteĩ kuimba’e térã kuñáme ohendúva Ñanderuete oikovéva ñe’ẽ tata rendy mbyte guive, ore rohendu haguéicha, ha oikovehina gueteri.

27Upévare eñembojána nde, Moises, pende Ruetére ha ehendu opaite mba’e, Ha’e he’íva guive; ha nde rembohasa jevýta oréve opaite mba’e Jahve, ore Jaraite, he’íva guive ndéve, ha ore rohendu ha rojapopáta iñe’ẽ.

28Ha Ñanderuete ohendu pene ñe’ẽ, peñe’ẽ ramoguare chéve, ha he’i chéve: Ahendu ko’ã tetãygua ñe’ẽ ha oĩ porã opaite mba’e he’íva guive hikuái ndéve.

29Mba’eichatamora’e ko’ã ñe’ẽ opyta porã ipy’apypekuéra ha kyhyjepópe tojapopa hikuái umi che rembiapoukapy oho porãmba hag̃ua ichupekuéra ha ita’yrakuérape g̃uarã opaite árape.

30Tereho ha ere ichupekuéra: Tapehopa jevy pende rogakuérape.

31Ha nde, epyta chendive ko’ápe, ha’epa hag̃ua ndéve ko’ã tembiapoukapy, mbo’epykuéra ha che rembipota rembo’eva’erãva ichupekuéra, ha ojapopa hag̃ua hekoitépe pe yvy Che ame’ẽtavape ichupekuéra.

32Peikuaa porãke ha pejapóke Ñanderuete he’iva’ekue guive peẽme; ani peñemboykétei akatúa térã asu gotýo.

33Peguata porãke Ñanderuete rape rehe, peikove ha oiko porãmba hag̃ua peẽme, ha avei pembopuku hag̃ua umi ára Canaan yvýpe, oñeme’ẽtava peẽme pene mba’erã ramo.