2 Crónicas 8 - Biblia en Guaraní - ?anderuete ?e’? Por? 2015

Ambue tembiapo Salomon ojapova’ekue

1Salomon oiporu 20 áño omopu’ãmba hag̃ua Ñanderuete rogaguasu ha hogaguasuetéva.

2Salomon omyatyrõ jevy umi táva Hiram ome’ẽva’ekue ichupe, ha omohenda ipype Israel ñemoñarenguérape.

3Upéi Salomon ou Hamat, Soba reheguápe, ha omoĩ ipoguýpe.

4Ha omopu’ã Tadmor desiértope, ha umi táva omopu’ãva’ekue Hamátpe oñongatu hag̃ua heta tembi’u.

5Upéicha Salomon omyatyrõ jevy avei Bet-horon yvateoygua ha Bet-horon yvy gotyogua, ko’ã táva oñemombarete porã, ikorapyjere yvate ha hokẽnguéra mbotyha mbarete;

6Salomon omyatyrõ avei Baalat ha opaite ambue tavakuéra oñeñongatu porã hag̃ua hi’upyrã oñembyatýva guive; omyatyrõ avei opaite táva oĩháme icarrokuéra ha ikavaju ariguakuéra ha heta ambue mba’e Salomon omopu’ã Jerusalénpe, Líbanope ha opaite yvy ipoguýpe oĩva guive.

7Ha umi tetãygua hembyva’ekue Hetguágui, Amorguágui, Ferezguágui, Hevguágui ha Jebusguakuéragui, ha ndaha’éiva Israel retãygua,

8ha Israelguakuéra nohundiriva’ekue umívape, Salomon katu omomba’apo rei ichupekuéra ko ára kóva peve.

9Ha Israel ñemoñarenguérape katu Salomon nomoĩri hembiguái rei ramo hembiaporãme; ha’ekuéra opyta soldádo ramo, isoldádo aty ruvicha ha mburuvicha’i ramo, icárro mboguatahára ramo ha kavaju ariguakuéra ramo.

10Ha Salomon oiporavo 250 mburuvichakuéra oisãmbyhy hag̃ua hetãme, opaite yvy oĩva guive ipoguýpe.

11Ha Salomon oguerova faraon rajýpe, David távagui pe óga ha’e omopu’ãva’ekuépe ichupe g̃uarã, he’ígui péicha: Che rembireko ndoikoiva’erã David, Israel retã ruvicha rógape, oñemboykégui Ñanderuete karameg̃uáme g̃uarã.

12Upéramo Salomon oikuave’ẽ kuave’ẽmby ojehapypáva Ñanderuetépe, ikuave’ẽmby renda ári, ha’e omopu’ãva’ekue Ñanderuete rogaguasu renondépe,

13oikuave’ẽ hikuái opaite mba’e hi’árape, Moises rembiapoukapy he’i háicha, jepytu’uha arakuérape, jasyra’y jave, umi mbohapy areteguasu oikóva peteĩ áño pukukuépe, umíva hína: arete pan ilevadura’ỹre, pe semána arete reheguáva, ha pe arete óga yvyrarakã reheguáva (enramáda).

14Ha omoĩ pa’ikuérape hembiaporãme, omba’apo hag̃ua aty atýpe David, itúva he’i haguéicha, ha upéicha omoĩ avei Leviguakuérape hembiaporãme omomba’eguasu hag̃ua ha oipytyvõ hag̃ua pa’ikuérape hembiapópe, opavave hi’araitépe; ha upéicha avei umi okẽ ñangarekoharakuéra, peteĩteĩva oñangareko hokẽnguéra rehe hi’arakuérape; péicha David, Ñanderuete rembiguái, he’iukava’ekue.

15Ha tetã ruvicha Salomon ojapoukapa hekoitépe Ñanderuete he’i haguéicha hembiapoukapýpe pa’i ha Leviguakuéra rembiapo ha hekovekuéra rehe, ha umi oñangarekóva mba’erepy rehe.

16Opaite Salomon rembiaporã oñembosako’i porã raẽ, oñepyrũ guive omopu’ã hag̃ua Ñanderuete rogaguasu opa peve. Upéicha ojejapopa Ñanderuete rogaguasu.

17Upéramo Salomon oho Ezion-géberpe ha Elátpe, yguasu rembe’ýpe, Edom yvýpe.

18Hiram oguerahauka ichupe barcoguasu ha kuimba’ekuéra ikatupyrýva yguasúpe, umía oho Salomon rembiguaikuéra ndive Ofírpe, ha upégui ogueru 15.075 kílo óro, tetã ruvicha Salomónpe g̃uarã.