1Péicha he’i pende Ruete: Moõ piko opyta pe kuatiañe’ẽ ame’ẽma pende sýpe apoi ramoguare ichugui térã moõ piko oĩ peteĩ ojeroviáva cherehe Che avendeva’ekue. Pema’ẽ porãke, peneñaña haguére aporome’ẽva’ekue (avende) peẽme, ha peñemoĩ haguére Cherehe apoimava’ekue pende sýgui (Sióngui).
2Mba’érehepa ajúrõ guare, ndajohuiva’ekue avavépe, ha pohenói ramoguare, avave nopenái cherehe. Imbyky piko che jyva ikatu’ỹ hag̃uáicha poipytyvõ. Ndachepu’akái piko poguenohẽ hag̃ua pende jejopy vaígui. Pema’ẽ porãke, ñe’ẽ pohýi rupi ambohypa pe yguasu; umi ysyrýgui ajapo yvy perõ; umi pira y pegua itujupa ndahi’yvéigui, ha ijy’uhéigui omanomba.
3Pytũme amonde yvagakuéra, umía añu’ã ku ao vosakuépe ramoguáicha.
4Ñanderuete, yvága Jára, ome’ẽ chéve peteĩ juru amokyre’ỹkuaa hag̃uáicha ikane’õvape; Ha’e chemombáy meme pyhareve ha oñe’ẽ che apysápe ahendukuaa hag̃uáicha hemimbo’eteéva.
5Ñanderuete, che Jára cheapysamboty’o ha che añemomirĩ ha namboykéi ne ñe’ẽ.
6Ame’ẽ che atukupe chenupãsévape ha che rova umi cherendyva’osévape; namokañýi che rova umi cheja’osévagui térã umi cherehe ondyvusévagui.
7Ñanderuete, pe yvága Jára, chepytyvõtagui natĩmo’ãi, upévare che amohatã che rova ku itáicha ha aikuaa porã natĩmo’ãiha.
8Ag̃uiete chehegui oĩ che mbojovakehára; upévare, mávapa opu’ãkuaa avei cherehe. Upe oñemoĩséva cherehe tou katu, upe opu’ãséva cherehe tog̃uahẽ che rendápe.
9Pema’ẽ porãke Ñanderuete rehe, pe yvága Jára, che pytyvõhára rehe. Mávapa oñe’ẽvaise cherehe, ha’ekuéra oñehundipáta ku polílla ho’u háicha pe ao.
10Mávapa pende apytépe okyhyje Ñanderuetégui, ha ohendu hembiguái ñe’ẽ. Ha nde reiko ramojepe pytũ guýpe térã nderehechái ramojepe pe arasakã, ejerovia Ñanderuete rehe, ha ejejoko nde Jára rehe.
11Cháke peẽ pehatapyñáva ha pembosako’íva pende hu’y rendy, peẽ voi pe’áta pende rata ha pende hu’y rendy rupi. Che pógui voi og̃uahẽ ko’ã mba’e pene rendápe ha pehasa asyetéta ha peñehundíta avei.
Who We AreWhat We EelieveWhat We Do
2025 by iamachristian.org,Inc All rights reserved.
