1Ha fariseokuéra ha kuatia haihára Jerusaléngui oúva oñemboja hendápe.
2Ha ha’ekuéra ohecha Hesu remimbo’ekuéra ho’uha pan ipo ky’a reheve, ojepohéi’ỹre.
3 Fariseokuéra ha opaite Judeaygua ningo ojepokuaa yma guive, ndokarúi ojepohéi’ỹre heta jevy.
4Ha ojevy ramo mercádogui, ndokarúi ndojepohéiri ramo, ha oime heta ko’ã mba’e ojejapova’erãva hekópe, ojoheiva’erã avei umi váso, kambuchi, járro ha hupakuéra.
5Ha oporandu ichupe umi fariséo ha kuatia haihára: Mba’érehe piko ne remimbo’ekuéra ndoikói yma ojepokuaa háicha, ha okaru ojohei’ỹ rehe ipokuéra.
6Hesu katu ombohovái ichupekuéra: Pende rova mokõi; Isaías voi oprofetiza porãva’ekue penderehe, he’ívo penderova mokõiha, péicha ojehai voiva’ekue: Ko tetã kóva ningo ijurúpente chemomba’eguasu, ipy’apy katu imombyry chehegui.
7Ha chemomba’eguasu rei, peporombo’évo kuimba’e ñe’ẽ ha hembiapoukapykuéra (Isaías 29,13).
8Peẽ pemboyke Ñanderuete rembiapoukapy pembo’e hag̃ua kuimba’e ha kuña jepokuaakuéra.
9Ha Hesu he’i avei ichupekuéra: Peẽ pepoi Ñanderuete rembiapoukapykuéragui, pejapouka hag̃ua pende yvyarigua jepokuaakuéra.
10Moises ningo he’imava’ekue: Emboete nde ru ha nde sýpe, ha upe oñe’ẽvaíva itúva térã isýre, ojejukava’erã (Éxodo 20,17).
11Peẽ katu peje: Peteĩ kuimba’e he’ikuaa itúva térã isýpe: Corban (he’ise che ame’ẽmba Ñanderuetépe umi mba’éva ame’ẽ rãngue peẽme).
12Ha pemoañete: Natekotevẽvéi ojejapo itúva ha isy rehe mba’eve iporãva.
13Ha napemomba’evéi Ñanderuete ñe’ẽ pende jepokuaa ymaguare rehehápe, ha heta mba’e peichagua pejapo.
Ñande yvyarigua reko iñañaha14Ha oñembyatyuka rire umi genteitápe Ha’e he’i ichupekuéra: Pecherendúke ha peikuaáke,
15ndaipóri mba’eve okáguio oikéva kuimba’e ryepýpe ikatúva omongy’a ichupe, pe osẽva kuimba’e py’apýgui uvei omongy’a ichupe.
16Ijapysáva ohendu hag̃ua, tohendu.
17Ha Hesu oike rire peteĩ ógape, hemimbo’ekuéra oporandu ichupe pe ñe’ẽ mbojojaha rehe,
18ha Ha’e he’i ichupekuéra: Peẽ piko napeneakã porãi avei. Ndapeikuaái piko pe mba’e okáguio oikéva kuimba’e ryepýpe ndaikatuiha omongy’a ichupe.
19Ndoikéigui ipy’apýpe, hyépente katu, ha upégui osẽ jevy báñope, oñemopotĩvo.
20Péicha he’i opaichagua tembi’u ipotĩha. He’i avei: Umi ñe’ẽ osẽva kuimba’e jurúgui upéva omongy’a ichupe.
21Kuimba’e py’apýgui ningo osẽ pe pensamiénto vai: Mendare mbyairã, monda, porojuka, ñemoakãratĩ,
22takate’ỹ, ñaña, porombotavy, ñe’ẽ rei hapicháre, envídia, ñe’ẽvai, jererovu, tarova,
23opaite ko’ã mba’evai osẽ ñande py’apýgui, ha omongy’a ñande reko.
24Opu’ãvo upégui Hesu oho Tíro retã gotýo, ha oike peteĩ ógape, ndoipotáigui avave oikuaa, peichavéramo jepe ndaikatúi oñemi.
25Peteĩ kuñakarai membykuñami ningo opytáva mba’epochy poguýpe, ohendúvo Hesu oĩha upépe ou ojeity ipy renondépe.
26Pe kuñakarai ningo peteĩ Sirofeniciaygua oñe’ẽva Greciaygua ñe’ẽme, ha’e ojerure asy ichupe omosẽ hag̃ua pe mba’epochýpe imembykuñágui.
27Ha Hesu he’i ichupe: Eheja raẽ tahyg̃uatã umi ta’ýra, naiporãigui ta’ýra pan ojeity jagua’ikuérape.
28Pe kuñakarai katu ombohovái ichupe: Upéicha ningo, nde karai, upévare jagua’ikuéra jepeve ho’u pan ku’i umi mitã oitýva mesa guýpe.
29Ha Hesu he’i ichupe: Pe eréva rehe tereho, pe mba’epochy osẽma ne membykuñágui nde rejeroviaitégui.
30Ha og̃uahẽvo hógape, ojohu pe mitãkuña oñeno hupápe, ha pe mba’epochy osẽma ichugui.
31Upéi Hesu oho jevy Tíro retãgui, ha ohasa Sidon rupi og̃uahẽ hag̃ua Galiléa yguasúpe, upéi ohasa Decápolis rupi.
32Ha ogueraha hikuái Hesu rendápe peteĩ ohendu’ỹva ha oñe’ẽ’ỹva, ha ojerure asy ichupe omoĩ hag̃ua ipo hi’ári.
33Ha Hesu omomombyry ichupe umi oñembyatýva atýgui, omoĩ ikuã ijapysápe, ha omyakỹ ikũ hendýpe.
34Ha upéi ohupi hesa yvága gotýo, hi’ãho, ha he’i: Efáta, he’iséva, ejepe’a.
35Ha upevovete ojepe’a ijapysa, ikũsã oso, ha oñe’ẽ syryry porã.
36Ha he’i ichupe ani hag̃ua omombe’u avavépe; Hesu he’ivérõ jepe, ha’ekuéra omombe’u guasuve ohóvo mamo ohoha rupi.
37Ohecharamoite hikuái umi mba’e oikóva he’i hikuái: Ojapo porãmbaite ningo Ha’e: Ohenduka ijapysa’ỹvape, ha omoñe’ẽ iñe’ẽngúvape.
Who We AreWhat We EelieveWhat We Do
2025 by iamachristian.org,Inc All rights reserved.
