1Jeremías he’ipávo hetãyguakuérape Ñanderuete, Ijára rembipota, ha opaite mba’e Ñanderuete he’iukamava’ekue ichupekuéra,
2Azarías, Osaías ra’y, ha Johanan, Carea ra’y, ha umi kuimba’e oñembotuicháva guive he’i hikuái Jeremíaspe: Japu rei ningo nde eréva oréve; Ñanderuete, Ñandejára, nde’íri ndéve: Ani pehótei Egípto retãme peiko hag̃ua upépe, péva nde yvyarigua ñe’ẽ voi ningo,
3Baruc, Nerías ra’ýnte oñe’ẽvai ndéve orerehe, oremoĩ hag̃ua Caldeayguakuéra pópe, orejukaukapa hag̃ua térã oreguerahauka hag̃ua avei Babilóniape.
4Péicha, Johanan, Carea ra’y, umi soldádo ruvicha ha hetãyguakuéra ndojapói Ñanderuete ñe’ẽ opyta hag̃ua Juda retãme,
5Johanan ha umi soldádo ruvicha ojapyhy mbaretépe umi Judayguápe hembymiva’ekuépe ha ou jevymava’ekue umi tetã oñemosarambi haguégui, oiko jevy hag̃ua hikuái Juda retãme;
6ha ombyatypa umi kuimba’e, kuña, mitãkuérape ha tetã ruvicha rajykuérape, umi soldádo ruvicha, Nabuzaradan ohejava’ekue Gedalías, Ahicam ra’y, Safan ra’yre, ha proféta Jeremías ha Baruc, Nerías ra’ýpe,
7ova hag̃ua hikuái Egípto retãme. Péicha ha’ekuéra ndojapói Ñanderuete rembipota; ha og̃uahẽ hikuái Táfnespe.
8Ha Ñanderuete ñe’ẽ ou Jeremíaspe Táfnespe, ha he’i ichupe:
9Ejapyhy ita tuicháva, ha eñu’ã tujúpe ha emoĩ tape ijitaita pa’ũme faraon róga Táfnes pegua rokẽ renondépe, umi Judaygua kuimba’e resa renondépe;
10ha ere ichupekuéra: Péicha he’i Yvága Atykuéra Jára, Israel Jára: Péina ápe Che aguerúta che rembiguái Nabucodonosor, Babilónia retã ruvicha, ha amoĩta iguapyhaguasu ko ita amokañyva’ekue ári, ha ha’e omopu’ãta hi’ári hóga rymba pirekueguiguáva.
11Ha’e oúta ombotapere hag̃ua Egípto retãme; umi ojukasévape ojukáta; umi oguerahaséva jepokuapýpe ogueraháta jepokuapýpe; ha kyse pukúpe ojukasévape, ojukáta kyse pukúpe.
12Ha ojatapýta umi Egípto jarakuérare itupãópe térã ogueraháta ichupekuéra, ojegueraha háicha umi jepokuapýpe; upéicha Che amopotĩta Egípto retã, ku ovecha rerekua oipe’a háicha umi ky’a ojáva ijahoja rehe, ha upéi oho jevýta py’aguapýpe.
13Ha’e ojokáta avei ijára gua’úpe, umi kuarahy ra’ãnga, oĩvahína Egípto retãme; ha ohapypáta umi Egípto jára tupãonguéra.
Who We AreWhat We EelieveWhat We Do
2025 by iamachristian.org,Inc All rights reserved.
