Hebreoyguakuérape 10 - Biblia en Guaraní - ?anderuete ?e’? Por? 2015

1Moises rembiapoukapy ojoguánte umi mba’e porãitévape oĩva gueteri yvágape, ndoguerekói katu ipype yvága reko añeteguáva. Upévare Moises rembiapoukapykuéra ndaikatúi omboheko porã tapia g̃uarã umi oikóvape ipoguýpe, ojegueru jevy jeyva’erã katu peichagua kuave’ẽmby cáda áño.

2Upéicharire natekotevẽiva’erãmo’ã ha’ekuéra oikuave’ẽ ipotĩguima opytávo, upéicharõ natekotevẽvéi avei ojepy’apyve hembiapo vai rehe,

3oiko uvei cáda áñope mandu’a hi’angaipa rehe.

4 Tóro térã ovecha, térã kavara mácho ruguy ndaikatúi voi oipe’a kuimba’e ha kuña rembiapo vai.

5Upévare Hesu Crísto he’i avei Ñanderuetépe, og̃uahẽvo ko yvy ape ári: Ndereipotái tymba kuave’ẽmby, ni kuave’ẽmby tembi’u rehegua, Nde katu rembosako’i che rete (oñekuave’ẽ hag̃ua, Salmokuéra 40, 7-9).

6Tymba kuave’ẽmby ojehapypáva ha kuave’ẽmby angaipa reheguáva nanembovy’amo’ãi (Ñanderuetépe).

7Upéramo Che ha’e: Péina ajúma, nde kuatiañe’ẽ porãme he’íma voi che ajutaha ajapo hag̃ua Nde, che Ruete rembipota.

8Ñepyrũme Hesu he’i voi: Tymba kuave’ẽmby jukapyre ha kuave’ẽmby tembi’u rehegua, kuave’ẽmby ojehapypáva ha kuave’ẽmby angaipa reheguáva Nde ndereipotái, ni nanembovy’ái, oñekuave’ẽ ramojepe ko’ã kuave’ẽmby Moises rembiapoukapy he’i háicha.

9Upémaramo he’i avei: Péina ningo aju ajapo hag̃ua Ñanderuete rembipota, péva he’ise aipe’a hag̃ua umi kuave’ẽmby tenonde peguáva oñemoĩ hag̃ua hendaguépe kuave’ẽmby ipaha peguáva ha ojapopaitéva, (Juan 4,33-34).

10Upéichamante Ñanderuete rembipota rupi ñande ñañemopotĩ tapia g̃uarã Hesu Crísto kuave’ẽmby rupi, Ha’e oñohẽ ramoguare huguy peteĩ jevy opytáma tapia g̃uarã.

11Ha opaite pa’i Israel pegua omba’apo opaite árape oikuave’ẽ hag̃ua umi kuave’ẽmby ndaikatúiva araka’eve oipe’apa tetãyguakuéra rembiapo vai (Éxodo 29,38).

12Hesu Crísto katu oñekuave’ẽ voi peteĩ jevýnte oipe’a hag̃ua tetãyguakuéra angaipa, ha ko’ág̃a oguapyhína Ñanderuete akatúape,

13ha oha’ãrõ umi hese ija’e’ỹvape oñemoĩmba peve ipy guýpe.

14Peteĩ kuave’ẽmby rupínte Hesu Crísto omog̃uahẽta yvágape umi oñemomirĩva ipoguýpe.

15Ha pe Pytu Porãmbáva oikuaauka voi ñandéve Ha’e he’i ramo:

16Kóva ningo pe ñembopy’apeteĩ (jekupyty) ajapótava hendivekuéra umi ára umíva rire: Che amoingéta che rembiapoukapy ipy’apýpe ha ahaíta che ñe’ẽ hi’ángape (Jeremías 31,33-34).

17Añetehápe nachemandu’amo’ãvéima hi’angaipakuéra rehe ni hembiapo vaikuéra rehe.

18Ha upéicha rupi oñeperdona riréma hi’angaipakuéra, natekotevẽvéima ambue kuave’ẽmby rehe.

19Upévare, che hermanokuéra, ko’ág̃a jaikekuaa pe kotyguasúpe oñemboykémava Ñanderuete ha pa’iguasúpe g̃uarã Hesu Crísto ruguy rupi, (péva he’ise yvágape).

20Hesu Crísto ombosako’i ñandéve g̃uarã peteĩ tape pyahu ha oikovéva rehegua Ha’e omondoro ramoguare pe aosãingo (cortína) oĩva pe kotyguasu renondépe, oñemboykéva Ñanderuete ha pa’iguasúpe g̃uarã, Ha’e oikuave’ẽ hag̃ua ñandéve g̃uarã hekovetee.

21Upéicha Hesu Crísto opyta ñande pa’iguasu ramo Ñanderuete rogaguasúpe (ijiglésiape).

22Upévare ñañemboja Ñanderuete rendápe py’a porã ha jerovia mbaretépe, Ha’e omopotĩ hag̃ua ñane ñe’ã ñande py’apyñe’e vaígui ha ojohéi rire ñande rete y potĩetépe.

23Jaiko mbaretépe ñande jeroviápe ñamyi’ỹre, Ñanderuete katuete ojapopava’erã he’imava’ekue guive,

24upévare ñañeha’ãmba ñañomokyre’ỹ ha jajohayhu hag̃ua, jajapove jahávo tembiapo porã.

25Ani hag̃ua japoi ñande iglésiagui, oĩ háicha umi ojapóva, ñañomokyre’ỹ uvei, pehechámagui oñemoag̃uiha ohóvo pe ára Hesu Crísto ou jevy hag̃ua.

Anive peiko angaipa poguýpe

26Ñande ñañemohembiapo vaisete ramo jaguata aja pe tape añeteguávare, upéicharõ ndaiporivéima ambue kuave’ẽmby (sacrifício) oipe’akuaáva ñane rembiapo vai,

27umía oha’ãrõva’erã kyhyjepópe pe ñembojovake ohundiva’erãva ichupekuéra tata rendýpe.

28Oimeraẽ omboykéva Moises rembiapoukapy ha naiñe’ẽrendúiva ojejukava’erã ojeporiahuvereko’ỹre, oñehendu rire mokõi térã mbohapy techaharépe.

29Katuete ipohyive pe jehavira upe opyrũvape g̃uarã Ñanderuete Ra’y rehe ha oguerekóva mba’e rei ramo Hesu Crísto ruguy ha pe ñembopy’apeteĩ pyahu ruguy, omotĩvo pe Pytu Oiporiahuverekóvape, pe omopotĩmava’ekue ichupe.

30Jaikuaa voi ningo Ñanderuete he’i hague: Che aporovenga, ha Che ahepyme’ẽta. Ha he’ive: Ñanderuete voi ombojovakéta hetãyguakuérape (Deuteronómio 32,35-36).

31Oñemondyieteva’erã upe ho’áva Ñanderuete oikovéva pópe.

32Penemandu’áke umi ára tenondeguare rehe, peñepyrũ ramoguare pejerovia Hesu Crísto rehe, mba’éichapa peẽ peropu’aka porã pende jehasa asy paciéncia reheve.

33Pejeja’o peẽ, pehasa asy ambuekuéra renondépe ha pemoirũva’ekue avei umi ohasa asývape.

34Peẽ peiporiahuvereko umi oikóva cárcelpe, ha vy’apópe peheja ojepe’a pene mba’eteéva, peikuaágui peẽ peguerekoha pene mba’e iporãvéva ha opytáva tapia g̃uarã (yvágape).

35Anítei peñemokangy pende jeroviápe, péva rupi oñeme’ẽ peẽme mba’e ndetuicháva.

36Peikotevẽ paciéncia rehe, pejapo hag̃ua Ñanderuete rembipota ha pehupity hag̃ua Ha’e oprometemava’ekue peẽme.

37Ñanderuete kuatiañe’ẽme he’i: Pya’e oúta pe ouva’erãva, ndahi’aremo’ãvéima, (Habacuc 2,3).

38Pe heko potĩva chemba’éva, oikovéta ijerovia rupi; ha’e oguevi ramo katu nombovy’amo’ãi che ángape (Habacuc 2,4; Romayguakuérape 1,17).

39Ñande katu ndajapiaiva’erã pe tapégui ani hag̃ua ñañehundi, jajerovia katu jajesalva hag̃ua ha jahupity hag̃ua pe tekove tapia g̃uarãva.