Salmokuéra 92 - Biblia en Guaraní - ?anderuete ?e’? Por? 2015

Ñanderuete ñanemboguata porã - Purahéi jepytu’uha árape g̃uarã

1Mba’eporãite ningo romomba’eguasu ramo ndéve, ore Ruete, ha rogueropurahéi nde réra, Nde, ningo pe Jára Ijyvatetéva.

2Pyharevekuépe omombe’u nde poriahuvereko, ha pyharekuépe nde reko añeteguáva.

3Umi mbaraka 10 isãva, arpaguasu ha árpa michĩ púpe romomba’eguasúta.

4Ne rembiapokue rupi Nde chembovy’a, Nde, ore Ruete, nde po rembiapokue rehe avy’aite ha upévagui che romomba’eguasúta.

5Ituicha iterei ningo ne rembiapokue, Nde, ore Ruete, hypyete ningo umi nde py’apýpe heñóiva (pensamiénto).

6Pe ivýrova ningo ndoikuaaséi mba’eve ha itavýva ndohechakuaái ko’ã mba’e.

7Umi tekove ñaña heñói ramo jepe ñanáicha, ha ipotyjera joa ramojepe, umi tekove vaíva oñehundi hag̃uánte oiko.

8Nde katu, ore Ruete, pe Jára Ijyvatetéva, tapia g̃uarã Nde reikoreína.

9Upévare pema’ẽ porã umi oñemoĩva ore Ruete rehe oñehundíta ha umi mba’evai apoha oñemosarambipáta.

10Nde katu chemombarete mbaretevéta ku tóro hesaitévaicha, ha acéite ryakuã porãme añemona aikóvo.

11Ha che resakuéra oma’ẽta umi cherayhu’ỹva rehe (mba’éichapa oñehundi); ha che apysakuéra ohendúta umi cherehe opu’ãva’ekue (mba’éichapa omano).

12Pe heko potĩva katu ipotýta mbokajáicha ha okakuaáta ku cédro Líbano peguáicha.

13Umía oñeñotỹ Ñanderuete rogaguasúpe ha ikorapýpe ipoty joa hag̃ua.

14Ituja rire jepe hi’a porã, imbarete ha hovyũ asy,

15omombe’u hag̃ua Ñanderuete hekojojaha, ha ipype ndaiporiha hekopeguaỹva.