1 Réyes 13 - Biblia en Guaraní - ?anderuete ?e’? Por? 2015

Peteĩ proféta Judaygua oñe’ẽ pohýi Jeroboámpe

1Péina ápe Ñanderuete ombou iproféta Juda pegua Bet-élpe; Jeroboam oikuave’ẽ jave ha ohapy jave mba’e ryakuã porã.

2Ko proféta kóva ogueru Ñanderuete ñe’ẽ, ha he’i: Kuave’ẽmby renda, kuave’ẽmby renda: Peikuaa porãke David ñemoñare apytégui oúta peteĩ ta’ýra, hérava Josías, ha’e oikuave’ẽva’erã ndeári umi pa’ípe oikuave’ẽmava’ekue ko yyv yvate kóvape ha ohapyva’ekue ndeári mba’e ryakuã porã ha ikanguekuéra ojehapýta ko kuave’ẽmby renda ári.

3Ko ára kóvape Ñanderuete ojapóta pene renondépe peteĩ techaukaha (milágro): Péina ápe ko kuave’ẽmby renda ojekáta, ha oñehẽmbáta pe tanimbu oĩva guive hi’ári.

4Tetã ruvicha Jeroboam ohendúvo Ñanderuete proféta ñe’ẽ he’íva kuave’ẽmby renda Bet-el pegua rehe oipyso ijyva kuave’ẽmby renda gotýo ha he’i: Pejapyhy ichupe; ipo oipysova’ekue katu ijypi ichugui, hatãmbáma, ha ndaikatuvéima omongu’e.

5Ha pe kuave’ẽmby renda ojeka ha oñehẽ itanimbu, Ñanderuete he’i haguéicha iproféta juru rupi.

6Upémaramo tetã ruvicha Jeroboam he’i pe profétape: Ajerure ndéve emba’ejeruremi Ñanderuetépe, Ha’e omonguera jevy hag̃ua che po. Ha pe proféta oñembo’e Ñanderuetépe, ha tetã ruvicha po okuera jevy.

7Ha tetã ruvicha he’i pe profétape: Eju che rógape ha ekaru chendive, ame’ẽse ndéve peteĩ jopói.

8Pe proféta katu he’i tetã ruvichápe: Reme’ẽta ramojepe chéve nde róga mbytere, ndahamo’ãi nendive, ha nda’umo’ãi avei pan ni nday’umo’ãi mba’eve ko’ápe penendive.

9Ñanderuete he’ígui chéve: Aníke re’útei pan ha aníke rey’útei mba’evete hendivekuéra, ha aníke reju jevy pe tape nde reho haguérupi.

10Ha ojevy ambue tape rupi, ha ndohovéima pe tape Bet-élpe ou haguérupi.

11Upéramo oiko Bet-élpe peteĩ proféta itujámava, ha ita’yrakuéra ou ha omombe’upa itúvape opaite mba’e pe ambue proféta ojapova’ekue Bet-élpe, ha omombe’u avei hikuái itúvape umi ñe’ẽ ha’e he’iva’ekue tetã ruvichápe.

12Ha itúva he’i ichupekuéra: Mba’e tape rupípa oho. Ha ita’yrakuéra ohechauka ichupe pe tape mamo oho hague rupi pe proféta Juda pegua.

13Ha ha’e he’i ita’yrakuérape: Pembyape chéve che búrro. Ha ha’ekuéra ombyape ibúrro, ha ha’e ojupi hi’ári,

14ha oho pe ambue proféta rapykuéri, ojohu ichupe oguapy jave peteĩ encína yvyra guýpe, ha he’i ichupe: Nde piko pe proféta ouva’ekue Judágui. Ha ha’e he’i: Che ha’e.

15Upéramo he’i ichupe: Eju chendive che rógape, ha he’u pan.

16Ha’e katu he’i jevy ichupe: Ndaikatúi ajevy nendive, ha ndahamo’ãi nendive, ha nda’umo’ãi pan, ha nday’umo’ãi avei nendive ko’ápe.

17Ñanderuete he’ígui chéve: Aníke re’u pan, ha aníke rey’u upépe, ha aníke reju jevy pe tape reho haguérupi.

18Ha pe ambue he’i ichupe: Che avei peteĩ proféta ndeichagua, ha peteĩ yvága rembiguái (ángel) ombohasa chéve Ñanderuete rembipota, he’ívo: Egueru ichupe nendive nde rógape, ho’u hag̃ua pan ha hoy’u hag̃ua. Ha’e katu ijapu ichupe.

19Upémaramo ojevy hendive hógape ho’u pan ha hoy’u avei.

20Ha ojehu ningo oĩ jave hikuái mesápe, Ñanderuete oñe’ẽ pe proféta ombojevyva’ekue hapichápe.

21Ha kóva he’i pe proféta ouva’ekuépe Judágui: Péicha he’i Ñanderuete: Nde naneñe’ẽrendúigui Ñanderuetépe ha nderejapóigui pe mba’e nde Jára he’imava’ekue ndéve rejapo hag̃ua,

22ha rejevýnte re’u hag̃ua pan ha rey’u hag̃ua avei, upévare nde retekue ndoikemo’ãi nde rukuéra tyvýpe (sepultúrape).

23Ha pe proféta ho’upa ha hoy’upa rire, pe imbojevyhare omboape ichupe ibúrro.

24Ha ojevy jave ohóvo osẽ ichupe peteĩ leõ ha ojuka ichupe, ha hetekue opyta ojepyso tapépe, ha ibúrro oñembo’y ijykére, ha pe leõ oñembo’y avei hetekue ykére.

25Ha umi ohasáva upérupi ohecha pe proféta retekue oĩva tapépe, ha pe leõ oĩva ijykére, ou hikuái ha omombe’u umi tavayguápe oikohápe pe proféta (ijapuva’ekue).

26Ha ohendúvo pe proféta ombojevyva’ekue ichupe hapégui, he’i: Pe proféta naiñe’ẽrendúigui Ñanderuete he’imava’ekuére ichupe, Ñanderuete ome’ẽ ichupe leõme ha péva omyangekõi ha ojuka ichupe, Ñanderuete he’i hagueichaite ichupe.

27Ha oñe’ẽ ita’yrakuérape, he’ívo ichupekuéra: Pembyape jevy che búrro. Ha ha’ekuéra ombyape ichupe g̃uarã pe búrro.

28Upérõ ha’e oho ha ojohu pe proféta retekue ojepyso tapépe, ha ibúrro ha pe leõ oñembo’y ijykére, ha pe leõ ndo’úi hetekue ha nopenái avei ibúrro rehe.

29Upémaramo pe proféta (ijapuva’ekue) ojapyhy Ñanderuete proféta retekue, ohupi ibúrro ári ha ogueraha ichupe itávape, oguerombyasy ha oñotỹ hag̃ua ichupe.

30Ha omoĩ hetekue ityvýpe ha oguerombyasy ichupe, he’ívo: Angái, angái, che ryvytee.

31Ha oñotỹmba rire, oñe’ẽ ita’yrakuérape he’ívo: Che amanoha árape, peẽ cheñotỹta pe tyvy añotỹ haguépe Ñanderuete profétape, pemoñeno che kangue ikanguekue ykére.

32Katuete ojehúta pe ha’e he’imava’ekue Ñanderuete rupi, pe kuave’ẽmby renda Bet-él pegua rehe, ha opaite óga rehe, oñemopu’ãva’ekue yvy yvatépe, Samária yvýpe.

33Peichavéramo jepe Jeroboam ndopiái hape vaígui, omoĩ jevy katu pa’i umi yvy yvatépe g̃uarã tetãyguakuéra apytégui, umi ha’e oipotávape.

34Ko’ã mba’e rehe oñemoangaipa Jeroboam róga, upévagui oñekytĩ ha oñemondoro jevy ichupe yvy ape árigui.