Ezequiel 36 - Biblia en Guaraní - ?anderuete ?e’? Por? 2015

Israel oñemyatyrõmba jevýta

1Nde, kuimba’e ra’y, emomarandu umi Israel cerrokuérape, ha ere: Israel cerrokuéra, pehendu pende Ruete ñe’ẽ,

2péicha he’i: Umi penderehe ija’e’ỹva he’i haguére: E’a, icerrokuéra yvate oñeme’ẽ oréve ore mba’erã ramo,

3upévare, emomarandu, ha ere: Péicha he’i pende Ruete, opaite tetã oikóva guive pende jerekuévo oñembohorýta penderehe ha pendejopy vaíta pe’a peve ipoguypekuéra.

4Israel cerrokuéra, pehendu pende Ruete ñe’ẽ: Péicha he’i Yvága Atykuéra Jára umi cérro ha umi cérro yképe, umi ysyrykuéra ha ñunguéra, umi óga ho’apava’ekue, umi taperekue ha umi táva ojeheja reiva’ekue, oikova’ekue ambue tetãnguéra poguýpe ha opyta ñembohoryha ramo;

5umi mba’e umíva rupi, pende Ruete péicha he’i: Añetehápe añe’ẽ pochýpe ambue tetãnguéra rehe ha Edom rehe, ha’e ondyry Israel retã rehe, oipotágui che yvy imba’eteerã ramo, ipy’arory ha hi’ãnga ñembohorypópe omondapa ojohúva guive ha omosẽ Israelguakuérape ijyvýgui,

6upévare, ereuka che rérape Israel retã rehe, ha ere umi cérro ha cérro yképe, umi ysyrykuéra ha ñúre: Péicha he’i pende Ruete, peikuaa porãke, che ñeko’õi ha che pochy rupive añe’ẽma, pendereraha haguére ambue tetãnguérape ñembohory ramo.

7Upévare pende Ruete he’i: Che amopu’ãma che po, ha ame’ẽma che ñe’ẽ umi tetã pende jerekuévo oikóva guive oñemotĩva’erãha katuete avei.

8Ha peẽ, Israel cerrokuéra, pende yvyra rakã hi’a porãta che retãme g̃uarã, hi’ag̃uíma upe ára oupa jevy hag̃ua hikuái.

9Pema’ẽ porãke, aiméma añangareko porã jevy hag̃ua penderehe ha ajevýta pene rendápe, pemba’apóta ha peñemitỹ jevýta pende yvyteépe.

10Ha amboheta hetavéta pene retãyguakuéra, mayma Israel róga okakuaave ohóvo, ha oñemopu’ãmbáta ha oñemyatyrõ jevýta opaite óga ho’ava’ekue itavakuérape.

11Amboheta hetavéta Israel yvýpe pene retãyguakuérape ha amoñemoña porãta pene rymbakuéra hetaiterei peve, ha peiko porã hag̃ua ipype ymaguaréicha, ha ajapóta mba’eporãve penderehe iñepyrũ ramoguarégui; ha peikuaáta Che ha’eha pende Ruete.

12Che amoingo jevýta che retã Israel ijyvyteépe; ha’ekuéra oñemomba’éta ijyvy rehe, ha oikóta imba’eteépe, araka’evéma ndoikomo’ãvéi ita’yra’ỹre ha itajyra’ỹ rehe.

13Péicha he’i, pende Ruete: Oje’e ningo penderehe: Nde, yvyarigua ro’o’uha ha reikova’ekue ne retã ra’ykuéra jukaha ramo;

14upévare, neremokõmo’ãvéima yvyarigua ro’o, ha araka’evéma nderejukamo’ãvéi ne retã ra’ykuérape, he’i pende Ruete.

15Ha araka’evéma nahendukamo’ãvéi ndéve tetãnguéra ñe’ẽ ky’a, ha nderehupitymo’ãvéima ñembohory asy tetãnguéragui, ha ndapejukamo’ãvéima pene retã ra’ykuérape, he’i pende Ruete.

16Ou chéve Ñanderuete ñe’ẽ, ha he’i:

17Kuimba’e ra’y, Israel retã oiko ramoguare gueteri ijyvýpe omongy’a voi hembiapo vai rupi heko, ku kuña imba’asy guejývaicha oiko che renondépe.

18Añohẽ che pochy hi’ári, oñohẽgui hikuái tuguy ijyvy rehe ha oñemongy’apa ambue jára gua’u ra’ãnga ñemomba’eguasu rupi,

19upévare amosarambiva’ekue ichupekuéra umi tetã apyte rupi, hape ha hembiapo vaieta rupi ambojovakéta ichupekuéra.

20Ha’ekuéra og̃uahẽ rire ambue tetãnguérape, opyrũ gueteri che reraguasu rehe, oje’e hesekuéra: Ko’ãva Ñanderuete retã, ha ijyvyteégui oñemosẽ hikuái,

21ambyasy ahechávo che reraguasu oñemongy’aha Israel retãygua rupi umi tetã oho haguérupi,

22upévare, ere Israel retãme: Péicha he’i pende Ruete, Che ambotuichave che reraguasu peẽ pemongy’a ramojepe.

23Che añetehápe ambotuicha jevýta che reraguasuete, oñemongy’ava’ekue tetãnguéra apytépe, pene rembiapo vaieta rupi peẽ chemotĩva’ekue; ha umi tetã oikuaáta Che ha’eha pe Oikovéva tapia g̃uarã, he’i pende Ruete, ág̃a amboheko potĩ vove pende rekovépe hesakuéra renondepe.

24Che pojapyhýta umi tetã apytégui, ha pombyatýta opaite tetãgui ha pogueru jevýta pene retãteépe.

25Ahypýita pendeári y potĩ porãitéva penepotĩ hag̃ua opaite pende reko vaikuégui; ha Che pomopotĩta mayma pende jára gua’úgui.

26Ame’ẽta peẽme peteĩ py’a ipyahúva ha amo’ĩta pendepype peteĩ pytu porã ha ipyahúva; ha aipe’áta pende retégui pende py’a itaguiguáva, ha ame’ẽta peẽme peteĩ teko ipyahúva (py’a to’oguiguáva).

27Ha amoĩta pendepype che Pytu Porãitéva, ha ajapóta peẽ peiko hag̃ua che ñe’ẽ he’i háicha, ha peñangarekóta che rembiapoukapy rehe, ha pejapopáta hekoitépe opaite mba’e.

28Peikóta pe yvy ame’ẽmava’ekuépe pende rukuérape, ha peikóta che retãtee ramo, ha Che aikóta peẽme g̃uarã pende Jaratee ramo.

29Che posalváta opaite pende reko vaígui; amoheñói porãta pende trígo amboheta hetave hag̃ua ha ñembyahýi nog̃uahẽmo’ãvéima araka’eve pene retãme.

30Upéicha avei amboheta hetavéta umi yvyra’a, ha pende koga’a, anive hag̃ua peteĩ ambue tetãnguéra renondépe peneñembyahýire.

31Peẽ penemandu’áta pende rape vaikue rehe, ha pene rembiapo vaikue rehe; ha petĩta pendejehegui pene ñaña rekógui ha pene rembiapo vaietégui.

32Peikuaa porãke, ndajapói ko’ã mba’e penderehe, cherehehápe uvei he’i pende Ruete; petĩ joaitéke ha pende py’a tarova pene ñaña reko rehe, nde, Israel retã.

33Péicha he’i pende Ruete: Og̃uahẽta katuete pe ára Che pomopotĩ hag̃ua pene ñaña rekógui, aheja jevýta peiko porã pende tavakuérape, ha umi óga ho’ava’ekue oñemyatyrõmba jevýta.

34Ha pe yvy oñembotapereva’ekuépe oñemba’apo jevýta, ha ikokuere nandípe oñemba’apo porã jevýta opavave ohasáva resa renondépe.

35Ha he’íta hikuái: Ko yvy oñembotapereva’ekuégui ko’ág̃a oiko Eden kógaicha; ha ã táva ñembyaipa ha oñembotapereva’ekue oñemopu’ã jevýta ikora reheve, ojeiko porã hag̃ua ipype.

36Ha umi tetã pende jerekuévo ohechakuaáta Che amopu’ã jevytaha umi mba’e aityva’ekue, ha añotỹ jevytaha pe kokue ambotapereva’ekue ikokuerépe; Che, pende Ruete añe’ẽma, ha ajapopáta avei ha’éva guive.

37Péicha he’i, pende Ruete: Ko’ã mba’e rire, ajapovéta gueteri ambue mba’eporã Israel rógape g̃uarã; amboheta hetavéta hetãyguakuéra ku tymba atykuéra oñemboheta háicha.

38Umi ovecha hetaiterei háicha Jerusalen areteguasu aja, péicha umi táva itapereva’ekue henyhẽ jevýta hetãygua atýgui; ha oikuaáta hikuái Che ha’eha pende Ruete.