Isaías 28 - Biblia en Guaraní - ?anderuete ?e’? Por? 2015

Efrain oñehundíta

1Angái peẽ Efraingua, tetã oka’úva. Reñembotuicha reikoháre cérrope ha nde yvy hi’a porãmba rehe, remomba’eguasu rãngue Ñanderuetépe ome’ẽmba haguére ndéve, nde rejejapo ha reiko rei vy’aguasúpe ha ka’uhápe.

2Pejapysaka porãke, Ñanderuete ombosako’íma peteĩ kuimba’e mbarete ha ipy’aguasúva, amandáuicha ho’áta pende ári ha yvytu jepokávaicha penerãirõtava ha ku ysyry hatãicha pende reitýta yvýre.

3Ipykuéra opyrũmbáta umi Efraingua oka’úva rehe, oñembotuicha haguére.

4Ha pe táva Samária oñembotuicha haguére oikóta ku higo’a tenondeguáva, upe ohecha raẽva ichupe pya’e oipo’o ho’u hag̃ua.

5Upe ára upévape Ñanderuete, yvága atykuéra Jára, oikóta akã jeguaka jajaipa ramo Israel hembymívape g̃uarã;

6Ha’e ome’ẽta Ipytu Porãite umi oporombojovakévape g̃uarã ha ombokatupyrýta isoldadokuéra ombopoguy hag̃ua tetã ambueyguakuérape.

7Ko’ã pa’i ko’ãva ovava joa hikuái oka’úgui. Ipa’i ha iprofetakuéra oka’u joa, ovava hikuái ndoporombojovake porãi ha omomarandu (oprofetiza) vai joaite hikuái.

8 Imesakuéra henyhẽ g̃ue’ẽnguégui ha mba’e ky’águi, ha ndaiporivéima ipotĩmbyréva.

9Umía ko’ág̃a oñe’ẽvai cherehe (Isaías rehe) ha he’i hikuái: Mávapepa ohekombo’ese ha mávapepa omombe’use umi mba’e Ñanderuete ohechaukamava’ekue ichupe. Umi opo’oramóva, isy kámagui ojepe’aramóvapepa.

10Péicha he’i hikuái chéve: Ndépa orembo’e Ñanderuete rembiapoukapy ha ere: Saflasaf, saflasaf (ejapo kóa, ejapo amóa), Kaflakaf, kaflakaf (emba’apo ko’ápe, emba’apo upépe), michĩmi ko’ápe, michĩmi upépe.

11Añetehápe oñe’ẽ hikuái oñe’ẽpa’ãvaicha ha ambue ñe’ẽ meguáicha, péicha ombohasa iñe’ẽ ko tetã kóvape.

12Ha he’i voi ichupekuéra: Ko’ápe oĩ tenda ojepytu’ukuaa hag̃ua, pemombytu’u ikane’õvape; ha ápe oñembopiro’ykuaa; nohenduséi katu mba’evete.

13Ha Ñanderuete ñe’ẽ oikova’erã hekovépe: Saflasaf, saflasaf; kaflakaf, kaflakaf, ejapo kóa, ejapo amóa; emba’apo ko’ápe, emba’apo upépe; michĩmi ko’ápe, michĩmi upépe; oho oñepysãnga hag̃ua ha ho’a hikuái ovayvávo, oñehunga, ojejura ha opyta iñuhãmenguéra.

Ñanderuete oavisa

Jerusalen ruvichakuérape

14Upévare pejapysaka porãkena Ñanderuete ñe’ẽ rehe, peẽ mburuvichakuéra pejopy reíva Jerusalenguakuérape otĩ’ỹre.

15Peẽ pejékuri: Ore roñembopy’apeteĩ ñemano ndive, ha omanóva retãygua ndive rome’ẽma avei ore ñe’ẽ; ág̃a og̃uahẽ vove pe jehavira ku yvytu vaietéicha, ndaorerupitymo’ãi, ore roiporavo pe japu ore ñemo’ãha ramo, ha ñembotavy rokañy hag̃uáme;

16upévare pende Ruete, pende Jára péicha he’i: Peikuaa porãke, Che amboguapýma Siónpe peteĩ ita ogaguasu rapo ramo, peteĩ itaguasu ojeporavopyre hepýva, pe óga rapo oku’e’ỹva rehegua; upe ojeroviáva hese noñehundimo’ãi.

17Pe justícia oikóta albañil sã ramo ha pe ñembojovake iplomáda ramo; ha amandáu oitypeíta pe japu raity, ha y oguerosyrýta ikañyháme.

18Ha pende jekupyty ñemano ndive opa reíta, ha pe ñe’ẽ peme’ẽmava’ekue omanómava retãme opyta reíta; ha og̃uahẽ vove pe jehavira ku yvytu vaietéicha pendereitýta penehundi hag̃uáicha.

19Akói og̃uahẽ vove, katuete pendejapyhýta; ohasátagui ko’ẽ ko’ẽ rehe, ára ha pyhare; ha pehendu vove katuete peñemondyietéta.

20Pe tupa imbykýgui ndaikatumo’ãi ojepyso ipype, ha pe ahoja ipo’ígui ndaikatumo’ãi oñeñuãmba porã ipype.

21Ñanderuete penepytyvõta ojapo haguéicha Perasim cérrope (2 Samuel 5,17-25), Gibeon cerrokuéra pa’ũme (1 Crónicas 14,13-16) ipochy haguéicha ipochy jevýta; ojapo hag̃ua hembiaporã, tembiapo iñambuéva ha oñehendu’ỹva.

22Ko’ág̃a, ani peñembohoryvétei, ani hag̃ua pene ñapytĩhára pendejopyvétei; ahendúma Ñanderuete, he’i hague: Yvága atykuéra Jára jehaviraguasu oúta ko yvy apére.

23Pejapysaka porãke, ha pehendu che ñe’ẽ, pejapysaka, ha pehendu Che ha’éva guive.

24Upe ombovóva pe yvy oñemitỹ hag̃ua, nombovomo’ãi tapia g̃uarã, ha upéi ombojoja ramo pe yvy ape nombojojamo’ãi tapia g̃uarã.

25Ajépa, ombojojapa rire ijyvy ape, omosarambi enéldo, oñotỹ comíno, ombohysýi trígo, ha omoĩ hendag̃uáme cebáda, ha avéna ikokue rembe’y rehe.

26Ñanderuete ohekombo’e voi ichupe, ha ombo’e ichupe hekoitépe;

27pe enéldo ndojejykýiri mba’e ra’ỹi jokahápe, ha pe comíno ra’ỹi ári noñembohasái cárro ruéda, pe enéldo oñenupã yvyra poguasúpe ha pe comíno yvyra po’ípe.

28Umi ojejykýiva temitỹngue ndojejykýi opaite árape, noñemongu’íri ha ndojejokái opaite árape g̃uarã.

29Upéicha ko’ã mba’e osẽ avei Ñanderuete, yvága atykuéra Járagui, hekombo’e iporãite, Ha’e ningo iñaranduetéva.