1Pehendúke Israel ra’ykuéra ko ñe’ẽ kóva pende Ruete he’imava’ekue penderehe: Egípto retãgui aguenohẽva’ekue pende ypykuérape.
2Tetãnguéra yvy ape apytégui Che poiporavova’ekue, upévare Che pohaviráta pemboyke haguére che rembipota.
3Oguatánepa mokõi oñondive, ndoikói ramo peteĩ ñe’ẽme.
4Okororõnepa pe leõ ka’aguýpe ndaipóri ramo hembi’urã, ha pe leõ ra’yrusu okororõnepa ikehápe ndojapyhýi ramo hembi’urã.
5Ho’ánepa peteĩ guyra ñuhãme ko yvy apére, noñembosako’i porãi ramo pe ñuhã. Opónepa pe ñuhã ndaipóri ramo mba’eve ho’ava’ekue ipype.
6Oñembopúnepa pe turu tavapýpe, oñemondyi’ỹre tavayguakuéra. Oĩnepa jehasa asy (desgrácia) peteĩ tavapýpe, pende Ruete ndojapoukái ramo.
7Pende Ruete ndojapomo’ãi mba’eve, oikuaauka’ỹre hembiguái profetakuérape umi mba’e Ha’e ojapótava.
8Ha okororõ ramo pe leõ, máva piko ndokyhyjemo’ãi. Ha Ñanderuete, pe Jára ipu’akapáva oñe’ẽ ramo, máva piko ndoprofetizamo’ãi.
Samária oñembyaíta9Peikuaauka Asdod ha Egípto retã rogaguasúpe oikóvape, ha peje: Peñembyaty Samária cérrope pehecha hag̃ua ojejopy asytaha opaite ipype oikóva guive, ha ohasa asýta upe oikéva guive ipype.
10Ha’ekuéra ndoikói hekoitépe, he’i pende Ruete, oikónte ombyaty mbyaty hag̃ua imondapyre hogaguasukuérape.
11Upévare pende Ruete he’i: Umi oñemoĩva penderehe opáguio oúta ha omongoráta pende táva ha oitýta pende kora yvate, pende táva mo’ãha, ha omondapáta ojohúva guive pende rogaguasúpe.
12Péicha he’i pende Ruete: Upe ovecha rerekua oipe’a háicha leõ jurúgui mokõi ovecha retymakue, térã inambi pehẽngue jepe, péicha okañýta avei umi Israel retãygua Samáriape oikóva, oguerahánte pe savana hupa pegua ha iguapyha guasúgui peteĩ ao pehẽnguénte.
13Pehendu ha pehecha porãkuaa peẽ Jacóbo ñemoñare umi mba’e Yvaga Atykuéra Jára, Ñanderuete he’íva penderehe:
14Upe ára upévape ahaviráta Israélpe oñemoĩ haguére cherehe, aitýta ikuave’ẽmby renda oĩva Betélpe, oñekytĩta hatĩnguéra ha ho’áta yvýre.
15Aitýta hóga araro’y ha arahakúpe g̃uarãva avei, ha umi kotyguasu elefánte rãingueguiguáva oñehundíta, upéicha oñembyaipáta heta óga, he’i pende Ruete.
Who We AreWhat We EelieveWhat We Do
2025 by iamachristian.org,Inc All rights reserved.
