1Ani ndepochy, rema’ẽ jave iñañáva rehe ha ani reipota iñañáva po’a.
2Pya’e oñekytĩmba ku ñanáicha, ha kapi’i hovy asývaicha ipirupáta hikuái avei.
3Ejerovia katu Ñanderuete rehe, ha ejapo mba’eporã, epyta ne retãme ha eñeha’ãmba reiko porã hag̃ua.
4Evy’aite Ñanderuete ndive, Ha’e tome’ẽ ndéve nde py’apy ojeruréva.
5Emoĩna Ñanderuete pópe nde rekove rape, Ha’e nemboguata porã hag̃ua; ha hesénte ejerovia, Ha’e oñangareko porã hag̃ua nderehe.
6Nde justícia katu omimbi kuarahýicha ha nde reko potĩ ku ára asaje pytéicha.
7Ekirirĩ Ñanderuete renondépe, ha ejerovia hese. Ani ndepochýtei rehecha ramo iñanáva rapére oĩ po’a poty.
8Epoi nde pochýgui, ha emboyke nde py’aro, ani reheja nde pochy rendy ndereraha tape vaíre.
9Umi iñañáva oñehundipava’erã, ha umi ojeroviávape Ñanderuete rehe oñeme’ẽta ko yvy imba’etee ramo.
10Ndahi’aremo’ãvéima ha umi iñañáva ndoikomo’ãvéi, ha rema’ẽ jevy ramo ha’ekuéra oiko haguépe ndaiporimo’ãvéima avave.
11Umi oñemomirĩvape oñeme’ẽta ko yvy imba’erã ramo ha ovy’aitéta ohasa porãtaháre.
12Umi iñañáva ojepy’amongeta mba’evai rehe ojapo hag̃ua heko potĩva rehe ha omopururũ hese hãinguéra.
13Ñandruete katu opukáta hesekuéra, oikuaa porãgui hi’ára paha og̃uahẽtaha.
14Umi iñañáva oguenohẽma ikyse puku hyrúgui ha oipysóma iguyrapa sã opoi hag̃ua ihu’y imboriahúvare, ojuka hag̃ua umi oñemomirĩvape ha hekopotĩvape.
15Ikyse puku katu ojasurúta ipy’atee rehe, ha iguyrapakuéra oñemopẽmbáta.
16Hekopotĩva mba’e pokãmi reheve iporãve, umi mba’eita iñañáva oguerekóvagui.
17Oñemopẽmbáta umi iñañáva jyva, ha umi hekopotĩva rehe Ñanderuete oñangarekohína.
18Ñanderuete oikuaa umi heko potĩva arakuéra, ha imba’eitéva noñehundimo’ãi araka’eve.
19Umía notĩmo’ãi og̃uahẽ vove pe ára vaiete, ha umi ñembyahyiha árape hyg̃uatãmbava’erã hikuái.
20Ha umi iñañáva katu omanombava’erã ha umi Ñanderuete rehe ija’e’ỹva ku tatatĩcha oñemosarambipáta, ku kapi’i piru okái ramoguáicha opa reíta hikuái.
21Pe iñañáva omba’eporu ha nomyengoviái, pe heko potĩva katu oiporiahuvereko ha ome’ẽ jopói.
22Ñanderuete ome’ẽta ko yvy Ha’e ohovasávape imba’eteerã ramo, ha umi Ha’e omaldecíva katu oñehundipáta.
23Ñanderueténte omboguata porãkuaa yvyariguakuérape, oguata ramo hape porãre.
24Ha’e oñepysãnga ramojepe ndo’apamo’ãi, Ñanderuete ojokótare ichupe ipógui.
25Che mitãrusu ára guive chetuja peve ndahechái pe hekopotĩva ojeheja reírõ ha iñemoñarenguéra ndojeruréi hapichápe hembi’urãre.
26Opaite árape ha’e ipy’a porãgui oiporuka ha ome’ẽ jopói, ha iñemoñarenguéra rupi ojehovasáta hapichakuérape.
27Eñemboykéna mba’evaígui, ha ejapo mba’eporã, ha reikovéta tapia g̃uarã.
28Ñanderuete ohayhúgui pe justícia, Ha’e ndopoimo’ãi heko potĩvagui. Tapia g̃uarã Ñanderuete oñangarekóta hesekuéra. Umi iñañáva ñemoñarenguéra katu oñehundipava’erã.
29Umi ipotĩva katu opytáta hetãme, ha oikovéta opaite árape ijyvyetépe.
30Heko potĩva juru oñe’ẽ arandu reheve, ha ikũ oñe’ẽ heko peguáva.
31Ñanderuete ñe’ẽ oĩ ipy’apýpe, upévare ndaipysyrymo’ãi araka’eve.
32Pe iñañáva omangea heko potĩvare, ha oñeha’ãmba ojuka hag̃ua ichupe.
33Ñanderuete ndohejamo’ãi ha’e ho’a, ni oñecondena hag̃ua ichupe mbojovakehára renondépe.
34Eha’ãrõke Ñanderuetépe, ha eiko hape rehe, Ha’e nemopu’ãta ome’ẽ hag̃ua ndéve ko yvy ne mba’erã ramo, nde katu rehecháta umi iñañáva oñehundiveha ohóvo.
35Che ahecha peteĩ iñañávape oñembotuichaitereíva, ha’e oñemyasãi ku yvyraguasúicha,
36uperire katu ahasa jevy upérupi, ha péina ápe noĩvéima, aheka ichupe ha ndajohuvéi ichupe.
37Ejesarekomína heko potĩva rehe, ha ema’ẽmi heko jojáva rehe, ipahaitépe oĩ py’aguapy añeteguáva kuimba’e heko potĩva ndive.
38Opaite iñañáva katuete oñehundíta, iñañáva ñemoñare opa reíta avei.
39Ñanderuete oipytyvõ heko potĩvape, ha Ha’e oñangarekóta hesekuéra ojejopy vai jave.
40Ñanderuete oipytyvõ ha oguenohẽ ichupekuéra ijejopy vaígui, ha’ekuéra ojerovia haguére hese.
Who We AreWhat We EelieveWhat We Do
2025 by iamachristian.org,Inc All rights reserved.
