Ezequiel 38 - Biblia en Guaraní - ?anderuete ?e’? Por? 2015

Ñanderuete ñe’ẽ Gog rehe, Magog retã ruvicha

1Ñanderuete ñe’ẽ ou chéve, ha he’i:

2Kuimba’e ra’y, emoĩ nde rova Gog, Magog retã ruvicha rehe, oisãmbyhýva Ros, Mesec ha Tubal rehe, ha emomarandu (eprofetiza) hese,

3ha ere: Péicha he’i pende Ruete, peikuaa porãke, Che añemoĩta ne mburuvicha Gog rehe, oisãmbyhýva Ros, Mesec ha Tubal rehe.

4Che rombojevýta, amoĩ jave peteĩ ty’ãi (gáncho) ne rañykã rehe, ha roguenohẽta ndéve ha nde soldádo atyguasuete, ikavaju ha hi’ariguakuéra, oñembosako’i porãmbáva opaite iñorãirõ rembiporu reheve, hete mo’ãha tuicha ha michĩva reheve ha ikyse puku joaite reheve.

5Persiaygua, Etiopiaygua ha Libiaygua ou hendive, hete ha iñakã mo’ãha reheve.

6Gomer ha isoldádo aty reheve, umi Togarma retãygua, nórte rugua guiogua, ha isoldádo aty reheve, heta tetã añetehápe oĩta nendive.

7Eñembosako’i ha eñangarekóke, nde ha opaite atyguasu nendive oĩva guive ha nde reisãmbyhýtava rehe.

8Heta arakuéra rire oje’éta ndéve ne rembiaporã; ha umi áño paha rupi nde rejúta peteĩ tetãme, Che aguenohẽ jevymava’ekue umi tetã apytégui, ha umi hembyva’ekue kyse puku ñemanógui ambyaty jevýma Israel cérro oñembotapereva’ekuépe; ko’ág̃a katu oiko py’aguapy pópe ijyvyteépe.

9Nde repu’ãta reju hag̃ua araícha; ku arai omo’ãva pe cérroicha, nde soldádo aty ha heta tetã nendive, pejeitýta hi’arikuéra.

10Péicha he’i Ñanderuete: Umi ára umívape heñóita nde py’apýpe pensamiénto vai ha rejaposéta mba’evaiete,

11ha eréta: Aháta peteĩ tetã ikangývape, ajeity hag̃ua hetãyguakuéra ojepy’apy’ỹva ári ha oikóva py’aguapypópe; oiko hikuái táva korapyjere yvate’ỹre, nahokẽi ni naiñembotyhái.

12Rejeityse hi’ári remonda hag̃ua ha regueraha hag̃ua imba’erepyeta, reñemoĩse pe tetã itapereva’ekue rehe, oiko jevýmava py’aguapýpe ijyvyteépe ha pe tetã péva Che agueru jevymava’ekue tetãnguéra apytégui, oñemohymba ha oñemomba’erepy jevýma, ha oikohína pe yvy ape puru’ãme (mbytépe).

13Seba ha Dedangua, umi Tarsisgua ha mayma imburuvichakuéra, oporandúta ndéve ha he’íta: Reju piko remonda ha regueraha hag̃ua imba’erepyeta. Rembyaty piko nde soldádo atykuéra rejapyhy hag̃ua imba’eita, reipe’a hag̃ua pláta ha óro, regueraha hag̃ua hymba ha opaichagua imba’erepy,

14upévare, nde kuimba’e ra’y, emomarandu ha ere Gógpe: Péicha he’i Yvága Atykuéra Jarateéva: Umi ára umívape, che retã Israel oiko aja py’aguapýpe nde resẽta ne retãgui.

15Rejúta ne retãgui opytáva norteitépe, nde ha heta ambue tetãygua oúta nendive; peẽ pejupáta kavaju ári, heta tapicha aty ha soldadokuéra aty imbaretéva reheve.

16Ha reñemoĩta che retã Israel rehe ku arai hũetéicha omo’ãva pe yvy ape; umi mba’e oikóta umi ára pahápe Che voi romondóta che retã Israel yvýpe, umi tetã chekuaa hag̃ua, nde, Gog rupi, Che ahechaukáta hesakuéra renondépe che reko porãha.

17Péicha he’i Ñanderuete: Nanderehéipara’e Che añe’ẽva’ekue umi ára ohasamava’ekuépe, che rembiguaikuéra, che proféta Israel peguárupi, ha’ekuéra oporomomaranduva’ekue Che roguerutaha hi’arikuéra.

18Umi ára umívape, Gog ou vove Israel retãme, he’i pende Ruete, Che chepochyetereíta.

19Che ñeko’õi ha che pochy rupi añe’ẽma: Umi ára umívape oikóta yvyryrýi ndetuicháva Israel retãme.

20Umi pira, umi guyra yvate ovevéva, umi mymba ñu rupigua, mboikuéra yvy rehe otyryrýva ha mayma yvyarigua oikóva yvy tuichakuépe, oryryipáta che renondépe; umi cérro okukuipáta, umi yvyra ho’apáta ha mayma táva korapyjerekuéra ojeitýta yvýre.

21Ha Che asapukáita mayma che cerrokuéragui: Pe kyse puku to’a hi’arikuéra, he’i Yvága Atkuéra Jára; oimeraẽva omopu’ãta ikyse puku iñirũ rehe.

22Che ahaviráta ichupekuéra mba’asy iñasãiva ha kyse puku rupi; ha amongýta amandáu, tata ha azúfre hi’arikuéra, isoldádo aty ha heta ambue tetãyguakuéra ári,

23upéicha Che añembotuicháta, añemboheko porãta ha ajehechaukáta heta tetã resa renondépe, oikuaa hag̃ua hikuái Che ha’eha pe Yvága Atykuéra Jára añeteguáva.