1Pe Pytu Porãmbáva cherupi, chegueraha hag̃ua Ñanderuete róga rokẽ, kuarahyresẽha gotýo, péva oma’ẽ avei kuarahyresẽha gotýo; ha péina ápe pe okẽ ojeikehápe oĩ 25 kuimba’e, ha ijapytepekuéra ahecha Jaazanías, Azur ra’ýpe, ha Pelatías, Benaía ra’ýpe, ko’ãva oiko mburuvicha ramo hetãyguakuéra apytépe.
2Ha he’i chéve: Kuimba’e ra’y, ko’ã kuimba’e ko’ãva ombosako’i mba’e vaiete ha ohekombo’e vaise ko’ã tavayguakuérape.
3Ha umía he’i: Oñemopu’ã jevy ramo ko’ã táva róga, umía ha’e japepo (ólla), ñande katu pe so’o.
4Upévagui emomarandu ichupekuéra ha nde, kuimba’e ra’y eñe’ẽ ichupekuéra che rérape.
5Ha ou cheári Ñanderuete Pytu Porãitéva, he’i chéve, péicha he’i pende Ruete: Peẽ Israel retãygua peñe’ẽ ha pejepy’amongetáva rehe Che aikuaa porãmba, chehegui nokañymo’ãi mba’eve.
6Pemboheta hetave umi te’õngue ko táva kóvape ha pemyenyhẽ te’õnguégui ko táva callekuéra.
7Upévare pende Ruete he’i: Umi te’õngue peẽ pejukava’ekue ko táva ryepýpe ha’ekuéra ningo pe so’o, ha pe táva ha’e pe japepo (ólla); peẽme katu Che pomosẽta ko táva ryepýgui.
8Pekyhyje kyse pukúgui amboútava pendeári, he’i pende Ruete.
9Ha Che poguenohẽta ko táva ryepýgui pomoĩ hag̃ua tetã ambueygua poguýpe, péva che jehavira peẽme g̃uarã.
10Kyse pukúpe pemanóta, Israel retã rembe’ýpe Che pombojovakéta, peikuaa hag̃ua Cheha pe Oikovéva tapia g̃uarã.
11Pe táva ndoikomo’ãi peẽme japepo ramo, ha peẽ ndaha’emo’ãi ipypegua so’o; Israel retã rembe’ýpe katu Che pombojovakéta.
12Ha peikuaáta Che ha’eha pende Ruete; ndapeikóigui che ñe’ẽ he’i háicha ha ndapejapóigui che rembiapoukapy, peikónte uvei umi tetã pende jere rupigua ojepokuaa háicha.
13Ha ojehu che añe’ẽ jave, Pelatías, Benaía ra’y, omano. Upémaramo añesũ amboja peve che rova yvy rehe ha hatã asapukái, ha’évo: Nde, ore Ruete, rejukapátapa Israel rembyremíme.
Ñanderuete ome’ẽ iñe’ẽ ha’e omyatyrõ jevytaha hetã Israel14Ha ou chéve Ñanderuete ñe’ẽ, ha he’i:
15Kuimba’e ra’y, umi Jerusalengua oñe’ẽvai nde ryke’ykuéra rehe, ne pehẽnguekuéra rehe ha mayma Israelgua rehe, ha he’i hikuái: Peñemomombyry Ñanderuetégui; oréve oñeme’ẽma ko tetã ore mba’e ramo.
16Upévare ere: Péicha he’i pende Ruete: Che pomombo ramojepe mombyry umi tetãnguéra apytépe, ha pomosarambi ramojepe ko yvy ape rehe, upeichavéramo jepe Che aikóta peẽme g̃uarã pende Ruete rogaguasu ramo mamo peg̃uahẽtaha rupi.
17Ha ereve, péicha he’i pende Ruete: Che pombyaty jevýta umi tetãgui, ha pogueru jevýta umi tetã pomosarambi haguégui, ha ame’ẽ jevýta peẽme Israel yvy pene retãtee ramo.
18Ha ojevy rire oipe’apáta mayma ambue jára gua’u ra’ãnga ha opaite mba’e jaheipy ova guive ipype.
19Che amoambuéta ipy’apykuéra ha ame’ẽta ichupekuéra peteĩ pytu porã pyahu; ha aipe’áta hetégui ipy’apy itaguiguáva, ha ame’ẽta ichupekuéra peteĩ py’a (ñe’ã) to’oguiguáva,
20oiko hag̃ua hikuái Che ha’e hagueichaite, ha ojapo hag̃ua hekoitépe che rembiapoukapy, oiko hag̃ua chéve che retã ramo, ha Che aiko hag̃ua ichupekuéra Ijaratee ramo.
21Ha umi omomba’eguasusevéva ambue jára gua’u ra’ãngápe ha oikosevéva ko’ã mba’evai rapykuéri, Che voi añemoĩta hesekuéra ha aitýta hembiapo vaikuerakue iñakã ári, péicha he’i Yvága Atykuéra Jára, Ijarateéva.
22Upéi umi querubin omopu’ã ipepokuéra, ha umi ruéda oho hendivekuéra; ha Israel Jára reko jajaipa oĩ hi’arikuéra.
23Ha Ñanderuete reko jajaipa opu’ã pe táva mbytégui ha oñemomombyry pe távagui ha opyta pe cérro kuarahyresẽ gotyogua ári.
24Upéi Ñanderuete Pytu Porãitéva chemopu’ã ha chegueraha jevy che pytu porãme umi Caldeaygua retãme, oikohápe umi jepokuapýpe, ojeguerahava’ekue mbaretépe. Ha oho chehegui umi ojehechaukáva che payetépe.
25Ha che ambohasa opaite mba’e Ñanderuete ohechaukava’ekue guive chéve umi ojeguerahava’ekuépe jepokuapýpe.
Who We AreWhat We EelieveWhat We Do
2025 by iamachristian.org,Inc All rights reserved.
