Deuteronómio 17 - Biblia en Guaraní - ?anderuete ?e’? Por? 2015

1Napeikuave’ẽiva’erã Ñanderuetépe g̃uarã kuave’ẽmby ramo tóro térã ovecha ra’yrusu ivaíva térã oguerekóva ijehe oimeraẽ mba’e ivaíva, péva ombopochyva’erã Ñanderuetépe.

2Ág̃a ojojohu ramo pende távape, Ñanderuete ome’ẽtava peẽme, peteĩ kuimba’e térã peteĩ kuña, ojapóva mba’evai Ñanderuete resa renondépe omboykévo iñe’ẽme’ẽ,

3térã omomba’eguasúva ambue járape ha oñesũ henondépe, jepémo taha’e kuarahy térã jasy, térã mayma mbyjaita ára pegua, umía Ha’e he’iva’ekue peẽme ani hag̃ua pemomba’eguasu,

4ha peporandu ha peitypeka porã rire, ha pejohu añetehápe ha’e ojapora’e pe mba’evaiete Israel retãme,

5upéicharamo peguenohẽva’erã upe kuimba’e térã upe kuña upévape, ojapomava’ekue pe mba’evaiete, pende táva rokẽ oka gotýo, ha pejapi ichupe itápe ha’e omano meve.

6Mokõi térã mbohapy techahare ñe’ẽ rupi omanova’erã pe ojapóva pe mba’evaiete, ndojejukaiva’erã peteĩ techahare ñe’ẽ rupínte.

7Umi techahare po ojapi raẽva’erã, ha upéi ambue tetãyguakuéra po ojapíta avei ha’e omano meve, upéicha peipe’áta mba’evai pene retã apytégui.

8Ha hasyeterei ramo ndéve rembojovake porã hag̃ua: Añete piko ojukara’e, térã oinupãra’e, térã omondara’e, upéicha ramo pehova’erã pe yvy pehẽngue Ñanderuete oiporavotahápe, (pe óga jojohuha oĩtaháme).

9Ha upépe peg̃uahẽ umi pa’i Levigua ha mbojovakehára rendápe oĩva umi árape, pembohasapa hag̃ua ichupekuéra, ha’ekuéra ombojovake hag̃ua.

10Ha nde rejapopava’erã umi pa’i ha mbojovakehára he’i háicha ndéve.

11Pe tembiapoukapy nembo’e háicha, ha pe mbojovakehára he’i háicha ndéve, upeichaite rejapova’erã; nereñemboykeiva’erã akatúa gotýo ni asu gotýo, ha’ekuéra omyesakã háicha ndéve, peichaite rejapopava’erã.

12Ha pe tapicha oñembotuicha ramo, ha ndojaposéi ramo umi pa’i ni pe mbojovakehára ñe’ẽ he’íva, tojejuka pe tapichápe upéichamante reipe’áta pe mba’evai Israelguakuéra apytégui.

13Ha opaite tetãygua ohendúva guive okyhyje ha oñemomirĩ hag̃ua.

Tembiapoukapy tetã ruvicha reheguáva

14Ha peike ramo pe yvýpe Ñanderuete, Ñandejára ome’ẽtava peẽme, peñemomba’e hag̃ua hese, ha upéi peẽ peje ramo pende py’apýpe: Ñamoĩta peteĩ tetã ruvichaguasu ñandeári, mayma tetã ñande jerekuévo oguereko háicha;

15upéicha pemoĩva’erã pendeári tetã ruvichguasu ramo peteĩ kuimba’e Ñanderuete oiporavótavape pene pehẽnguekuéra apytégui, opyta hag̃ua tetã ruvichaguasu ramo pende apytépe; napemoĩriva’erã tetã ambueygua Israel retã ruvicha ramo.

16Ha’e nombohetaiva’erã katu imba’erã ramo kavajukuéra, ha ndoguerahái jevyva’erã Israelguakuérape Egípto retãme omboheta hag̃ua ikavajukuéra, Ñanderuete he’ímagui peẽme: Araka’eve ndapejuveiva’erã ko tape kóva rehe.

17Ha noñemohembireko hetaiva’erã, ani hag̃ua iñe’ã oho tape vai rehe; pláta térã óro nombyaty hetaiva’erã.

18Ha’e oguapy aja hetã ruvicha guapyhaguasúpe, ha’e ohai jevyva’erã ko’ã tembiapoukapy peteĩ kuatiañe’ẽ pyahúpe, pa’i Leviguakuéra resa poguýpe, imba’erã ramo.

19Ko kuatia kóva topyta hendive ha omoñe’ẽva’erã ijupe g̃uarã oikove aja pukukue, okyhyje hag̃ua Ñanderuetégui ha ojapo hag̃ua hekoitépe iñe’ẽ ha hembiapoukapykuéra Ha’e he’iuka haguéicha,

20ani hag̃ua oñembotuicha ipy’apýpe hetãyguakuérape, ha ani hag̃ua oñemboyke akatúa ni asu gotýo; ikatu hag̃uáicha hi’areite hetã ruvicha iguapyhaguasurã, ha’e ha ita’yrakuéra Israel apytépe.