Ezequiel 39 - Biblia en Guaraní - ?anderuete ?e’? Por? 2015

1Ha nde, kuimba’e ra’y, emomarandu Gog rehe, ha ere: Péicha he’i Yvága Atykuéra Jára, pende Ruete: Eikuaa porãke, Che apu’ãta nderehe, nde, Gog reisãmbyhýva Ros, Mesec ha Tubal retãme.

2Che romboguatáta roisãmbyhývo ha roguerúta nórtegui, Israel cerrokuéra peve.

3Pe guyrapa oĩva nde po asúpe aitýta, ha nde hu’ykuéra oĩva nde po akatúape amomboukáta.

4Israel cérrope re’áta; nde ha nde soldádo atykuéra, ha opaite ambue tetã oĩva guive nendive; upépe Che pohejáta opaichagua guyra ipyapẽ mbukúva ha umi mymba ñarõ ñu rupigua rembi’urã ramo.

5Upe ñu reípe pe’apáta; Che, Yvága Atykuéra Jára, ha’epáma ko’ã mba’e.

6Che aitýta tata Magog rehe ha umi ipy’aguasúva ári oikóva y rembe’ýpe; ha’ekuéra oikuaa hag̃ua Che ha’eha Yvága Atykuéra Jára, pende Ruete.

7Ha amomba’eguasúta che reraguasu che retã Israel apytépe, ha araka’evéma ndahejaveimava’erã ha’ekuéra omongy’a che reraguasu, ha umi ambue tetã oikuaáta Che ha’eha Yvága Atykuéra Jára, pende Ruete, pe Heko porãva, añorãirõva Israel rehehápe.

8Ko’ã mba’e ojehúta ha og̃uahẽta katuete, he’i pende Ruete; kóva voi ningo pe ára ha’emava’ekue.

9Ha Israel tavayguakuéra osẽ joáta, ombyaty ha ohapýta hesekuéra ija’e’ỹva ñorãirõ rembiporu; isoldádo rete mo’ãha michĩ ha tuicháva, iguyrapa ha hu’ykuéra, ijyvyra nupãha, ijyvyra puku akuakuéra; umi mba’e ohapýta hikuái 7 áño pukukue ijepe’a ramo.

10Ikokuégui ndoguerumo’ãi jepe’a, ndoitymo’ãvéima ka’aguy pegua yvyra ijepe’arã ramo, oiporúta uvei umi ñorãirõ rembiporu oipe’a reiva’ekue ichuguikuéra, upérõ Israelguakuéra omondáta imondaharekuérape, he’i pende Ruete.

11Umi ára umívape Che ame’ẽta Gógpe isepultúra rendag̃ua Israel retãme, upe ñu opytáva yguasu rembe’ýpe ha umi oguatáva upérupi ndikatuvéima oguata porã henyhẽgui te’õnguégui, oñeñotỹ haguére Gog ha ijaty ndetuichávape; ha ombohérata hikuái pe ñu Hamon-Gog, he’iséva Gog soldádo atyguasu válle.

12Israel retãygua katu oñotỹta ichupekuéra 7 jasy pukukue, omopotĩ hag̃ua hetã yvy (hese ija’e’ỹva retekuégui).

13Opaite Israelgua oikóva guive hetãme oipytyvõta oñotỹ hag̃ua ichupekuéra; ha upe ára upévape, ahechauka jave che pu’aka, ha’ekuéra chemomba’eguasu jevýta.

14Umi 7 jasy rire, ojeporavóta umi kuimba’e ojepagátavape, ohova’erãva hetã tuichakue rupi oñotỹ hag̃ua umi te’õngue oñeñotỹ’ỹvape gueteri, omopotĩ porã jevy hag̃ua Israel retãme.

15Ha umi tapicha ojohu ramo yvyarigua kangue omoĩta ijypýpe peteĩ techaukaha, oñotỹ meve hetekue Hamon-Gog vállepe.

16Ha upe táva ijypýpe oĩva, hérata avei Hamona; upéicha Israelguakuéra omopotĩmbáta hetãpy.

17Ha nde, kuimba’e ra’y, péicha he’i pende Ruete: Ere opaichagua guyra ha mayma mymba ñarõ ñu rupiguápe oñembyaty ha ou joaite hag̃ua; oparupiétegui oñembyatýta hikuái pe yvýpe ambosako’iva’ekue peẽme g̃uarã, peteĩ jejuka ndetuicháva oikóta Israel cerrokuérape, upépe pe’úta so’o ha pemboy’úta huguy.

18Ipy’aguasúva ro’o, ha mburuvichakuéra ruguy pe’úta; ovecha machokuéra, ovechara’ykuéra, kavara machokuéra, guéi ha torokuéra Basánpe oñemongyrava’ekue topytapa pene rembi’urã ramo.

19Pe’úta so’o kyra peneryg̃uatã meve, ha pembo’yúta umi Che ajukava’ekue ruguykue peka’u peve.

20Ha Che pomohyg̃uatãta che mesápe, kavaju ariguakuéra ha mayma soldadokuéra ro’ógui, he’i pende Ruete.

21Ha che reko jajaipa amoĩta umi tetã apytépe, ha mayma tetã ohecháta mba’éichapa Che ambojovake ha ahavira umívape.

22Upe ára upéva guive Israel retã oikuaáta Che ha’eha Jahve, pe Yvága Atykuéra Jára.

23Opaite tetã oikuaáta Israel ojegueraha hague jepokuapyhápe hembiapo vaieta rupi, ha opu’ãgui cherehe, Che añomi hague ichuguikuéra che rova, ha amoĩ hague ichupekuéra hese ija’e’ỹva poguýpe, omano hag̃ua ikyse puku rupi.

24Amyengovia ichupekuéra heko ñaña ha hembiapo vai ojerure háicha, ha upévagui añomi ichuguikuéra che rova.

25Ko’ág̃a katu Che amopu’ã jevýta Jacóbope, ha aiporiahuvereko jevýta Israel retãme, cherakate’ỹgui che reraguasu rehe, he’i pende Ruete.

26Ha’ekuéra hesaraipáta pe ñemotĩ ohasava’ekue chemboyke haguére. Che ambyaty ha aguerupa jevýta ijyvyteépe ha oiko jevýta py’aguapýpe hetãteépe, uperire avave nomondyimo’ãvéima ichupekuéra.

27Aguenohẽ vove Israelguakuérape umi tetã apytégui, ha ambyatývo ichupekuéra hesekuéra ija’e’ỹva retãgui, upépe ae ahechaukáta che reko porãha heta tetã resa renondépe.

28Ha oikuaáta hikuái Che ha’eha Yvága Atykuéra Jára, Che voi amosarambiva’ekue ichupekuéra tetãnguéra apytépe ha Che voi ambyaty jevýta ichupekuéra ijyvyteépe ha ichuguikuéra ndahejamo’ãi avavépe tetã ambuépe.

29Ha nañomimo’ãvéima che rova ichuguikuéra; añohẽta uvei che Pytu Porãitéva Israel retã ári, he’i Jahve, Yvága Atykuéra Jára.