1Ha Hesu he’ipávo ko’ã mba’e, he’i hemimbo’ekuérape:
2Peikuaáma ko’águi mokõi arahápe oikóta pe páscua arete, ha oñemosãingóta yvyarigua Ra’y kurusu rehe.
3Upéramo pe pa’iguasu Caifas ha umi karai anciáno oñembyaty hikuái pe pa’iguasu rogaguasu korapýpe.
4Oñomongeta hikuái mba’éichapa omoñuhãta ha oapresáta Hesúpe, ojuka hag̃ua ichupe.
5Ha he’i hikuái, anínte pe arete aja, ani hag̃ua oiko sarambiguasu tetãyguakuéra apytépe.
María omohyakuã porã Hesúpe6Ha Hesu oĩ jave Betániape, Simon iléprava’ekue rógape,
7oñemboja hendápe peteĩ kuña oguerúva ipópe peteĩ mba’yru mba’e ry’akuã porã hepyetéva reheve, ha oñohẽ iñakã rehe, ha’e oguapy jave hína mesápe.
8Ohechávo péva hemimbo’ekuéra ipochypa joa ha he’i: Mba’upépa péicha oñehundi rei pe pirapire.
9Ko mba’e ryakuã porã ningo ikatuva’erãmo’ã oñevende, ha hepykue oñeme’ẽkuaákuri mboriahukuérape.
10Ha Hesu oñandukuaágui péva, he’i ichupekuéra: Mba’érehepa pemyangekõi ko kuñáme, ha’e ningo mba’eporã ojapohína cherehe.
11Mboriahukuéra ningo tapiaite peguerekóta penendive, ha che katu naĩmo’ãi tapiaite penendive (ko yvy ári).
12Ha’e oñohẽvo pe mba’e ryakuã porã cherehe, ha’e chembosako’íma ág̃a añeñotỹ ramog̃uarã.
13Añetehápe Che ha’e peẽme: Ko yvy apére mamo oñemombe’uhápe ko evangélio kóva oñemombe’uva’erã avei pe ha’e ojapova’ekue, ha hese oikóta mandu’a.
Júdas otraiciona Hesúpe14Upéramo peteĩva, umi 12 apyte pegua hérava Júdas Iscarióte, oho pa’i ruvicha rendápe, ha he’i:
15Mba’épa peme’ẽta chéve, che amoĩ ramo Hesúpe pende pópe. Ha ome’ẽ hikuái ichupe 120 ára tembiapo repy rupi.
16Ha upe ára guive Júdas oheka mba’éichapa ikatu ija ichupe omoĩ hag̃ua Hesúpe hese ija’e’ỹva pópe.
Páscua arete17Pe pan levadura’ỹ rehegua arete oñepyrũha árape, og̃uahẽ hemimbo’ekuéra Hesu rendápe ha oporandu ichupe: Mamópa reipota rombosako’i pe páscua re’u hag̃ua.
18Ha Hesu he’i: Tapeho pe távape ku karai rendápe, ha peje ichupe: Ore mbo’ehára he’iuka ndéve: Che ára og̃uahẽmbotáma, nde rógape ajapóta pe páscua che remimbo’ekuéra ndive.
19Ha hemimbo’ekuéra ojapopa Hesu he’i haguéicha ichupekuéra, ha ombosako’i hikuái pe páscua rembi’u.
20Ka’aruetévo Ha’e oguapy mesápe umi 12 hemimbo’ekuéra ndive.
21Ha okaru aja hikuái he’i: Añetehápe Che ha’e peẽme, peteĩva pende apytépe chetraicionataha, (teko py’a joyvy).
22Ha’ekuéra oñembyasyeterei, ha peteĩteĩva oñepyrũ oporandu ichupe: Che piko, Che Jára.
23Ha Hesu he’i: Upe omoingéva ipo chendive ña’ẽmbépe, upéva cheme’ẽta (cherehe ija’e’ỹva pópe).
24Yvyarigua Ra’y ningo ohóta Ñanderuete kuatiañe’ẽme ojehai haichaite hese; angái katu, pe ome’ẽva yvyarigua Ra’ýpe, iporãveva’erãmo’ã pe kuimba’e pévape ndoúira’e ko yvy apére.
25Upérõ Júdas, pe ime’ẽharã oporandu: Che piko, mbo’ehára. Ha Hesu he’i ichupe: Nde voi ningo.
26Ha okaru aja hikuái, Hesu ojapyhy pe pan, ohovasa, oipehe’ã ha ome’ẽ hemimbo’ekuérape he’ívo: Kóina pe’u; kóva ningo che rete.
27Upéi ojapyhy pe váso (víno ryru), oagradece ha ome’ẽ hemimbo’ekuérape, ha he’i: Pe’u joaite ichugui.
28Kóva ha’e che ruguy oñembopy’apeteĩ pyahu hag̃ua ha oñeñohẽva heta rehehápe, ombogue hag̃ua yvyarigua angaipakuéra.
29Ha Che ha’e peẽme, ko ára guive nda’uvéima ko parral rykuere, upe ára pyahuetépe ha’u jevy hag̃ua penendive che Ruete yvága pegua retãguasúpe.
Hesu he’i Pédro ombotovetaha ichupe30Ha opuraheipa rire, osẽ ha oho hikuái olívo cérrope.
31Upéramo Hesu he’i ichupekuéra: Ko pyharépe peẽ cherejapa reíta, ojehaipáma voi ningo: Ojejukáta pe terekua, ha ijovechakuéra oñemosarambipáta, (Zacarías 13,7).
32Ha aikove jevy rire katu, aháta pene renonderãme Galiléape.
33Ha Pédro he’i ichupe: Jepémo maymáva nderejapáta, che ndorohejamo’ãi.
34Ha Hesu he’i ichupe: Añetehápe Che ha’e ndéve, ko pyharépe pe gállo osapukái mboyve, nde eréta mbohapy jevy ndachekuaaiha.
35Ha Pédro he’i ichupe: Tekotevẽ ramo jepe amano nendive, norombotovemo’ãi (che noronegamo’ãi); ha péicha avei he’i opaite ambue hemimbo’ekuéra.
Hesu Getsemaníme36Upéramo Hesu oho hendivekuéra peteĩ tenda hérava Getsemaníme, ha he’i hemimbo’ekuérape: Peguapy ko’ápe, aha aja añembo’e.
37Ha ogueraha hendive Pédrope, ha mokõive Zebedéo ra’ýpe, ha upéi oñepyrũ oñembyasy ha ojepy’apyete.
38Ha he’i ichupekuéra: Che ánga oñembyasy chejuka hag̃uáicha, pepyta ko’ápe chemoirũ katu pene ñembo’épe.
39Ha oho tenonderã gotyomive, ha oñesũ tĩndyhápe, ha oñembo’évo, he’i: Che Ru ikatu ramo embohasa chehegui ko váso (ñemano) kóva, anínte oiko che aipotáva, upe nde reipotáva uvei toiko.
40Upéi ou hemimbo’ekuéra rendápe ha ojohu ichupekuéra oke joa, ha he’i Pédrope: Ndaikatúi piko peñembo’e chendive peteĩ hórami jepe peke’ỹre.
41Peñeñangarekóke ha peñembo’e ani hag̃ua pe’a jepy’ara’ãme. Pe pytu porã ningo ikyre’ỹ, pe to’o (ánga) katu ikangyete.
42Ha Hesu oho jevy, ha oñembo’évo he’i jevy: Che Ruete, ndaikatúi ramo ohasa chehegui ko váso kóva amboy’u’ỹre, toiko pe nde reipotáva.
43Ha ou jevýrõ ojohu jevy ichupekuéra oke joa hikuái, hesakuéra henyhẽgui topehýigui.
44Ha oheja jevy ichupekuéra, ha oho oñembo’e mbohapyha jevy, ha he’i jevy upe he’íma hagueichaite.
45Upéi ou jevývo hemimbo’ekuéra rendápe, he’i ichupekuéra: Peke katu ha pepytu’u, péina og̃uahẽma ningo pe hóra oñemoĩ hag̃ua yvyarigua Ra’ýpe hembiapo vaíva pópe.
46Pepu’ã ha jaha, péina pe chetraicionáva oñemoag̃uíma oúvo.
Oapresa hikuái Hesúpe47Ha oñe’ẽ gueteri hína, og̃uahẽrõ guare Júdas, umi 12 apostolkuéra apytépe peteĩva, ha heta oúva hendive kyse puku ha yvyra akua reheve, umi pa’i ruvicha ha karai anciáno remimboukuéra.
48Pe otraicionátava ningo omoĩra’e ichupekuéra ko techauka kóva, he’ívo: Pe che ahetũvape peapresa, upéva ningo Hesu.
49Ha pya’ete voi Júdas oñemboja Hesu rendápe, ha he’i: Maiteípa mbo’ehára, ha ohetũ ichupe.
50Hesu katu he’i ichupe: Che angirũ, ma’erãpa reju. Upévo oñemboja hikuái ha ojapyhy Hesúpe, ha oapresa ichupe.
51Ha peteĩ Hesu ndivegua, ipojái ha oguenohẽ ikyse puku, ha onambi’o pe pa’iguasu rembiguáipe.
52Upérõ Hesu he’i: Emoinge nde kyse puku hyrúpe; upe oiporúva kyse puku, kyse pukúpe omanova’erã.
53Térãpa reimo’ã ndaikatuiha añembo’e che Ruetépe, ha katuete Ha’e ombo’úta ko’ag̃aite che rendápe hetave 72.000 yvága rembiguaikuéragui.
54Ojehu hag̃ua katu Ñanderuete kuatiañe’ẽme he’íva guive, opaite mba’e ojehuva’erã peichaite voi.
55Upévo Hesu he’i umi tapichakuérape: Ku mondaha rekavoguáicha piko pesẽ kyse puku ha yvyra akua reheve cheapresa hag̃ua. Hetaite árape ningo aguapy Ñanderuete rogaguasúpe aporombo’e hag̃ua ha peẽ ndacheapresaiva’ekue.
56Ko’ã mba’e ko’ãva katu ojehu oikopa hag̃ua umi proféta ohaimava’ekue. Ha upévo hemimbo’ekuéra ohejapa ichupe ha okañymba hikuái.
Hesu ojegueraha Caifas rendápe57Ha umi oapresava’ekue Hesúpe, ogueraha ichupe pa’iguasu Caifas rógape, oñembyatyhapehína kuatia haihára ha karai ancianokuéra.
58Pédro katu oho hapykuéri, mombyry guive, pe pa’iguasu róga korapy peve, ha oike oguapy umi soldádo apytépe, ohecha hag̃ua mba’épa oikóta ha ojejapóta (Hesu rehe).
59Upérõ, umi pa’i ruvicha, ancianokuéra ha mburuvichakuéra ijatýva guive oheka techahare japu oñe’ẽvai hag̃ua Hesu rehe, ojukauka hag̃ua ichupe,
60ha ndojohúi hikuái ou ramojepe heta techahare japu. Ipahápe ou mokõi techahare japu he’íva:
61Hesu he’imava’ekue: Che ikatu aity Ñanderuete rogaguasu ha mbohapy ára haguépe amopu’ã jevýta.
62Ha opu’ã pe pa’iguasu ha oporandu Hesúpe: Nerembohováiri piko ko’ã mba’e nderehe he’ívape.
63Hesu katu okirirĩ. Ha pe pa’iguasu he’i ichupe: Che romoñe’ẽme’ẽ Ñanderuete oikovéva rérape, ere hag̃ua oréve ndépa pe Crísto, Ñanderuete Ra’y.
64Ha Hesu he’i ichupe: Añete, Che ha’e peẽme: Ko’ág̃a guive pehecháta yvyarigua Ra’y oguapy ramo Ñanderuete, pe Ipu’akapáva akatúa gotýo, ha ou jevýtava arai ári.
65Upévo pe pa’iguasu omondoro ijao, ha he’i: Ha’e oñe’ẽ vai Ñanderuete rehe. Ñaikotevẽvéta piko techahare rehe. Péina pehendúma Ha’e oñe’ẽ vaiha Ñanderuete rehe.
66Ha mba’épa peẽ peje. Ha’ekuéra ombohovái: Hembiapo vaiete rehe omanomanteva’erã.
67Ha ondyvu hikuái hova rehe, ha oinupã ichupe hikuái, ha ohovapete ichupe, ha he’i:
68Eñe’ẽna Crísto, ha ere mávapa nenupãra’e.
Pédro ombotove Hesúpe69Pédro oguapyhína okápe, pe korapýpe; ha oñemboja hendápe peteĩ kuña tembiguáiva ha he’i: Nde ningo Hesu Galileaygua irũ peteĩva.
70Pédro katu, upépe oĩva guive renondépe, ombotovete (onega) ha he’i: Ndaikuaaiete ningo che upe nde erévape.
71Ha osẽvo okẽ gotýo ohecha ichupe ambue kuña tembiguáiva avei ha he’i umi upépe oĩvape: Kóva ha’e peteĩ Hesu Nazaret rehegua irũ avei.
72Ha ha’e ombotove jevy ha ome’ẽ iñe’ẽ ha he’i: Che ndaikuaaiete pe kuimba’e pévape.
73Uperiremínte umi oñembo’ýva upérupi he’i Pédrope: Añetehápe nde ha’e peteĩ heseguáva, ne ñe’ẽ rehe ningo ojehechakuaa voi.
74Upévo Pédro ome’ẽ iñe’ẽ (Ñanderuete rérape), ha he’i: Che ndaikuaái pe kuimba’e pévape. Ha upevovete osapukái pe gállo.
75Ha upépe ae Pédro imandu’a Hesu ñe’ẽ rehe he’ívo ichupe: Pe gállo osapukái mboyve, nde eréta mbohapy jevy ndachekuaaiha, ha osẽvo upégui, ojahe’o asy ipy’aite guive.
Who We AreWhat We EelieveWhat We Do
2025 by iamachristian.org,Inc All rights reserved.
