Eclesiástes 10 - Biblia en Guaraní - ?anderuete ?e’? Por? 2015

Pe arandu iporãite

1Pe mberu re’õngue omone ha omohyakuã vai pe mba’e ryakuã porãme; peichaite peteĩ itarováva ñe’ẽ, ombyai iñarandúva ñe’ẽ.

2Pe iñarandúva opensa mba’eporã rehe, ha pe ivýrova opensa mba’evai rehe.

3Ha pe ivýrova oguataha rupi ohechauka opavavépe ha’e naiñakãguapyiha.

4Pe mburuvicha opu’ãse ramo nderehe, ani repoi ne rembiapokuégui; pe ipy’a porãva ombogue ijejavy tuicháva.

5Oĩ peteĩ mba’evai ahechava’ekue yvy apére umi jejavy, heñóiva mburuvichakuéra apytégui:

6Pe itavýva oñemohenda yvateite, ha umi ipirapire hetáva oguapy ikarapevehápe,

7ahechákuri tembiguái kavaju ári, ha mburuvicha oikóva tembiguáicha yvy rupi.

8Upe yvykua ojo’óva ho’áta ipype; ha pe oitýva pe korapy itaguigua, mbói oisu’úta ichupe.

9Pe ita rehe omba’apóva, oñekytĩkuaa ipype; pe jepe’arã ojokáva, ojeharykuaa avei.

10Pe hácha nahãimbevéi ramo ha noñehãimbe’éi ramo ojehachea mbareteveva’erã; pe iñarandúva katu oiporu porã iñarandu (ombovevúi hag̃ua hembiapo, py’ỹive ohãimbe’eva’erã).

11Pe mbói oisu’u ramo pe paje apohárape ha’e ombojeroky mboyve pe mbóipe, hembiapo katupyry reiete ichupe g̃uarã.

12Pe ñe’ẽ osẽva iñarandúva jurúgui oporombovy’a, ha umi ivýrova ñe’ẽ katu ogueru ijupe g̃uarã mba’evai.

13Ojejuru pe’a guive he’i mba’e výro rei, ha oñe’ẽmbotávo he’i ñe’ẽ ivýro reíva jevy.

14Pe ivýrova omboheta hetave iñe’ẽ, jepevémo avave ndoikuaái pe ojehutavahína; ha avave ndoikuaaukamo’ãi ichupe umi mba’e ojehútava henonderãme.

15Umi ivýrova rembiapo omokane’õite ichupekuéra, upévare ndoikuaavéi hape ohóva itávape.

16Angái pe tetã, peteĩ mitãrusu oiko ramo hetã ruvicha ramo, térã imburuvichakuéra ojapo ramo karuguasu pyhareve peve.

17Ovy’aite katu pe tetã imburuvichaguasu heko potĩva, ha imburuvichakuéra okarúva hi’oraitépe, oñemombarete jevy hag̃uánte ha ndaha’éi oka’u hag̃ua.

18Pe iñate’ỹva róga ape oguejyve ohóvo, ha pe omba’apose’ỹva róga otykypa.

19Pe karuguasu oporombovy’a, víno ombohory umi oikovévape; ha pirapire rupi katu ojejapokuaa karuguasu ha ojejoguakuaa víno.

20Nde py’apýpe jepeve ani remaldeci ne retã ruvichápe, ha ñemiháme jepe nde kotýpe ani remaldeci pe ipirapire hetávape, umi guyra yvate ovevéva oguerahakuaáne ne ñe’ẽ, ha umi tembiguái ipepóva oikuaaukáne ne ñe’ẽngue.