Josue 10 - Biblia en Guaraní - ?anderuete ?e’? Por? 2015

Ojejapo sarambi Amorguakuéragui

1Adonisedec, Jerusalen ruvicha, ohendúvo Josue ombopoguy hague Hái ha ombotapere hague avei, ha umi Gabaongua oiko porã hague Israelguakuéra ndive, ha oikokuaa hikuái hendivekuéra jekupytýpe,

2ou okyhyjeiterei; Gabaon peteĩ táva tuicha porãva tetã ruvicha tavakuéraicha ha ituichave Háigui, ha mayma ikuimba’e ikatupyry ñorãirõ rembiapópe.

3Upévagui Adonisedec, Jerusalen ruvicha omondo Hoham, Hebron ruvicha rendápe, ha Piream, Jarmut ruvicha rendápe, ha Jafia, Laquis ruvicha rendápe ha Debir, Eglon ruvicha rendápe, ha he’iuka ichupekuéra:

4Peju che rendápe chepytyvõ, ñarãirõ hag̃ua Gabaónpe, oikégui jekupytýpe Josue ha Israel ñemoñarenguéra ndive.

5Upéicha Amorgua retã ruvicha, pe Jerusalen ruvicha, Hebron ruvicha, Jarmut ruvicha, Laquis ruvicha ha Eglon ruvicha oñembyaty isoldádo aty ndive, Gabaon ypýpe ojeity hag̃ua hi’ári.

6Upéramo umi Gabaongua he’iuka Josuépe Gilgal rekohápe: Eipytyvõmi ne rembiguaikuérape; pya’e eju oresalva hag̃ua; mayma Amorgua ruvicha oikóva cérro rehe oñembyaty ojeity hag̃ua oreári.

7Ha Josue ojupi Gilgálgui, ikuimba’e ipy’aguasuvéva ha isoldádo aty reheve.

8Ha Ñanderuete he’i Josuépe: Ani rekyhyjétei ichuguikuéra, Che amoĩma ichupekuéra nde pópe, ha’ekuéra ndaipu’akamo’ãi nderehe.

9Ha Josue ikuimba’ekuéra ndive oguata pe pyhare pukukue aja Gilgal guive, ondyry hag̃ua umíva rehe, ha’ekuéra oha’ãrõ’ỹ hágui.

10Ha Ñanderuete omondýi Amorguakuérape Israel renondépe, ha ojuka hetápe Gabaónpe; ha omuña Amorguakuérape ojukapávo ojohúva guive Azeca ha Maqueda peve, Bethoron gotýo.

11Ha okañy hikuái ohóvo Israelguakuéragui, pe tape oguejýva Bethoróngui; Ñanderuete opoi avei amandáu hi’arikuéra Azeca peve, ha omano hetave hikuái amandáu rupi, Israel ñemoñarenguéra ojukava’ekuégui ikyse puku hãimbépe.

12Upéramo Josue oñembo’e Ñanderuetépe, Ha’e oity ramoguare Amorguakuérape Israel ñemoñarenguéra renondépe, ha he’i Israelguakuéra rovake: Kuarahy, epyta Gabaónpe, ha nde jasy Ajalon ñúme.

13Ha pe kuarahy ndoku’éi ha pe jasy opyta avei Israelguakuéra ohundipa peve hese ija’e’ỹvakuérape. Ko’ã mba’e ojehai heko potĩva kuatiañe’ẽme. Ha pe kuarahy opyta pe ára mbytépe, ha noñembopya’éi oike hag̃ua, haimete peteĩ ára pukukue.

14Péichagua ára ndaipóri upe mboyve ni uperire, Ñanderuete ojapo guive kuimba’e ha kuñakuéra; Ñanderuete ohendu koichagua kuimba’e ñe’ẽ Ha’e oñorãirõgui Israel rehehápe.

15Josue ha Israelguakuéra ojevy hekohápe, oĩva Gilgálpe.

16Ha umi 5 tetã ruvicha okañy Maquedápe peteĩ itakuaguasúpe.

17Ha oñemombe’u Josuépe ojejohu hague umi 5 tetã ruvicha okañyva’ekue peteĩ itakuaguasúpe, Maquedápe.

18Upémaramo Josue he’i: Pembyapajeréi ita tuicháva pe itakuaguasu juru renondépe, ha pemoĩ kuimba’ekuéra henondépe oñangareko hag̃ua hese;

19Ha peẽ ani pepyta rei, tapeho katu penderehe ija’e’ỹva rapykuéri, ha pejuka pehupitýva guivépe, ha anítei oike jevy itavakuérape; Ñanderuete, pende Jára, omoĩma ichupekuéra pende pópe.

20Ha Josue ha Israel ñemoñarenguéra ojapo sarambi ichuguikuéra ohundi peve ichupekuéra, umi hembymíva oike itáva korapy jere yvatépe.

21Ha mayma Israelgua ou jevy Josue rendápe, oĩva Maquedápe, ha’ekuéra hesãimba ha ndojehúi ichupekuéra mba’eve ivaíva, hese ija’e’ỹva oñemondyietereígui noñorãirõsevéi peve.

22Upéramo Josue he’i: Peipe’a pe itakuaguasu ñembotyha, ha peguenohẽ umi 5 táva ruvichakuérape.

23Ha oguenohẽ hikuái pe itakuaguasúgui umi táva ruvichápe: Jerusalen, Hebron, Jarmut, Laquis ha Eglon ruvicha.

24Ha ogueraha rire ichupekuéra Josue rendápe, ha’e ohenói mayma kuimba’e Israelguápe, ha he’i isoldádo ruvichakuérape oĩva hendive: Peñemboja ha pemoĩ pende py ko’ã táva ruvichakuéra ajúra ári. Ha ha’ekuéra oñemboja ha omoĩ ipykuéra ijajurakuéra ári.

25Ha Josue he’i ichupekuéra: Ani pekyhyjétei ha ani pendepy’andýi, peñemombaretéke ha pendepy’aguasúke, péicha Ñanderuete ojapóta opaite penderehe ija’e’ỹvare, oñemoĩva guive penderehe.

26Ha ã mba’e rire Josue ojukauka ichupekuéra, ha omosãingouka ichupekuéra 5 yvyra rehe; ha opyta hikuái sãingohápe umi yvyra rehe kuarahy oikepota peve.

27Ha pe kuarahy oikévo Josue omboguejyuka umi 5 mburuvicha retekue umi yvyrágui, ha omombouka umíape pe itakuaguasu okañy haguépe, ha omoĩ hikuái ita tuicháva pe itakuaguasu jurúpe, umíva oime gueteri ko ára kóva peve.

28Ha pe árape Josue omoĩ avei ipoguýpe Maquedápe, ha ojuka opaite itavayguakuérape kyse puku rãimbépe; ha ojapo Maqueda ruvicha rehe ojapo haguéicha Jerico ruvicha rehe.

29Ha Maquedágui, Josue ha mayma Israelgua, oho ojeity hag̃ua Libnayguakuéra ári.

30Ha Ñanderuete omoĩ avei Libna ha huvichápe Israel pópe; ha’ekuéra ojukapa avei ichupekuéra kyse puku hãimbépe ha ojapo hetã ruvicha rehe ojapo haguéicha Jerico ruvicha rehe.

31Upéi Josue ha mayma Israelgua ohasa Libnágui Laquíspe, opytáva ag̃uiete Libnágui, ondyry hag̃ua avei.

32Ha Ñanderuete omoĩ avei Laquis Israel pópe uperiregua árape, ha Israelguakuéra ojukapa avei kyse puku rãimbépe oikóvape guive ipype, ojapo haguéicha Libnápe.

33Upéramo Horam, Gézer ruvicha ou oipytyvõ hag̃ua Laquíspe. Josue ha isoldadokuéra katu ohundi ichupekuéra oheja’ỹre avavépe.

34Laquísgui Josue ha mayma Israelgua, ohasa Eglónpe, opytáva ag̃uiete Laquísgui, ha ojeity hikuái avei pe táva ári.

35Ha pe ára pévape omoĩ avei ipoguýpe, ha ojukapa hikuái Eglonguápe kyse puku rãimbépe, oikóvape guive ipype, ojapo haguéicha Laquíspe.

36Upéi Josue ha mayma Israelgua ojupi Eglóngui Hebrónpe ojeity hag̃ua avei umi tavaygua ári.

37Ha omoĩ rire ipoguýpe, ojukapa kyse puku rãimbépe hetã ruvicha ha opaite itavayguakuérape, oikóva guive ipype, oheja’ỹre avavépe; ojapo haguéicha Eglon rehe upéicha ojapo avei Hebron rehe.

38Upéi Josue mayma Israelgua ndive ojeity Debirguakuéra ári.

39Ha omoĩ ipoguýpe hetã ruvichápe ha opaite itava’ikuérape oĩva guive Debir jerekuévo, ha ojuka ichupekuéra kyse puku rãimbépe ohundipa peve, Hebron ha oheja’ỹre avavépe, ojapo haguéicha Libna rehe, péicha ojapo avei Debir ha hetã ruvicha rehe.

40Josue ojukauka opaite umi cérro rupi oikóvape, Negevgua, umi ñu ha cérro yke rupigua, ha opaite hetã ruvichakuérape, oheja’ỹre avave; opavavépe oikóva guive upérupi ojuka hikuái, Ñanderuete, Israel Jára, he’i haguéicha ichupekuéra.

41Upéicha Josue ojukapa Cades-Barnéa guive Gáza peve, ha Gosen yvy tuichakue javeve Gabaon peve.

42Mayma ko’ã tetã ruvicha ha hetãyguakuérape Josue omoĩ ipoguýpe peteĩ jevýpe; Ñanderuete, Israel Jára, oñorãirõgui Israel rehehápe.

43Ha Josue ha mayma Israelgua ou jevy hekohápe, oĩva Gilgálpe.