2 Crónicas 4 - Biblia en Guaraní - ?anderuete ?e’? Por? 2015

Ñanderuete rogaguasu rembiporukuéra

1Salomon ojapouka avei peteĩ kuave’ẽmby renda bronceguiguáva ipukúva 8,75 métro, ipy 8,75 métro, ha 4,375 métro ijyvatekue.

2Ojapouka avei peteĩ tachoguasuete mba’e ykupyrégui, peteĩ hembe’ýgui ambue hembe’y peve oha’ã 4,375 métro, ijapu’aite; ijyvatekue 2,18 métro ha peteĩ sã ipukúva oñembojáva ijerekue rehe oha’ã 13,12 métro.

3Ha pe tachoguasu jerekuévo oĩ yva ra’ãnga, 10 yva oĩ 43,75 centímetro pukukuépe ha oĩ mokõi hysýi hy’akuéra mba’e ykupyrégui pe tachoguasuete rehe.

4Pe tachoguasuete oguapy 12 tóro rumby ári, mbohapy oma’ẽ yvate gotýo, mbohapy kuarahyreike gotýo, mbohapy yvy gotýo ha mbohapy kuarahyresẽ gotýo, ha umi tóro rumbykuéra oĩ hyepy gotýo.

5Ha pe tachoguasuete iñanambusu 7,6 centímetro ha hembe’y ojogua lírio (yvoty) rembe’ýpe. Ha ija ipype 66.000 lítro y (1 Réyes 7,26).

6Ojapo avei ambue 10 tácho, ha omoĩ 5 akatúa gotýo ha umi ambue 5 asu gotýo, ojejohéi ha oñemopotĩ hag̃ua ipype umi kuave’ẽmby ojehapypátava; ha pe tachoguasuete pa’ikuéra oiporu oñemopotỹ hag̃ua ipype.

7Ojapo avei 10 tataindyenda órogui, ha omoĩ Ñanderuete rogaguasúpe 5 akatúa gotýo ha 5 asu gotýo.

8Ojapo avei 10 mesa ha omoĩ Ñanderuete rogaguasúpe 5 akatúa gotýo ha 5 asu gotýo; upéicha avei ojapouka 100 vasoguasu oroguiguáva.

9Ojapo avei pa’i korapy ha pe korapyguasuete, ha umi korapy rehe g̃uarãva okẽnguéra, ha umi okẽ oñu’ã bróncepe.

10Ha omohenda pe tachoguasuete Ñanderuete rogaguasu yke akatúa gotyoguápe, sur gotýo, kuarahyresẽ gotýomi.

11Hiram ojapo avei japepokuéra (ólla guasu), palakuéra ha vasoguasukuéra; ha Hiram ojapopa pe tembiapo tetã ruvicha Salomónpe, Ñanderuete rógape g̃uarã.

12Ojapova’ekue mokõi horconguasu ha isãnguéra iñakã jerekuévo, ha mokõi pyaha (red) oñu’ã mokõive horcon akã rehe.

13Omoĩ 400 granada’a (yva) ra’ãnga mokõive pyaha rehe, oñu’ã hag̃ua umi horcon akã.

14Ha’e ojapo avei 10 tachoguasu oguapýva icárro ári,

15ha peteĩ tachoguasuete oguapýva 12 tóro rumby ári.

16Ha japepokuéra, pála ha ty’ãinguéra (ganchokuéra), brónce porãgui ojapo Hiramabi mayma tembiporukuéra Salomónpe, Ñanderuete rógape g̃uarã.

17Tetã ruvicha omboykúkuri ko’ã mba’e Jordan yvypépe, pe ñay’ũ oĩháme, Sucot ha Seredáta pa’ũme.

18Ha Salomon ojapo hetaiterei ko’ã tembiporu, ndojepapái katu pe brónce pohyikue.

19Péicha Salomon ojapouka opaite tembiporukuéra Ñanderuete rogaguasúpe g̃uarã, ha pe kuave’ẽmby renda bronceguiguáva, ha umi mesa hi’ári oñemoĩ hag̃ua umi pan ojehechaukátava.

20Upéicha avei umi tataindyenda hataindy reheve ojapouka bróncegui, omyendy hag̃ua pe kotyguasu oñemboykéva pa’ikuérape g̃uarã, oĩva pe kotyguasu oñemboykéva Ñanderuete ha pa’iguasúpe g̃uarã renondépe, ha ojapopa hikuái oje’e haguéicha ichupekuéra.

21Umi yvoty, umi mba’e rendy, jetapakuéra ojejapo óro porãitégui.

22Umi tataindy inimbo kaipyre jetapa, umi ña’ẽ ohypýi hag̃ua, umi cuchára ha umi mba’e ryakuã porã oñemyatatĩha ojejapo avei óro porãgui. Ha órogui ojejapo avei Ñanderuete rogaguasu rokẽnguéra pe kotyguasu pegua oñemboykéva Ñanderuete ha pa’iguasúpe g̃uarã ha avei pe ambue kotyguasu pegua oñemboykéva pa’ikuérape g̃uarã.