2 Réyes 24 - Biblia en Guaraní - ?anderuete ?e’? Por? 2015

1Hi’árape ojupi Nabucodonosor, Babilónia retã ruvicha, isoldádo atyguasu reheve. Ha Joacim oiko hembiguái ramo mbohapy áño pukukue, ha upéi oñemoĩ hese.

2Ha Ñanderuete ombou Joacim rendápe soldádo aty tuicha Caldéa pegua, Síria pegua, Moab pegua, Amon pegua, ohundi hag̃ua ichupe ha Juda retãme, Ñanderuete he’i haguéicha iprofetakuéra rupi.

3Ko’ãva ou Juda retãme Ñanderuete oipotágui ha omosẽségui hetãgui, Manases rembiapo vaieta rehe;

4ha’e oñohẽ haguére avei umi heko potĩva ruguy, ha omyenyhẽ Jerusalénpe huguýgui, upévare Ñanderuete noperdonasevéi ichupekuéra.

5Ambue Joacim rembiapokue ha opaite mba’e ojapova’ekue ojehaipa Juda retã ruvichakuéra rembiapokue kuatiañe’ẽme.

6Ha Joacim omano rire, ita’ýra Joaquin oisãmbyhy Juda retã ruvicha ramo, itúva rendaguépe.

7Ha Egípto retã ruvicha nosẽvéi araka’eve hetãgui; pe Babilónia retã ruvicha oipe’apaitégui ichugui umi tetã yvy Egípto ysyry guive Éufrates ysyry peve.

Joaquin ha umi mburuvicha ojegueraha jepokuapyhápe Babilóniape

8Joaquin oguerekorõ 18 áño oñepyrũ oisãmbyhy, ha’e oisãmbyhy Jerusalénpe mbohapy jasy Nabucodonosor poguýpe; ha upéi oñemoĩ hese. Isy réra Nehusta, Elnatan rajy, peteĩ Jerusalengua.

9Ha ojapo ivaíva Ñanderuete resa renondépe, opaite mba’evai ijypykuéra ojapo haguéicha.

10Umi ára umívape Nabucodonosor, Babilónia retã ruvicha rembiguaikuéra ou ojeitývo Jerusalen ári, ha omongora hikuái pe táva.

11Ha Nabucodonosor, Babilónia retã ruvicha, ou avei Jerusalénpe, hembiguaikuéra omongorapa riréma.

12Upémaramo osẽ Joaquin, Juda retã ruvicha, Babilónia retã ruvicha rendápe, isy, hembiguaikuéra, mburuvichakuéra ha isoldádo ruvichakuéra; ha Babilónia retã ruvicha oapresa ichupe, Joaquin oisãmbyhy rire 8 áño Juda retã ruvicha ramo.

13Ha Nabucodonosor oguenohẽ opaite mba’erepyeta Ñanderuete rogaguasúgui ha tetã ruvicha rógagui, ha oipe’auka opaite óro oñu’ãva umi tembiporu ojeporúva Ñanderuete róga rembiapópe, Ñanderuete he’i haguéicha ha Salomón ojapoukava’ekue.

14Ha ogueraha jepokuapýpe opaite mburuvicha ha umi soldádo ruvicha ipy’aguasúva oĩva Jerusalénpe omboty peve 10.000 jepokuapýva. Ogueraha avei umi omba’apokuaáva hierro rehe ha yvyra rehe. Upéicha, Jerusalénpe hemby imboriahúvante.

15Ogueraha avei jepokuapýpe Joaquínpe, tetã ruvicha sýpe, tetã ruvicha rembirekokuérape, isoldádo ruvichakuérape, ha avei karaiguasukuérape; jepokuapýpe ogueraha ichupekuéra Jerusaléngui Babilónia retã meve.

16Babilónia retã ruvicha ogueraha avei 7.000 soldádo ipy’aguasuvéva, 1.000 carpintéro ha herrerokuéra jepokuapýpe Babilóniape.

17Ha Babilónia retã ruvicha omoĩ Joaquin rendaguépe, Juda retã ruvicha ramo Mataníaspe, Joaquin tio, ha ohenói ichupe Sedequías.

Sedequías oisãmbyhy

18Sedequías oñepyrũ ramo oisãmbyhy oguereko 21 áño, ha’e oiko tetã ruvicha ramo Jerusalénpe 11 áño. Isy réra Hamutal, Jeremías rajy, peteĩ Libnaygua.

19Ha’e ojapo avei ivaíva Ñanderuete resa renondépe, Joacim ojapo hagueichaite.

20Ñanderuete ipochy Jerusalengua ha Judayguakuéra ndive, upévare oity ichupekuéra ijypýgui. Ha Sedequías opu’ã Babilónia retã ruvicha rehe.