Jeremías 39 - Biblia en Guaraní - ?anderuete ?e’? Por? 2015

Jerusalen ho’a

1Sedequías, Juda retã ruvicha oisãmbyhy aja 9 áño, pe jasy 10-hápe, ou Babilónia retã ruvicha Nabucodonosor isoldádo aty ndetuicháva ndive Jerusalen távape ha omongora hikuái pe tavaguasu.

2Ha Sedequías oisãmbyhy aja 11 áño, jasy irundyhápe ha pe ára 9-hápe umi soldádo ojapo peteĩ kuára pe táva korapy jerekuévo.

3Ha oikepa Babilónia retã ruvicha mburuvichakuéra oĩva ha oguapy pe okẽ mbyte peguápe: Nergal-sarezer, Samgar-nebo, Sarsequim, Nergal-sarezer, peteĩ mburuvichaguasu ha opaite soldádo ruvichakuéra ndive, Rabmag ha opaite ambue mburuvichakuéra.

4Ha Sedequías ha mayma isoldadokuéra ohechávo upéva, osẽ pyhare okañy hag̃ua hikuái Jerusaléngui pe tetã ruvicha ka’avoty rupi, pe okẽ oĩva umi mokõi korapy jere yvate pa’ũ rupi; ha oho Araba rupi ysyry Jordan gotýo.

5Ha umi Caldeaygua soldádo pya’e oho hapykuéri ha ohupity Sedequíaspe Jerico ñúme; ha ojapyhy, ha ogueraha ichupe Riblápe, Hamat yvýpe, Nabucodonosor, Babilónia retã ruvicha rendápe, ha’e he’i hag̃ua mba’épa ojejapóta hese.

6Ha Babilónia retã ruvicha oñakã’ouka Sedequías ra’ykuéra ha imburuvichakuérape Riblápe, Juda retã ruvicha rovake.

7Ha ohesa’o tetã ruvicha Sedequíaspe, ha oipokua ichupe cadénape ogueraha hag̃ua ichupe Babilónia retãme.

8Ha umi Caldeaygua ohapy tetã ruvicha róga ha hetãygua rogakuéra, ha oity hikuái Jerusalen táva tápia yvate.

9Ha umi Judaygua hembymíva guive pe távape, ha umi osẽ jepeva’ekue, Nabuzaradan, pe soldádo ruvicha, oguerahapa Babilóniape.

10Umi mboriahukuéra, oguereko’ỹva mba’eve, Nabuzaradan oheja Juda retãme ha ome’ẽ ichupekuéra iparralty ha ijyvyrã.

Nabucodonosor oñangareko Jeremías rehe

11Ha Nabucodonosor he’i isoldádo ruvicha Nabuzaradánpe Jeremías rehe:

12Eñangareko porã Jeremías rehe ani rejapo hese mba’eve ivaíva, ejapopa ha’e oipotáva guive.

13Upéramo pe soldádo ruvicha Nabuzaradan omondo Nabusazban ha Nergal-sarezer, mokõi mburuvicha ha ambue Babilónia retã ruvicha rembiguaiguasu ndive,

14oguenohẽ hag̃ua Jeremíaspe pe korapy cárcelgui ha omoĩ Gedalías, Ahicam ra’y, Safan remineno (niéto) poguýpe, ha’e oguerahauka hag̃ua Jeremíaspe hogateépe oiko hag̃ua hetãyguakuéra apytépe.

15Ha ou Ñanderuete ñe’ẽ Jeremías rendápe ha’e oĩ aja gueteri jepokuapýpe, ha he’i:

16Tereho ha eñe’ẽ Ébed-mélec, pe Etiopiayguápe, ha ere: Péicha he’i Yvága Atykuéra Jára, Israel Jára: Eikuaa porãke, ajapóta umi mba’evai Che ha’emava’ekue ko táva kóva rehe ha ndaguerumo’ãi jehovasa, ha opaite umi mba’e oikóta nde resa renondépe.

17Upe ára upévape katu Che roipytyvõta, he’iuka ndéve Ñanderuete, ha ndere’amo’ãi nde rekyhyjéva pópe.

18Che roñomíta ha ndere’amo’ãi kyse pukúpe, ame’ẽ jevýtagui nde rekove ndéve peteĩ jopói ramo rejerovia haguére cherehe, he’iuka ndéve Ñanderuete.