Levítico 14 - Biblia en Guaraní - ?anderuete ?e’? Por? 2015

1Ha Ñanderuete oñe’ẽ Moiséspe, ha he’i:

2Ko’ãva hína tembiapoukapy ilépravape g̃uarã oñemopotĩtaha ára jave ojegueruva’erã pa’i rendápe,

3ha pe pa’i osẽva’erã hekohágui oka gotýo oma’ẽ porã hag̃ua pe hasýva rehe; ha ohecha hag̃ua okueramaha ilépragui,

4pe pa’i ojapyhyukava’erã pe oñemopotĩvape g̃uarã mokõi guyra’i oikovéva, ipotĩva reheguáva ha yvyra cédro, poyvi pytãva ha peteĩ sórgo apesã (ojogua avati mirĩme).

5Ha pe pa’i ojukaukava’erã peteĩ guyra’i peteĩ kambuchi ñay’ũguigua ári, oĩháme y yvu peguare.

6Upéi ojapyhyva’erã pe guyra’i oikovéva, pe cédro, pe poyvi pytã ha pe sórgo apesã, ha ombohykueva’erã pe guyra’i oikovéva reheve, pe guyra’i ojejukava’ekue ruguykuépe, oguenohẽva pe kambuchi ñay’ũguiguágui, ha oñembojehe’ava’ekue y yvu peguarégui;

7ha ohypyiva’erã 7 jevyve pe hasyva’ekue ári, ha he’íta ichupe ipotĩha; ha opoiva’erã pe guyra’i oikovévagui ñúme.

8Ha pe hasyva’ekue ojoheiva’erã ijao, ojehague’opa ha oñemopotĩva’erã ýpe ipotĩ jevy hag̃ua; ha upéi oikéta pe tekohápe, oikóta katu 7 ára pukukue hóga rokárape.

9Ha pe ára 7-hápe omoperõ jevyva’erã iñakã rague, hendyva, ityvyta ha opaite haguekuéra, ha ojoheiva’erã ijao, ojoheiva’erã hete ýpe, ha ha’e ipotĩ jevy.

10Pe ára 8-hápe oguerahava’erã mokõi ovecha ra’yrusu iporãva ha peteĩ ovecha kuña iporãva oguerekóva peteĩ áño, ha 6,6 lítro trígo ku’i porã oñembojehe’apyréva 0,3 lítro acéite reheve ha oikuave’ẽukapava’erã.

11Ha pe pa’i oporomopotĩtava ogueruva’erã pe hasyva’ekuépe pende Ruete renondépe, pe óga jojohuha rokẽme;

12ha pe pa’i oikuave’ẽva’erã peteĩ ovecha ra’yrusu kuave’ẽmby ñemyengovia reheguáva ramo pe acéite reheve, ha omyatymoiva kuave’ẽmby ñemyatymõi ramo pende Ruete renondépe.

13Ha oajúra kytĩta pe ovecha ra’yrusu pe tenda ojeajúra kytĩháme, avei pe kuave’ẽmby angaipa reheguáva ha pe kuave’ẽmby ojehapýtava pe tenda oñemboykéva pende Ruetépe; pe kuave’ẽmby angaipa reheguáicha, péicha avei pe kuave’ẽmby ñemyengovia reheguáva pa’i mba’erã; ko mba’e kóva oñemboykégui pende Ruetépe g̃uarã.

14Ha pe pa’i ojapyhyva’erã pe kuave’ẽmby ñemyengovia rehegua ruguykuégui, ha omoĩva’erã pe oñemopotĩva nambi akatúa rehe, ikuãguasu akatúa rehe ha ipysãguasu akatúa rehe.

15Upéicha avei pe pa’i ojapyhyva’erã pe acéitegui ha ohypyiva’erã ipopyte asu rehe,

16ha omyakỹva’erã ikuã akatúape pe acéite oĩva ipo asúpe, ha ohypyiva’erã pe acéite ikuãme 7 jevy pende Ruete renondépe.

17Ha pe acéite hembýva ipópe omoĩta pe oñemopotĩva nambi akatúa rehe, ikuãguasu akatúa rehe ha ipysãguasu akatúa rehe, pe kuave’ẽmby ñemyengovia rehegua ruguykue oĩháme.

18Ha pe acéite ipópe hembýva gueteri omoĩva’erã pe oñemopotĩva akã rehe, upéicha pe pa’i omoĩ porã jevýta ichupe pende Ruete renondépe.

19Uperire pe pa’i oikuave’ẽva’erã pe ambue ovecha ra’y kuave’ẽmby angaipa reheguáva omopotĩ hag̃ua ichupe ha ipahápe oajúra kytĩva’erã pe kuave’ẽmby ojehapypa reheguáva.

20Ha pe pa’i ohupiukáta pe kuave’ẽmby ojehapypa reheguáva pe kuave’ẽmby renda ári. Péicha pe pa’i ojapóta omoĩ porã jevy hag̃ua ichupe ha ha’e ipotĩ jevýta.

21Ha oime ramo pe hasyva’ekue imboriahu ha ndoguerekopái ramo hepyrã, upéicharamo oguerúta peteĩ ovecha ra’yrusu oñekuave’ẽ hag̃ua kuave’ẽmby ñemyengovia reheguáva ramo ijejavy rehe, oñemoĩ porã jevy hag̃ua, ha 2,2 lítro trígo ku’i porã oñembojehe’apyréva 0,3 lítro acéite reheve, ikuave’ẽmby tembi’u reheguáva ramo,

22ha mokõi jeruti térã mokõi pykasura’y, ipu’aka háicha; peteĩ oikuave’ẽukáta kuave’ẽmby angaipa reheguáva ramo ha ambue kuave’ẽmby ojehapypáva ramo.

23Pe ára 8-ha oñemopotĩ haguépe ogueruva’erã ko’ã mba’e pa’ípe, pe óga jojohuha rokẽme, pende Ruete renondépe.

24Ha pe pa’i oikuave’ẽva’erã pe ovecha ra’yrusu oñemyengovia hag̃ua ha pe acéite, kuave’ẽmby oñemyatymoiva ramo pende Ruete renondépe.

25Upéi oajúra kytĩva’erã pe ovecha ra’yrusu kuave’ẽmby ñemyengovia reheguáva, ha pe pa’i ojapyhyva’erã huguykuégui, ha omoĩva’erã pe oñemopotĩva nambi akatúa rehe, ikuãguasu akatúa rehe, ha ipysãguasu akatúa rehe.

26Ha pe pa’i omoĩva’erã pe acéite ipopyte asúpe;

27ha ikuã akatúape pe pa’i ohypyiva’erã pe acéite oĩva ipo asúpegui, 7 jevy pende Ruete renondépe.

28Avei pe pa’i omoĩva’erã pe acéite oguerekóva ipópe ha omoĩta pe oñemopotĩva inambi akatúa rehe, ikuãguasu akatúa rehe ha ipysãguasu akatúa rehe, pe kuave’ẽmby ñemyengovia rehegua ruguy oĩháme.

29Ha pe acéite hembýva gueteri pa’i pópe, omoĩva’erã pe oñemopotĩva akã ári, oñemoĩ porã hag̃ua pende Ruete renondépe.

30Upéicha avei oikuave’ẽva’erã peteĩ jeruti térã peteĩ pykasura’y, umi mokõi guyra apytégui ha’e ipu’aka háicha.

31Peteĩ oikuave’ẽta kuave’ẽmby angaipa reheguáva ramo ha ambue kuave’ẽmby ojehapypáva reheguá ramo, pe kuave’ẽmby tembi’u reheguáva reheve; ha pe pa’i oikuave’ẽva rupi oñemoĩ porã jevýta ichupe pende Ruete renondépe.

32Ko’ãva hína umi tembiapouka peteĩ ilépravape g̃uarã ha’e imboriahuete ramo.

33Ñanderuete oñe’ẽ Moises ha Aarónpe, ha he’i:

34Ág̃a peike vove Canaan yvýpe, Che ame’ẽtava peẽme pene mba’erã ramo, ha ojejohu ramo koichagua plága, lépra, pende róga rehe,

35pe óga jára voi tou omombe’u hag̃ua pa’ípe, he’ívo: Peteĩ mba’e ky’a (máncha), osẽ che róga tápia rehe.

36Upéicharamo pe pa’i oguenohẽukapava’erã hogayguakuérape, ha’e oho mboyve oma’ẽ hag̃ua pe mba’e ky’a rehe, ani hag̃ua oñemongy’a umi oĩva guive pe ógape; ha upéi pe pa’i oikeva’erã ohecha porã hag̃ua.

37Ha oma’ẽ porãva’erã pe máncha rehe; ha ohecha ramo pe óga tápiare mba’e ky’aichagua hovyũva térã pytãngýva, ha ipypukuve ramo pe tápia apégui,

38pe pa’i osẽta pe óga rokẽgui, ha ombotyva’erã pe óga 7 ára pukukue.

39Ha pe ára 7-hápe ou jevyva’erã pe pa’i ha oma’ẽ porãva’erã hese; ha pe mba’e ky’a iñasãive ramo pe óga tápiare,

40pe pa’i oguenohẽukava’erã umi ita iplágava pe óga tápiagui omombouka táva jeikoha okárape, yty oĩháme.

41Ha oikarãiukava’erã pe óga tápia ryepýguio ha omomboukáta táva jeikoha okárape umi mba’e ky’áva oñerenohẽva’ekue pe yty oĩháme.

42Ha ojejapyhyva’erã ambue ita omoĩ hag̃ua umi ojepe’ava’ekue rendaguépe; ha upéi oñemboty porã jevyva’erã tujúpe pe tápia.

43Ha pe máncha osẽ jevy ramo pe óga tápia rehe, oguenohẽ rire umi ita ha oikarãi rire, ha oñembopyahu rire tujúpe pe tápia,

44upéicharamo pe pa’i oikeva’erã oma’ẽ porã jevy hag̃ua; ha pe plága iñasãi jevy ramo pe óga rehe, péva ai vai ha pe óga naipotĩri.

45Upéicharamo ojeitypava’erã pe óga. Ha toñemombo itakuéra, yvyrakuéra ha opaite tuju táva jeikoha okárape, pe yty oĩháme.

46Ha oimeraẽ oikéva guive pe ógape upe pa’i ombotyuka rire, iky’áta pyhare peve.

47Ha umi okéva térã okarúva pe ógape oñembotyukaha árape, ojoheiva’erã ijao.

48Ha pe pa’i oike vove oma’ẽ porã hag̃ua, ha ohecha ramo pe mba’e ky’a noñemyasãiri pe ógare oñemyatyrõ rire, pe pa’i he’íta pe óga rehe ipotĩha, ndojekuaavéigui pe máncha.

49Upéicharamo oñemopotĩ hag̃ua pe óga ojapyhyva’erã mokõi guyra’i, yvyra cédro, poyvi pytãva ha pe mba’e rypyiha;

50ha oajúra kytĩta pe guyra’i peteĩ kambuchípe, oĩháme y yvu peguare.

51Ha ojapyhýta pe cédro, pe mba’e rypyiha, pe poyvi pytãva ha pe guyra’i oikovéva ha ombohykuéta pe guyra’i ojukava’ekue ruguykuépe ha pe y yvu peguarépe, ha ohypyiva’erã ipype 7 jevy pe óga rehe.

52Upéicha ha’e omopotĩta pe óga pe guyra’i ruguykuépe ha pe y yvu peguarépe, pe guyra’i oikovéva ha pe yvyra cédro, pe mba’e rypyiha ha pe poyvi pytãvape.

53Upéi opoiva’erã pe guyra’i oikovévagui táva jeikoha okárape pe ñu ape ári, péicha oñemoĩ porã jevy pe óga ha ipotĩ jevy.

54Kóva ningo pe tembiapoukapy opaichagua plága lépra rehegua, uñe rehegua,

55 lépra aokuéra rehegua, máncha óga rehegua,

56apeno rehegua, kuru’i rehegua ha ky’aichagua morotĩva rehegua,

57ojekuaa porã hag̃ua ipotĩpa térã naipotĩripa, ko’ãva ningo hembiapoukapykuéra.