Salmokuéra 51 - Biblia en Guaraní - ?anderuete ?e’? Por? 2015

David purahéi, oñemoangaipa rire Betsabe ndive

1Cheporiahuverekomína, Nde, che Ruete, ndepy’a porã ningo, nde poriahuvereko tuicha rupi eipe’amína che rembiapo vaikue chehegui.

2Chejohéi che ñaña rekógui, ha chemopotĩ che rembiapo vaígui.

3Che ahecha porã ajavy hague, ha che rembiapo vai tapiaite oĩ che resa renondépe.

4Nderehénte che añemoangaipa, ha ajapo ivaíva nde resakuéra renondépe, ne ñe’ẽ rupi ojekuaa porã Nde rembojovake porã hague ha nde jurúgui osẽva heko pegua memete.

5Aikuaa porã ningo, che aikove guive pe ivaíva oĩ chepype, ha che asẽ guive che sy ryégui che reko iky’aha voi.

6Péina ápe, Nde rehayhu pe hekoite pegua osẽva yvyarigua py’apýgui, upévare cherekombo’e porã ha rehechauka chéve ne arandu.

7Chejohéi pacholípe (plánta), chepotĩ hag̃ua, upéi chemorotĩvéta ama rayvi rypy’águi (térã mandyjúgui).

8Tañandu jevy vy’a ha tory, horypa jevy hag̃ua che kanguekuéra Nde remyangekõiva’ekue.

9Eñomi nde rova che rembiapo vaígui ha emboguepa che ñaña reko.

10Ejapomína chepype Nde, che Ruete, peteĩ py’a ipotĩva, ha embopyahu chepype peteĩ pytu imbaretéva.

11Aníkena chemosẽtei ne renondégui, ha ani reipe’átei chehegui nde Pytu Porãmbáva.

12Embou jevýna chéve ne ñepytyvõ rehegua vy’a, ha pe Pytu Porãmbáva toñangareko cherehe.

13Upéicharamo ahekombo’éta nde rape rehe umi ojejavývape, ha umi hembiapo vaíva ojevy hag̃ua ne rendápe.

14Nde, che Ruete, chepe’amína pe tuguy añohẽ rei haguére, ha upéi che juru tomombe’u porã jevy nde justícia.

15Nde, che Ruete, chembojurupe’amína romomba’eguasu jevy hag̃ua.

16Ndereipotáigui ovecha ruguy che ame’ẽkuaáva, ndereipotái kuave’ẽmby ojehapypáva.

17Pe kuave’ẽmby Nde, che Ruete, rehayhuvéva ningo pe yvyarigua toñembyasyete ojapo vai haguére ne renondépe (ha rehechase) peteĩ pytu ojekáva, peteĩ py’a oñemomirĩva ne renondépe, pévante Nde reha’ãrõreína yvyariguakuéragui.

18Ndepy’a porãgui rejapo mba’eporã Jerusalen rehe, emopu’ã jevýna Jerusalen korapyjere yvate.

19Upéicharamo reguerohorýta umi kuave’ẽmby justícia reheguáva ha umi tymba oñekuave’ẽva ndéve ha umi kuave’ẽmby ojehapypáva; uperirémante oikuave’ẽ jevýta tóro ra’yrusu ne kuave’ẽmby renda ári.