1Upémaramo Ñanderuete ombohovái Jóbpe peteĩ yvytu jepoka guive, ha he’i:
2Máva piko pe omoypytũva yvága Jára rape iñe’ẽ tavy rupi.
3Ko’ág̃a nde, Job, ejeku’akua kuimba’e ipy’aguasúvaicha, Che aporandúta ndéve, ha nde chembo’éta.
4Moõ piko nde reiméra’e Che ajapo ramoguare ko yvy. Ehechaukána chéve nde nearanduha.
5Mávapa oha’ãra’e ko yvy tuichakue, térã mávapa oipyso hi’ári imétro oha’ãmba hag̃ua ipukukue. Reikuaa piko ko’ã mba’e.
6Mba’e áripa oguapy ko yvy, térã mávapa omoĩra’e ipyenda tenondeguáva.
7Umi mbyja ko’ẽtĩ megua omoherakuã porã hembiapo techapyrãva ha ovy’a joa Ñanderuete ra’ykuéra (angelkuéra).
8Máva piko omboguapýra’e umi okẽguasu yguasúpe g̃uarã, osẽ ramoguare yvy ryepýgui,
9Che amoĩ ramoguare arai atyguasu ijaorã ramo ha tatatĩna ipáñal ramo (mitã liaha ramo).
10Che voi amoĩ pe y rembe’y ha amohenda hokẽguasu iñembotyha reheve,
11ha ha’e: Apevénte reg̃uahẽta, ha águive nderehasamo’ãvéi ha ápe ajokóta pe y pochy.
12Reikove aja piko nde ere iko’ẽ jevy hag̃ua, rehechauka piko ko’ẽtĩme hendag̃ua,
13oñuãmba hag̃ua yvy rembe’y, ha upépe umi iñañáva ojetyvyro hag̃ua okañyhágui.
14Ko’ẽtĩme ojehecha porãkuaa pe yvy ape ku ta’ãngáicha ojejopýva tujúpe ha opytáta ku ao jeguapávaicha.
15Umi iñañávagui katu ojepe’áta hesape ha hekove, ha umi ohupíva ipo oñemoĩ hag̃ua cherehe oñehundipáta.
16Nde, Job, reg̃uahẽ piko yguasu rapo peve, ha rehómapa reipyguara hag̃ua pe y rugua pypuku.
17Ojehechauka piko ndéve pe mano rokẽ, ha ojepe’a piko mano retã rokẽnguéra ne renondépe.
18Reikuaa piko ko yvy tuichakue, ipekue ha ipukukue. Eréna chéve reikuaa piko opaite ko’ã mba’e (ha’éva ndéve).
19Moõrupípa ohasa pe tape ohóva pe tesape rendag̃ua, ha moõ piko opyta pe pytũ rendag̃ua.
20Regueraha hag̃ua umía hendag̃uáme, reikuaa porã piko hóga rape.
21Añete ningo nde reikuaapa voi umi mba’e, ymaitereíma nde reju ko yvy apére ha nde rekove ára ndojepapakuaavéima hetaitereígui.
22Reg̃uahẽ piko ama rayvi rypy’a oñeñongatuha apytépe, térãpa rehecháma piko pe amandáu oñeñongatuhápe.
23Péva Che añongatúma pe jehasa asyguasu árape g̃uarã, ha umi ñorãirõguasu árape g̃uarã.
24Moõpa oĩ pe tape pe tesape oñemboja’ohápe ha moõpa oñemosarambi pe yvytu yvy apére oúva kuarahyresẽguio.
25Mávapa ojo’o pe tape amaguasúpe g̃uarã ha mávapa ombosako’i pe tape aratiri ha arasunúme g̃uarã.
26Ha mávapa omongy pe yvy perõme, tetãyguakuéra oiko’ỹháme,
27omohu’ũ porã hag̃ua pe yvy perõme ha omoheñói hag̃ua kapi’i.
28Pe ama piko itúva, ha mávapa omoheñói pe ysapy.
29Mba’eichagua tyéguipa osẽ ro’y rypy’a. Mávapa omoheñóira’e pe ama rayvi rypy’a.
30Máva piko omohatã pe y itáicha ha pe ysyry ape (ojeguatakuaa hag̃ua hi’ári).
31Ikatúnepa reñapytĩ mbyjakuéra térãpa rejoránepa umi mbyja, hérava Orion.
32Reguenohẽnepa nde umi mbyja aty ra’ãnga hi’araitépe, térã reisãmbyhýnepa pe mbyja atyguasu (osoguasu) imembykuéra reheve.
33Reikuaa piko mba’éichapa oñesãmbyhy yvagakuéra ha reisãmbyhykuaáne piko ko yvy tuichakue.
34Reñe’ẽ hatãnepa araikuérape oñohẽ hag̃ua nde ári hi’yeta.
35Ikatu piko nde ere umi aratirípe ou hag̃ua. Ha upéi he’ínepa ndéve: Péina ápe roĩ.
36Máva piko omoarandu karáũme ha mávapa ombokatupyry gállope.
37Máva piko iñarandu oipapakuaa hag̃ua arai atykuéra. Ha mávapa oñohẽ umi kambuchi ára pegua.
38Araka’épa pe yvy oñemohatã jevy ha umi yvy pehẽngue oja ojuehe.
39Remog̃uahẽkuaa piko leõ jurúpe hembi’urã ha remohyg̃uatãkuaa piko leõ ra’ykuérape iñembyahýi ramo,
40oguapy jave ikuápe térã omangea jave ñanandýpe.
41Máva piko ombosako’i yryvu rembi’urã, ita’yrakuéra ojerure asýrõ Ijapoharépe, ituvakuéra oiko reirei jave árupi pérupi hembi’urã rekávo.
Who We AreWhat We EelieveWhat We Do
2025 by iamachristian.org,Inc All rights reserved.
