2 Crónicas 31 - Biblia en Guaraní - ?anderuete ?e’? Por? 2015

1Ojejapopávo ko’ã mba’e opaite Israelgua og̃uahẽva guive Jerusalénpe oñemyasãi Juda tavakuéra rupi ha ojokapa hikuái umi jára ra’ãngakuéra ha ombyesa’ipa Asera ra’ãngakuéra ha oitypa hikuái umi yvy yvate ha umi kuave’ẽmby rendakuéra Juda ha Benjamin yvýpe; ha Efrain ha Manases yvýpe oĩva, ohundipa avei. Upéi opaite Israel ñemoñarenguéra oho jevy itavakuérape, peteĩteĩva ijyvýpe.

Ezequías omohenda jevy pa’ikuéra ha Leviguakuérape hembiaporãme

2Upéi Ezequías omboja’o umi pa’i ha Leviguakuéra aty atýpe, peteĩteĩva omba’apo hag̃ua hi’araitépe; umi pa’i ha Levigua oikuave’ẽ hag̃ua kuave’ẽmby ojehapypáva ha py’aguapy reheguáva, ha ojapo hag̃ua avei ambue tembiapo omboete ha omomba’eguasu hag̃ua Ñanderuetépe hogaguasu korapýpe.

3Ha tetã ruvicha ome’ẽ hymbakuéragui umi kuave’ẽmby ojehapypáva pyhareve ha ka’arukuépe g̃uarã, ha kuave’ẽmby umi pytu’uha árape g̃uarã, ha areteguasu jave g̃uarã, ojehai háicha Ñanderuete rembiapoukapýpe.

4He’i avei hetãyguakuérape, oikóva Jerusalénpe, ome’ẽ hag̃ua hikuái pa’ikuéra ha Leviguakuérape ime’ẽmby (idiézmo), ha’ekuéra omba’apo hag̃ua Ñanderuetépe g̃uarãnte.

5Ha tetã ruvicha ñe’ẽ oñemoherakuã ohóvo, Israel ñemoñarenguéra ome’ẽ heta kóga ra’ỹi ypykuéva, víno, acéite, eíra ha opaichagua ikoga’águi. Upéicha ojegueru avei idiézmo opaite ambue imba’évagui.

6Umi Israel ñemoñare ha Juda ñemoñarenguéra oikóva guive Juda tavakuérape ome’ẽ idiézmo, ivaka ha ijovechakuéra apytégui; ha ogueru avei pe diézmo opaite mba’e omboykévagui Ñanderuete, Ijárape g̃uarã, ha oñemohenda hikuái atýra atýra.

7Pe jasy mbohapyha jave oñepyrũ hikuái ombyaty umi atýra, ha ombyatypa hikuái pe jasy 7-ha jave.

8Ha Ezequías ha mburuvichakuéra ou ohechávo umi mba’e oñembyatyva’ekue, omomba’eguasu hikuái Ñanderuetépe ha ohovasa hikuái Israel retãyguakuérape.

9Ha Ezequías oporandu umi pa’i ha Leviguakuérape umi mba’e atýra rehe.

10Ha pa’iguasu Azarías, Sadoc róga rehegua, he’i ichupe: Oñepyrũha ára guive ogueru hikuái ime’ẽmby kuave’ẽmby ramo Ñanderuete rógape, ha umi mba’égui ore rokaru ha oreryg̃uatã porã, ha hemby gueteri oréve heta iterei, Ñanderuete ohovaságui hetãme, péicha rupi hemby hetaiterei hi’upyrã.

11Upémaramo Ezequías he’i ombosako’i hag̃ua hikuái umi koty oĩva Ñanderuete rogaguasu jerekuévo oñongatupa hag̃ua, ha ojapopa hikuái upéicha.

12Ha ipype oñongatu hikuái hekoitépe mba’e ra’ỹi tenondeguáva, diezmokuéra ha umi mba’eita ome’ẽsevéva Ñanderuetépe g̃uarã; ha omoĩmba Conanías poguýpe, ha’e omoakã hag̃ua, ha ityvýra Simei oipytyvõ hag̃ua ichupe.

13Ha Jehiel, Azazías, Nahat, Asael, Jerimot, Jozabad, Eliel, Ismaquías, Mahat ha Benaía opyta mba’eita ñangarekohára ramo Conanías ha ityvýra Simei poguýpe, tetã ruvicha Ezequías ha Azarías, Ñanderuete róga ruvicha, he’ígui upéicha.

14Ha pe Levigua Core, Imna ra’y, pe okẽ kuarahyresẽ gotyogua ñangarekohára poguýpe oĩmba umi kuave’ẽmby ojegueruva’ekue Ñanderuetépe g̃uarã, hetãyguakuéra ome’ẽségui ijehegui ha omboja’o hag̃ua umi mba’e, oñeme’ẽtava Ñanderuetépe g̃uarã ha umi mba’e oñeme’ẽtava pa’ikuérape g̃uarã.

15Ha ipoguýpe oĩ Eden, Miniamin, Jesua, Semaías, Amarías ha Secanías, ko’ãva oiko umi pa’i tavakuérape, ome’ẽ hag̃ua hikuái hekoitépe ipehẽnguekuérape imba’erã oñemboja’opyréva pe tuichavéva ha pe michĩvévape g̃uarã.

16Ko’ã kuimba’ekuéra omboja’o jevyva’erã umi mba’e opaite kuimba’épe héra ojehaíva kuatiáre ha omba’apo jave Ñanderuete rógape, ha ita’yrakuérape, mbohapy áñova guive.

17Umi pa’i réra ojehai hogaguasu apytépe, ha umi Levigua ombotýmava guive 20 áño yvatévo omba’apova’erã Ñanderuete rogaguasúpe hi’arakuérape (itúrnope, ihápe).

18Upépe ojehai herakuéra peteĩ kuatianñe’ẽme ha hembireko, ita’ýra ha itajýra réra avei; ha’ekuéra oñemboyke omba’apo hag̃ua hekoitépe Ñanderuetépe g̃uarã.

19Aaron ñemoñarenguérape g̃uarã, umi pa’i oiko ha omba’apóva ambue Israel távape, upéicha avei umi ambue Levi ñemoñarenguérape (oñeme’ẽva’erã avei imba’erã, pe diézmogui). Ojeporavo avei opaite távape umi kuimba’e ombohasáva pa’ikuérape ha Leviguakuérape ipoteépe imba’erãva.

20Péicha Ezequías ojapo mba’eporã ha hekoite peguáva opaite Judapy rehe, Ñanderuete resa renondépe.

21Ha opaite mba’e ojaposeva’ekue Ñanderuete rogaguasu rehe, oheka ha ojapo ipy’aite guive Ñanderuete ñe’ẽ ha hembiapoukapy he’i háicha, upévare osẽ porãmba avei ichupe g̃uarã opaite mba’e ojapóva guive.