1Mba’érehe piko Nde, ore Ruete, oremboykéra’e opaite árape. Mba’érehe piko ndepochy nde ovecha aty ndive.
2Nemandu’amína nde aty rehe, yma rejoguava’ekue ne retãtee ramo, nemandu’amína Sion cérrore, nde reikoha rehe.
3Eguatamína nde róga ho’apava’ekue rupi, umi nderayhu’ỹva ombyaipa nde rogaguasu.
4Umi nderehe ija’e’ỹva osapukái joa nde rogaguasu ryepýpe, ha omopu’ã hikuái ipoyvi veve (bandéra) techaukaha ramo.
5Ojogua umi omopu’ãvape hácha ka’aguy mbytépe.
6Ha ág̃a hácha ha mázo (martilloguasu) reheve ojokapa hikuái umi yvyra ojeguapáva oĩva guive nde rogaguasúre.
7Omboja hikuái tata nde rogaguasúre ha omongy’a nde rogaguasu nde réra oñemomba’eguasu haguépe.
8He’i hikuái ipy’apýpe: Ñahundipáta peteĩ jevýpe, jahapypáta opaite Ñanderuete rogakuéra oĩva guive ko tetã kóvape.
9Ndorohechavéima techaukahakuéra ni milagrokuéra, ndaiporivéi iproféta, ha ore apytépe ndaiporivéima avave oikuaáva araka’épa ko’ã mba’e oikóne.
10Araka’e pevépa, Nde, ore Ruete, ha’ekuéra oremotĩ ha orejopy asýta. Oñembohory ha oñe’ẽ vaítapa opaite árape nde réra rehe.
11Mba’érehe piko reñomi nde po. Mba’érehe piko reñomi nde po akatúa nde ao guýpe, eguenohẽ jevýna.
12Ñanderuete yma guive Nde ore ruvichaguasu, Nde orepytyvõ porãra’e ko yvy apére.
13Nde pu’aka rupi remboja’ova’ekue pe yguasu ha rejokava’ekue tejujaguaguasu akã oikóva yguasúpe.
14Remongu’i pe leviatan akãnguéra, ha reme’ẽ umi mymba ñu perõme oikóvape hembi’urã ramo.
15Rembosyry yvu ha ysyrykuéra, remokã avei ysyry osyry hatãva.
16Ne mba’e ningo pe ára ha ne mba’e avei pe pyhare, Nde remohenda pe jasy ha pe kuarahy.
17Nde remoĩ ko yvy rembe’y, pe araro’y ha arahaku ningo ne rembiapo avei.
18Ko’ã mba’e rehe nemandu’ami: Umi nderayhu’ỹva oñe’ẽ vai nderehe che Ruete, ha peteĩ tetã heko vaíva oñembohory nde réra rehe.
19Ani reme’ẽtei umi mymba ñarõme pe pykasu ánga, ha ani nderesarái nde aty ojepy’apy asývagui.
20Nde nemandu’a ne ñe’ẽme’ẽ rehe, ñane retã opa rupi henyhẽte mba’evai apoháragui.
21Ani oñemotĩtei upe ojejopýva, pe ojepy’apy asýva ha pe iporiahúva tomomba’eguasu nde réra.
22Epu’ãmína, Nde, ore Ruete, ha eñorãirõ nderehehápe, nemandu’amína mba’eichaitépa pe tekove vai opaite árape oñe’ẽvai nderehe.
23Anítei nderesarái umi nderehe ija’e’ỹva ñembohorýgui, umi nderehe opu’ãvamanterei osapukaivahína.
Who We AreWhat We EelieveWhat We Do
2025 by iamachristian.org,Inc All rights reserved.
