1Ha osapukái hatã che apysakuápe, he’ívo: Umi táva hundihára og̃uahẽma, ha ipopekuéra ogueru joaite ikyse puku.
2Ha péina ápe 6 kuimba’e ou pe okẽ yvate gotýogui ha peteĩteĩva ogueru ipópe ikyse puku oporohundi hag̃ua. Ha ijapytepekuéra oĩ peteĩ kuimba’e oñemondéva línope (ao morotĩ hepývape) ha iku’a rehe ogueru peteĩ hyru kuatia haihára oiporu háicha; ha oikévo hikuái, oñembo’y pe kuave’ẽmby renda bronceguiguáva ypýpe.
3Ha Israel Jára reko jajaipa opu’ã pe querubin (ángel ruvicha) árigui, oĩ haguépe, ha oho pe óga rokẽ pyrũha gotýo ha Ñanderuete ohenói pe kuimba’épe, oñemondéva ao linoguiguápe, oguerekóva iku’a rehe pe kuatia haihára ryru,
4ha he’i ichupe: Ehasa pe táva mbyte rupi, Jerusalen mbyte rupi, ha emoĩ peteĩ techaukaha (márca) umi yvyarigua syva rehe, ojepy’apýva ha ipyahẽ asýva opaite mba’evai ojejapóva rehe ko táva ryepýpe.
5Ha ambue kuimba’ekuérape che ahendu, Ha’e he’iha: Pehasa pe táva rupi ha tapeho pe kuimba’e rapykuéri ha pejukapa umi heko vaívape; pende resa anítei operdona, ha aníke peporoporiahuverekótei.
6Pejuka tujakuéra, mitãrusukuéra, kuñataĩkuéra, mitã ha kuñakaraikuérape, nahembyvéi peve avave; ha opaite umi oguerekóva isyváre pe techaukaha napeñembojamo’ãi hesekuéra; peñepyrũ pene rembiapo pende Ruete rogaguasu guive. Ha oho hikuái ojuka hag̃ua umi kuimba’e itujávape oĩva Ñanderuete rogaguasu renondépe,
7ha he’i ichupekuéra: Pemongy’a che rogaguasu, pemyenyhẽ pe korapy te’õnguégui. Ha osẽ, ha oñepyrũ ojuka umi tavayguápe.
8Ha ojehu pe oporojuka jave hikuái, che añoite apyta, ajeity che rova yvýre ha asapukái, ha’évo: Nde, che Ruete, rejukapáta piko Israel rembyremi reñohẽvo nde pochy Jerusalen ári.
9Ha Ha’e he’i chéve: Juda ha Israel retã ñañangue ituichaitereirasa ha pe yvy henyhẽ tuguýgui, ha pe táva katu henyhẽ teko vaígui; he’ígui hikuái: Ñanderuete opoi rei hetãgui ha ndohechái ore rembiapo vai rehe,
10upévare che resa noperdonamo’ãi ha ndaiporiahuverekomo’ãvéi ichupekuéra, ha hembiapo vaikuéra aitýta iñakãnguéra ári.
11Ha péina ápe pe kuimba’e oñemondéva ao linoguiguápe, ha iku’a rehe oguerekóva pe kuatia haihára ryru, ombohovái ha he’i: Ajapopáma, Nde ere hagueichaite chéve.
Who We AreWhat We EelieveWhat We Do
2025 by iamachristian.org,Inc All rights reserved.
