1Pe iñañáva okañy avave omuña’ỹre ichupe; ha pe heko potĩva oiko ku leõ ra’ýicha kyhyje’ỹre oikóva.
2Pe tetã oguerekóva heta tekove iñañáva, oguereko avei heta imburuvicharã; pe tetã ruvicha iporãva katu hi’aréta.
3Peteĩ mburuvicha ojopyete ramo hetãyguakuéra mboriahúpe, ojogua amaguasuetépe ohundíva temitỹnguérape.
4Umi omboykéva tembiapoukapy, omomba’eguasu iñañávape ha oñemoĩ heko potĩva rehe.
5Umi tekove ñaña ndoikuaái pe teko porã; ha umi ohekáva Ñanderuetépe katu hesakã ichupe opaite mba’e.
6Iporãve pe mboriahu oikóva tape potĩme, peteĩ ipirapire hetáva oguatárõ tape vai rupi.
7Pe ta’ýra ojapóva Ñanderuete rembiapoukapy iñakãguapy porã; ha upe ta’ýra oikóva umi tapicha vaíva ndive omotĩ itúvape.
8Upe ombohetahetave ohóvo ipirapire oipe’a reígui ha omba’eporuka hepyetereígui, ombohetave imba’eita peteĩ oiporiahuverekokuaávape g̃uarã, ha péva ombohasa jevy mboriahukuérape g̃uarã.
9Upe omboykéva ijapysa ani hag̃ua ohendu Ñanderuete rembiapoukapykuéra, iñembo’e jepe mba’evai (Ñanderuetépe g̃uarã).
10Upe ombojavýva heko porãvape hape porãgui, ha’e voi ho’a jevyva’erã upe yvykua ha’e ojo’ova’ekuépe, ha umi heko potĩva katu ohupityva’erã mba’eporã.
11Pe tapicha ipirapire hetáva he’i ijehe iñaranduha; pe mboriahu iñakã porãva katu ohechakuaa porã ha’e oñemoarandu gua’uha.
12Umi heko potĩva oñembohetave ramo, oĩ py’aguapy hetãme; ha umi iñañáva oñembohetave ramo peteĩ tetãme hetãyguakuéra okañymba ichuguikuéra, okyhyjégui.
13Pe omokañýva hi’angaipa ndoiko porãi, ha upe oñemombe’úva ha oñemboykéva tembiapo vaígui ohupityva’erã perdon.
14Ovy’aitereirasa pe tapicha okyhyjéva Ñanderuetégui; ha upe oñembopy’a hatãva katu ho’ava’erã mba’evaípe.
15Peteĩ leõ okororõva ha óso iñembyahýivape ojogua upe mburuvicha iñaña rekóva pe hetãyguakuéra mboriahúpe g̃uarã.
16Pe mburuvicha iñakã porã’ỹva heta jevy oporojopy jopyve ohóvo hetãyguakuérape; ha upe oñemboykéva pirapire hekope’ỹvagui, ombopukuveva’erã hekove arakuéra.
17Pe tapicha oñohẽva hapicha ruguy okañyva’erã oñeñotỹha ára peve, aníke avave oipytyvõ ichupe.
18Pe oikóva teko porãme ndohasa asymo’ãi ha upe oikóva tape tie’ỹ rehe katuete oñehundiva’erã.
19Pe ijyvy rehe omba’apóva hyg̃uatãva’erã ikóga’a rupi; ha upe oiko reíva katu imboriahuetereiva’erã.
20Pe heko potĩva ojehovasava’erã ha upe pya’e pya’e oñembopirapire hetaségui ho’ava’erã hembiapo vai rupi.
21Naiporãi ñamboyke avavépe ñande rapichakuéra apytégui, peteĩ pan pehẽngue rehe jepe oĩ tapichakuéra opyrũva teko porã rehe.
22Pya’e pya’e oñembopirapire hetaséva oipota potavégui ndoikuaái gueteri ha’e voi imboriahuva’erãha.
23Upe oavisáva peteĩ tapichápe opoi hag̃ua heko vaígui, amo ipahápe ojehayhuveva’erã upe oporombojuruhe’ẽvagui.
24Upe omondáva itúva térã isýpe, ha he’i ramo ndaha’eiha tembiapo vai, upe tapicha upéva peteĩ mondaha ivaietéva.
25Pe ñembotuicha omoheñói teko vai, ha pe ojeroviáva Ñanderuete rehe katu oñemohyg̃uatãva’erã.
26Upe ojeroviáva iñakã porã rehe, itavy ha upe oikóva arandupópe katu ojesalvava’erã.
27Upe ome’ẽva mboriahúpe naimboriahuiva’erã; ha upe omboykéva hesakuéra imboriahúvagui katu ohupitýta heta maldicion.
28Umi heko ñañáva oñemopu’ãve ramo hapichakuéra okañy ichuguikuéra, ha umi heko potĩva omano rire umía oñembohetave ohóvo.
Who We AreWhat We EelieveWhat We Do
2025 by iamachristian.org,Inc All rights reserved.
