2 Crónicas 22 - Biblia en Guaraní - ?anderuete ?e’? Por? 2015

Ocozías oiko Juda retã ruvicha ramo

1Umi Jerusalengua omoĩ hetã ruvicha ramo, Joram rendaguépe, ita’ýra pahague Ocozíaspe: Peteĩ tetã ambueygua aty iñorãirõ rembiporu reheve ha hendivekuéra umi Arabiaygua aty ou ha ojukapákuri opaite ityke’ýra tuichavévape, upévagui Ocozías, Joram ra’y, oisãmbyhy Juda retã ruvicha ramo.

2Ocozías oñepyrũvo oisãmbyhy oguereko 22 áño, ha oisãmbyhy peteĩ áño Jerusalénpe. Isy héra Atalía, Omri rajy.

3Ocozías oiko avei Acab róga rape rehe, isy ohekombo’égui ichupe oiko hag̃ua ñaña rekópe (2 Réyes 8,26).

4Ha ojapo ivaíva Ñanderuete resa renondépe, Acab rogaichaite; itúva omano rire ha’ekuéra ohekombo’e ichupe iñehundirãre.

5Ha Ocozías oikókuri ojehekombo’e háicha ichupe, ha upévare oho Joram, Acab, Israel retã ruvicha ra’y ndive, ojeity hag̃ua Hazael, Síria retã ruvicháre. Ramot, Galaad retãme katu Siriayguakuéra oikutu Jorámpe.

6Ha Joram ojevy Jizreélpe oñepohãno hag̃ua, Ramótpe, ijekutukuégui, oñorãirõ ramoguare Ramótpe, Hazael, Síria retã ruvicha ndive. Ha Ocozías, Joram ra’yre, Juda retã ruvicha, oguejy Jizreélpe oñandu hag̃ua Joram, Acab ra’ýpe, ha’e hasyetégui upépe.

Jehu ojuka Ocozíaspe

7Ko’ã mba’e ningo Ñanderuete voi ombosako’i, ohundi hag̃ua Ocozíaspe oñandu jave Jorámpe. Og̃uahẽvo upépe, Ocozías osẽ Joram ndive, ojeity hag̃ua Jehu, Nimsi ra’y ári, pévape Ñanderuete oiporavóma ohundi hag̃ua Acab ñemoñarenguérape.

8Ha Jehu ombojovakévo Acab rogayguápe, ojohu upépe avei Juda ruvichakuérape, ha Ocozías ryke’y ra’ykuérape, oikóva Ocozías rembiguái ramo, ha ojukapa ichupekuéra.

9Ha oheka hikuái Ocozíaspe, okañyva’ekue Samáriape, ha ojohu rire hikuái ichupe, ogueru Jehu rendápe, ha ha’e ojukauka ichupe; ha oñotỹuka ichupe he’ígui: Josafat ra’y ningo, ha’e ipy’aite guive ohekava’ekue Ñanderuetépe. Ha Ocozías rogaygua ndaipu’akavéi oiko hag̃ua tetã ruvicha ramo.

Atalía mbaretépe oiko tetã ruvicha ramo

10Upéramo Atalía, Ocozías sy, ohechávo imemby ojejuka hague, opu’ã ha ohundipaite Juda retã ruvicha ñemoñarenguérape.

11Josabat katu, tetã ruvicha Joram rajy, ojapyhy Joas, Ocozías ra’ýpe, ha omokañy ichupe, ambue tetã ruvicha ra’ykuéra ojejukámagui, ha oñomi ichupe ha herekuápe peteĩ kotýpe oñeñongatuhápe frazadakuéra, savana ha arambohakuéra. Péicha Josabat, tetã ruvicha Joram rajy, pa’i Joiada rembireko (ha’e Ocozías reindy) omokañy Jóaspe, Atalía renondégui, upévare ndojohúi ichupe ojuka hag̃ua avei.

12Ha oiko hendivekuéra kañyháme Ñanderuete rogaguasúpe 6 áño pukukue. Ha upeaja Atalía oiko tetã ruvicha ramo.