2 Pédro 1 - Biblia en Guaraní - ?anderuete ?e’? Por? 2015

Ñemomaitei

1Che, Simon Pédro, Hesu Crísto rembiguái ha apóstol, ahai ko kuatiañe’ẽ kóva umi ohupityva’ekuépe orendive ko jerovia iporãitéva, Ñanderuete justícia ha Hesu Crísto salvacion rupi.

2Iporiahuvereko ha ipy’aguapy tapenemyenyhẽve pehóvo peikuaa porãve hag̃ua Ñanderuetépe ha Ñandejára Hesu Crístope.

Ñanderuete ra’ykuéra ha rajykuéra reko pyahu

3Hesu Crísto pu’aka rupi oñeme’ẽmba ñandéve opaite mba’e ñaikotevẽva guive jaikove ha jajerovia hag̃ua hekópe Ñanderuete rehe. Ha’e ñanerenoiva’ekue heko jajaipa ha ipu’aka rupi.

4Péva rupi oñeme’ẽ ñandéve umi promésa iporãitéva ha ituichaitéva, peẽ pepoi hag̃ua yvyarigua rete rembipota vaígui, ombyaíva yvy ariguakuéra rekove, ha peñemomba’e hag̃ua Hesu Crísto reko porã rehe.

5Upévare peñemokyre’ỹ pembojoapy hag̃ua pende jerovia rehe teko porã, pende reko porã rehe kuaapy arandu,

6pende kuaapy arandu rehe jejokokuaa, pende jejokokuaa rehe paciéncia, penepaciéncia rehe ñemomirĩ (jejapo’i),

7pene ñemomirĩ rehe hermáno mborayhu, pene hermáno mborayhu rehe Ñanderuete mborayhu añeteguáva.

8Ko’ã mba’e ko’ãva oĩ ramo pendepype ha okakuaave ramo ohóvo pende rekovépe, peẽ ndapeiko reimo’ãi ha ndapeikuaa reimo’ãi Hesu Crístope, ha pende rekovépe hi’áta katuete pe Pytu Porãmbáva yva.

9Upe oguereko’ỹva ko’ã mba’e katu hesatũ, ndahesapysói, hesaráigui oñemopotĩ hague hembiapo vaikuégui.

10Upévare, che hermanokuéra, peñeha’ã pepyta hatãve pehóvo ko teko pyahu Ñanderuete penerenói ha pendeporavo haguépe, pejapórõ ko’ã mba’e peẽ napeñepysãngamo’ãi araka’eve.

11Pejapórõ ko’ã mba’e Ñanderuete katuete penemog̃uahẽta Hesu Crísto, ñande Salvador retãguasu tapia g̃uarãme.

12Upévare che, Pédro, pomomandu’a jevy jey ko’ã mba’e rehe, peẽ peikuaa porã ramojepe: Pepyta hatãke Ñanderuete ñe’ẽ añeteguáva poguýpe.

13Che rembiapo voi ningo, pomombáy ha pomomandu’a jevy jey hag̃ua ko’ã mba’ére aikove aja gueteri.

14Aikuaa voi ningo ndaikomo’ãiháma areve ko yvy apére, Ñandejára Hesu Crísto oikuaauka haguéicha chéve.

15Upévare che añeha’ãmba aha ramog̃uarã, peẽ peñemomandu’a hag̃ua tapia ko’ã mba’e rehe.

Hesu Crísto reko

16Ore roikuaauka peẽme Hesu Crísto pu’aka ha ijeju jevy ndaha’éi ñe’ẽ gua’u rei, ore ningo hechaharete voi, ha rohecha ore resatee rupi heko jajái pu’aka.

17Ñandejára Ñanderuete voi ombotuichaite Hesu Crístope ha ome’ẽ avei ichupe heko jajaipágui he’i ramoguare ichupe: Kóva ningo che ra’y ahayhuetéva ha Che aguerohorýva, (Matéo 17,5).

18Ko ñe’ẽ kóva ore voi rohendu oñemboúvo yvágaguio, hendive roime ramoguare pe cérro Ha’e oiporavomava’ekuépe, (Matéo 17,1-9).

19Upéicha jaguereko avei umi proféta ñe’ẽ añeteguáva ha peẽ pejapo porã pejapysaka porã ramo avei hesekuéra; iñe’ẽnguéra ohesape porã ku tata rendy pytũnguýperõ guáicha osẽ meve pe mbyja ko’ẽ ohesape hag̃ua avei pende py’apýpe.

20Pehechakuaa porãke opaichagua proféta ñe’ẽ oñembohasava’ekue ñandéve Ñanderuete he’iukágui, ndaikatúi ñande jahecha jahechase háicha ha jaipota háicha.

21Umi proféta noñe’ẽiva’ekue ijeheguikuéra reínte, Pytu Porãmbáva omboguata háicha (ohaiuka háicha) uvei ichupekuéra.