Salmokuéra 105 - Biblia en Guaraní - ?anderuete ?e’? Por? 2015

Ñanderuete rembiapo tuicha Israel ndive g̃uarã

1Pehechakuaa Ñanderuetépe, pemomba’eguasu héra opaite tetãme, peikuaauka hembiapo techapyrãva.

2Pepurahéi ichupe, pembopu árpa ichupe g̃uarã, penemandu’a imilagrokuéra rehe.

3Pembotuicha héra porãite, tahoryete umi yvyarigua py’py ohekáva Ñanderuetépe.

4Peheka Ñanderuetépe ha ipu’aka, peheka tapiaitéke hova.

5Peñemomandu’áke umi tembiapo Ha’e ojapova’ekue rehe, umi mba’e techapyrã rehe ha mba’éichapa Ha’e ombojovake porãite.

6Peẽ, Abraham ñemoñarenguéra, Jacóbo ra’yrekuéra, peñemomandu’áke hembiapóre.

7Ha’ehína Ñanderuete, Ñandejára, Ha’e ombojovake opaite kuimba’e ha kuñakuérape oĩva guive ko yvy apére.

8Tapiaite taimandu’a iñe’ẽme’ẽ rehe, iñe’ẽ he’iva’ekue oikova’erã 1.000 ñemoñarépe g̃uarã (generaciónes).

9Ome’ẽma Abrahámpe iñe’ẽ, ha oñembopy’apeteĩ Isaac ndive, umía rehe peñemomandu’ava’erã.

10Ha Jacóbope g̃uarã ome’ẽ iñe’ẽ hembiapoukapy ramo ha Israélpe g̃uarã ijekupyty tapia g̃uarãva ramo,

11he’ívo: Ndéve ame’ẽta Canaan yvy, ne mba’eteerã ramo.

12Umi árape ha’ekuéra imbovy gueteri, ha tetã ambueygua ramo oiko hikuái ipype.

13Ha’ekuéra oguata peteĩ tetãgui ambue tetãme, peteĩ tetã ruvichágui ambue tetã ruvichápe.

14Ndohejaiva’ekue avavépe ojopy vai ichupekuéra, ha hesehápe ohavira umi tetã ruvichakuérape.

15Ha he’i: Aníke pepokótei che rembiporavokuéra rehe, ha aníke pejapótei mba’eve ivaíva che profetakuéra rehe.

16Ha Ñanderuete oguerúvo ñembyahyiguasu yvy apére ohundi hag̃ua opaichagua hi’upyrã.

17Ha’e voi omondo peteĩ kuimba’épe henonderãme hérava Jose, oñevendeva’ekue ichupe tembiguái ramo.

18Ombohasypa ipykuéra omoingévo yvyrakuápe, ha ijajúrare omoĩ peteĩ cadéna.

19Ojehu peve pe ñe’ẽ Jose he’iva’ekue ha Ñanderuete omboheko porã meve ichupe ijehasa asy rupi.

20Pe tetã ruvicha omondo peteĩ hembiguái opoi hag̃ua ichugui, pe tetãnguéra ruvichaguasu voi omosãso ichupe.

21Hogateépe omoĩ ichupe mburuvicha ramo, ha opaite mba’e oguerekóva guive omoĩ ipoguýpe.

22Ombo’e hag̃ua ambue mburuvichakuérape, Jose ombo’ese haichaite, ha omoarandu hag̃ua karaiguasukuérape.

23Upéi Israel oike Egíptope, ha Jacóbo ou oiko hag̃ua Cam yvýpe.

24Ñanderuete katu omboheta hetave ohóvo hetãme, ha omombareteve ichupekuéra hesekuéra ija’e’ỹvagui.

25Upémaramo Egiptoygua py’apy oñemoambue ojopyete hag̃ua Israel retãme ha ombyai hag̃ua ichupekuéra.

26Upéi omondo hembiguái Moiséspe, ha hembiporavopyre Aarónpe,

27ha umía oñe’ẽ pohýi faraónpe ha ojapo heta milágro Cam yvýpe.

28Ñanderuete ombou ypytũ, ha iñypytũmba oparupiete péicha ramojepe, ha’ekuéra naiñe’ẽrenduséi.

29Hi’ýgui ojapo tuguy ha ojukapa ipirakuéra.

30Ijyvy omyenyhẽ ju’ietágui, hetã ruvicha róga kotykuérape jepe.

31Ñanderuete oñe’ẽ ha ou mbutueta ha ñati’ũgui omyenyhẽ pe tetã.

32Ama rãngue katu ombou amandáu ha aratiri oveve hetãpy rehe.

33Ombyaipa iparralty ha hi’igoty, ha hetã ryepýpe omopẽmba ijyvyrakuéra.

34Oñe’ẽ ha ou tukueta omyenyhẽte peve ijyvy,

35ha umía omoperõmba ojohúva guive iñu térã ikokuépe,

36uperire ojuka maymaite ita’ýra ypykue Egípto retãme, ituvakuéra mbaretekue tenondeguáva.

37Upéi oguenohẽ Israelguakuérape pláta ha óroita reheve, ha ijapytépe ndaipóri hasýva.

38Egiptoyguakuéra ovy’a osẽ haguére hikuái, okyhyjeitereígui Israelguakuéragui.

39Ñanderuete ojaho’i ichupekuéra arai reheve, ha tata ohesapéva pe pyhare pukukue rupi.

40Ojerure hikuái, ha ombou ynambueta, ha pan (mana) yvagaguiguáva omohyg̃uatã hag̃ua ichupekuéra.

41Ombokua pe itaguasu ha yeta otororõ ha osyry yvy perõ rupi ku ysyrýicha.

42Ñanderuete imandu’águi iñe’ẽme’ẽ rehe, ome’ẽva’ekue hembiguái Abrahámpe.

43Upéicha oguenohẽ hetãme vy’apópe, ha hembiporavopyréva osẽ torypápe.

44Ome’ẽ ichupekuéra ambue tetãnguéra yvy, ha umi tetã rembiapokue opyta rei ichupekuéra imba’etee ramo,

45ojapo hag̃ua hekoitépe hembiapoukapy ha hembipota, alelúia.