Nahum 2 - Biblia en Guaraní - ?anderuete ?e’? Por? 2015

1Ne mbyaihára oñemoag̃uíma, eñangareko porãke nde táva oñemombaretéva rehe, eñangareko pe tape rehe, ejeku’a jokuáke, eñemombarete opaite nde pu’aka reheve.

2Ñanderuete omyatyrõ jevýta Jacóbope ha Israel pu’aka. Mondahakuéra oguerahapava’ekue ichuguikuéra, ha ombyaipava’ekue iparralty ohakã’ombávo.

3Umi ipy’aguasúva rete mo’ãha pytãmba, umi ñorãirõhára oñemonde ao pytãme ha icárro ñorãirõ megua ojogua tata rendýpe, upéicha oñembosako’íma umi ñorãirõhára hi’árape g̃uarã ha omongu’éma avei ijyvyra puku akua.

4 Icarrokúera ojasurupava’erã tape rehe, hyapupava’erã umi tape rupi, ha’etéta ku tata’y hendýva ha oñaníva araveráicha.

5Nínive ruvichaguasu ohenói ipy’aguasúvape, oñomyañamba, oguatahápe ho’a hikuái. Pya’e pya’e ohótagui hikuái ikorapyjere tápia yvatépe, hesekuéra ija’e’ỹva omopu’ãmba jepéma umi yvyra ohasa hag̃ua pe táva kora yvate ári.

6Ojepe’áma ysyrykuéra rokẽguasu, ha pe tetã ruvicha rogaguasu oñemondýigui oryryipa.

7Ha ojehecháma pe tetã ruvicha rembireko ojegueraha opívo ñeñapytĩháme ha hembiguái kuñáva ku pykasúicha ipyahẽ asyhápe oinupã ipyti’a rehe.

8Nínive oiko guive ojogua peteĩ lagúna ha ho’a rire itavaygua okañy pya’e pya’e ku y osyry háicha peteĩ lágo ojekávagui. Pepytána, pepytána ojesapukái, avave katu ndojevyséi.

9Pemonda pláta, pemonda óro, hetaiterei mba’erepy ningo oĩ gueteri.

10Inandi ha itaperepáma, ipy’akuéra ikangypáma, hetyma ha humbykuéra oryryipa, ha hovakuéra hesa’yjupa.

11Mba’épa hemby umi leõ kehágui, Asíria retã, moõpa opyta pe yvy ita’yrakuéra ovy’a haguépe, pe leõ mácho, pe leõ kuña ha imembykuéra oikova’ekue py’aguapýpe, ha ndaipóri omondyiva’ekue ichupekuéra.

12Pe leõ ogueru heta tembi’u ita’ýra ha ikuñakuérape, omyenyhẽ avei tembi’uetágui ijitakua.

Nínive oñehundipaitéta

13Ejapysaka porãke, apu’ãta nderehe, he’i ángel atykuéra Jára. Ahapýta tatatĩ tuichávape nde carrokuéra, ha kyse pukúpe ajukapáta ne ñorãirõhára pyahu, ha nde neremondamo’ãvéima, ha araka’evéma noñehendumo’ãvéima ne ñe’ẽ rerahahára.