Jeremías 31 - Biblia en Guaraní - ?anderuete ?e’? Por? 2015

Israelguakuéra ojevýta hetãme

1Upe ára upévape, he’i pende Ruete, Che aikóta opaite Israelguápe g̃uarã Ijára ramo, ha ha’ekuéra oikóta che retãyguakuéra ramo.

2Péicha he’i pende Ruete: Umi tetãygua ojesalvava’ekue kyse pukúgui ojohu py’aporã desiértope ha Che voi ambopy’aguapy jevýta hendag̃uáme g̃uarã.

3Ymaite guivéma Ñanderuete oñeñanduka chéve, ha he’i: Che rohayhuete, mborayhu apyre’ỹme, upévagui roiporiahuvereko tapia g̃uarã.

4Romopu’ã jevýta, nde Israel, reñemopu’ãta ku kuñataĩ pyahúicha; reñembojeguaka jevýta umi mba’epu pararã reheve ha resẽta repurahéi torypápe.

5Reñotỹ jevýta parral Samária cérro rehe; ha umi oñotỹva iparral vy’apópe ho’úta avei hi’akuéra.

6Og̃uahẽtagui pe ára umi rerekua oñangarekóva Efrain cérro rehe he’íta: Pepu’ãke ha jaha joa Siónpe, Ñanderuete, Ñandejára rendápe.

7Péicha he’i pende Ruete: Tapendepy’a rory ha tapevy’aite Jacóbo ndive, ha vy’apópe pesapukái pe tetã oporomyakãvape. Pemboetéke, pemomba’eguasúke ha peje: Nde, ore Ruete, esalvána ne retãme, umi Israélgui hembymívape.

8Pema’ẽ porãke, Che agueruka jevýta che retã yvatéguio ha ambyatypáta ichupekuéra umi yvy apýra paha guive, ha ijapytepekuéra oĩta umi hesatũva ha ikarẽva, kuña hyeguasúva ha imembyramóva; aty atyguasúpe oupa jevýta Israel retãme.

9Oñembo’évo jahe’ópe, agueru jevýta ichupekuéra, amohenda hag̃ua ichupekuéra yakã rembe’ýpe, ha amboguatáta ichupekuéra tape ikare’ỹva rehe ha noñepysãngamo’ãi hikuái, Che ningo Israel Ruteéva ha Efrain katu che ra’y ypykue.

10Pehendúke pende Ruete ñe’ẽ, peẽ ambue tetãnguéra, peikuaauka hag̃ua mombyryetegua y rembe’y rupi oikóvape, ha peje: Israélpe amosarambiva’ekue, ko’ág̃a katu ambyatypa jevýta ha añangarekóta hesekuéra, ku ovecha rerekuáicha oñangarekóva ijovecha aty rehe.

11Pende Ruete oguenohẽ Israélpe pe tetã imbaretetévagui.

12Ha ou joáta hikuái vy’a ha sapukaipópe Sion cérrope, ha oñani joáta hikuái oñembopy’arorývo pende Ruete jehovasa porãite reheve, pan, víno, acéite, hymba ovecha ha vakakuéra reheve; ha hi’ánga ojoguáta ka’avotýpe oñemohe’õ porãvape ysyry rembe’ýpe, ha araka’evéma naimba’embyasyveiva’erã hikuái.

13Upéramo pe kuñataĩ ojerokýta vy’apópe, ha ovy’áta umi mitãrusu ha karaietéva hendive; ha tesay rekovia ame’ẽta ichupekuéra vy’aguasu, Che amoangapyhýta ichupekuéra, ha ame’ẽta ichupekuéra py’a rory ipy’a ñembyasy rekovia.

14Che ambopy’aguapýta ipa’ikuérape mba’eporãita rupi, ha che retãygua hyg̃uatãta mba’e porãitágui Che ame’ẽva ichupekuéra, he’i pende Ruete.

15Péicha he’i pende Ruete: Ñe’ẽpu oñehendu Ramápe, tasẽ ha jahe’o asy: Raquel ojahe’o imembykuéra rehe ha ndoipotái oñemoangapyhy ichupe, omano haguére imembykuéra.

16Péicha he’i pende Ruete: Ejejoko, ani rejahe’o, ani osyry nde resay; oĩgui ne rembiapokue repyrã, ha oupa jevýta hikuái hese ija’e’ỹva retãnguéragui.

17Oĩgui esperánza ko’ẽ ramog̃uarã, he’i pende Ruete, ha ita’yrakuéra oupa jevýta hetãteépe.

18Ahendu Efraínpe ojahe’o ramo: Chenupã ha chehavira ku tóro ra’y saitéicha, chembohekove pyahu, ha che rekove ipyahúta, Nde ha’égui che Ruete, che Jára.

19Chereraha rire jepokuapýpe añembyasy che rembiapo vaikue rehe, ha ahechakuaa che voi añemohembiapo vai hague ha upévare añenupã hague avei, atĩeterei ha ajesarea, añandu che karia’y rembiapo vaikue.

20Efrain piko ndaha’éi pe ta’ýra aguerohoryvéva, ndaha’éi piko pe mitãmi chembopy’a rorýva. Añe’ẽ ypy guive hese, tapiaite chemandu’a hese. Upéicha rupi chepy’a angekõi hese, añetehápe aiporiahuverekóta ichupe, he’i pende Ruete.

21Emoĩ ndejupe g̃uarã techaukaha ijyvatéva nde rape rehe; ha ema’ẽ porã nde rapekue rehe, ejevy jeýke upe tape reho hague rupi, Israel pegua kuñataĩ, eju jevýna nde tavakuérape.

22Araka’e pevépa reikóta ágotyo pégotyo, nde tajýra py’a hatãitéva ha reñemboykéva chehegui. Pende Ruete ojapo mba’e ipyahuetéva ko yvy apére: Pe kuña (Israel) oikova’erã iména (Ñanderuete) rapykuéri.

23Péicha he’i Yvága Atykuéra Jára, Israel Jára: Juda retã ha itavakuérape, Che aguerukapa jevy rire umi ojeguerahamava’ekue jepokuapyhápe oje’éta gueteri ko ñe’ẽ kóva: Ñanderuete tanderovasa, nde, ñu hekojojáva, nde, cérro heko potĩva rehe.

24Ha Juda oikóta hetãteépe opaite itavakuérape ha omba’apo jevýta py’aguapýpe ikokuépe, ha oñangarekóta avei hymba atykuéra rehe,

25amokyre’ỹgui hi’ánga ikane’õvape, ha amoangapyhy mayma hi’ánga oñembyasývape.

26Ha ápe che, Jeremías, aju apáy, ha che ke pegua chembopy’arory.

Ñanderuete oñotỹ ha omongakuaa

27Peikuaa porãke, outaha pe ára, he’i pende Ruete, amoheñóita Juda ha Israelguakuéra hetãme ha hymbakuéra ku mba’e ra’ỹi porãvaicha.

28Che añangareko haguéicha hesekuéra aipo’o ha aitývo, amyangekõi, ahundi ha aipy’apývo, péicha avei añangareko jevýta hesekuéra añotỹ ha amopu’ã hag̃ua ichupekuéra, he’i pende Ruete.

29Upe ára upévape ndoje’eveimava’erã: Umi túva ho’úkuri parral’a háiva ha ita’ýra rãinguéra upéi ojehýi.

30Peteĩteĩ omanóta iñañangue rehe; ha umi tetãygua ho’úva guive parral’a hái, hãinguéra jehýita.

31Pema’ẽ porãke, outahína peteĩ ára, he’i pende Ruete, añembopy’apeteĩ jevýta Israel ha Judayguakuéra ndive.

32Ndaha’emo’ãi ku ñe’ẽme’ẽ ajapo haguéicha ituvakuéra ndive aguenohẽ ramoguare ichupekuéra Egípto retãgui; ha’ekuéra voi ombyai che ñe’ẽme’ẽ, Che, Ijára ramojepe, he’i pende Ruete.

33Ohasa rire umi ára añembopy’apeteĩta Israel róga rehe, ha’évo: Che amoĩta ko che ñe’ẽme’ẽ iñapytu’ũkuápe, ha ahaíta ipy’apypekuéra; ha Che aikóta ichupekuéra g̃uarã Ijára ramo, ha ha’ekuéra oikóta che retã ramo.

34Ha avave nombo’emo’ãvéi hapichápe térã ipehẽnguekuérape, he’ívo: Eikuaána Ñanderuetépe, mayma chekuaa porã voi, pe imichĩvéva guive pe ituichavéva peve, he’i pende Ruete; aperdonáta iñañangue, ha nachemandu’amo’ãvéima hembiapo vaikuéra rehe.

35Péicha he’i Ñanderuete, omoĩva pe kuarahy ohesape hag̃ua arakuépe, ha omoĩva jasy ha mbyjakuéra ohesape hag̃ua pyharekuépe; Ha’e omboja’o pe yguasu, ha ombohyapúva hi’y, ha upe ojapopáva péva oñembohéra Yvága Atykuéra Jára.

36Og̃uahẽ ramo peteĩ ára umi mba’e ymaguare ndoikomo’ãvéi ramo, he’i pende Ruete, upéramo ae Israel ñemoñare ndoikomo’ãvéi avei che retã ramo.

37Péicha he’i pende Ruete: Oñeha’ã rire yvagakuéra tuichakue, yvatéo, ha ojekuaa porã ramo ko yvy pyenda yvy gotýo Che avei amboykeva’erãmo’ã mayma Israel ñemoñarenguérape opaite hembiapo vai rehe.

38Peikuaa porãke oúta katuete upe ára, he’i pende Ruete, oñemopu’ã jevýta chéve g̃uarã ko táva kóva Hananeel óga yvate guive ijesquína rokẽ meve.

39Ha pe sã ojeporúva oha’ã hag̃ua osẽta upégui, Gareb cérro peve, ha upéi ojeréta Goa gotýo.

40Opaite pe cérro pa’ũ, oĩháme umi omanóva retekue ha oñemombohápe tanimbu ysyry Cedron peve; ha upe guive kavajukuéra rokẽ hakuaha (esquína) ojejereha peve, kuarahyresẽ gotýo, oñemboykéta pende Ruetépe g̃uarã, ndojepe’aveiva’erã ha noñembyaiveiva’erã opaite ára peve.