1Ko’ã mba’e rire ou umi Moab ha Amon ñemoñarenguéra ha hendivekuéra ou avei ambue Amonguakuéra, Josafat retãme, ojeity hag̃ua hi’ári.
2Ha oĩ oúva omombe’u hag̃ua Josafátpe, ha he’i: Og̃uahẽma hetaiterei yguasu mboypyrigua ha Siriaygua; ha péina oiméma hikuái Hazezon-tamárpe, pevahína Engedi.
3Ha Josafat okyhyjeiterei; ha ojejoko Ñanderuete rehe omba’eporandu hag̃ua ichupe, ha he’iuka opavavépe ojehasa hag̃ua karu’ỹre Juda retãme.
4Ha Judayguakuéra oñembyaty ojerure hag̃ua Ñanderuetépe oipytyvõ hag̃ua ichupekuéra, ambue Juda tavakuéragui ou avei ojerure hag̃ua Ñanderuete pytyvõ rehe.
5Upémaramo Josafat oñembo’y Juda ha Jerusalengua atyguasu renondépe, Ñanderuete róga korapýpe.
6Ha oñembo’e: Ore Ruete, ore rukuéra Jára, Nde ningo yvagakuéra Jára, ha nde poguýpe oĩmba tetãnguéra pu’aka. Nde pópe oĩ mbarete ha pu’akapa, ha ndaipóri avave ipu’akakuaáva nderehe.
7Ore Jaratee, Nde remosẽva’ekue ko’ã tetãnguéra ne retã Israel renondégui, ha reme’ẽva’ekue ko yvy Abrahámpe ha ne angirũ (amígo) ñemoñarenguérape opaite árape g̃uarã.
8Ha’ekuéra oiko hag̃ua ipype, ha omopu’ã hag̃ua nde rogaguasu nde rérape g̃uarã, ha he’i:
9Ou ramo mba’evai ore ári, térã kyse puku, térã mba’asy vai iñasãiva, térã ñembyahýi, roñembojava’erã ko ogaguasu renondépe, ha ne renondépe (nde réra oĩgui ko óga kóvape), ha orejepy’apýgui romba’ejerure asýta ndéve, ha Nde orerendu ha oresalváta katuete.
10Péina ko’ág̃a, Amon ha Moab ñemoñarenguéra, ha umi Seir cérro rupigua, ijyvy rupi Nde ndereipotáikuri Israel ohasa ou ramoguare Egíptogui, reipotánte oñemboykékuri ichuguikuéra, ha ani ohundítei ichupekuéra.
11Ema’ẽ, mba’éichapa ha’ekuéra omyengoviase ore rembiapo porã, ou hikuái oremosẽ hag̃ua ko yvýgui Nde reme’ẽmava’ekue oréve.
12Ore Jaratee, nerembojovakéipa ichupekuéra. Orepype ningo ndaipóri mbarete, ore rombopoguy hag̃ua pe aty tuichaitévape; ndoroikuaái mba’épa rojapóta; upévare rojerure Nde rema’ẽ hag̃ua orerehe.
13Ha opaite Judaygua oñembo’y joahína Ñanderuete renondépe, mitãkuéra, hembirekokuéra imembykuéra ndive.
14Ha oĩkuri upépe Jahaziel, Zacaría ra’y, Benaías ra’yre, Jeiel ra’yre, Matanías ra’yre, Asaf ñemoñare peteĩ Levigua, ha Ñanderuete Pytu Porãitéva ou hi’ári.
15Ha he’i: Pehendu, opaite Judayguakuéra, ha peẽ Jerusalenguakuéra ha nde, tetã ruvicha, Josafat. Péicha Ñanderuete he’i peẽme: Ani pekyhyjétei ha ani pende py’aryrýitei ko atyguasuete renondépe, kóa ningo ndaha’éi pene ñorãirõrã, Ñanderuete ñorãirõrãnte.
16Ko’ẽrõ pejeitýta hi’arikuéra, ha’ekuéra ojupitahína Sis rape yvate rupi, ha pejohúta hesekuéra pe yakã ypýpe, Jeruel desiérto mboyvemi.
17Napeẽmo’ãi peñorãirõtava, pepyta kirirĩháme, pehecha hag̃ua mba’éichapa Ñanderuete pendesalváta. Juda ha Jerusalen ani pekyhyjétei ha ani pende py’akangýtei; ko’ẽ ramo pehóta hendapekuéra, Ñanderuete oĩta penendive.
18Upémaramo Josafat oñakãity, opaite Judaygua ha Jerusalenguakuéra ndive ha oñesũ Ñanderuete renondépe, ha omomba’eguasu hikuái Ñanderuetépe.
19Ha opu’ã Leviguakuéra, Coat ha Core ra’ykuéra, ha opurahéi hatã ha sapukaipópe omomba’eguasu Ñanderuete, Israel Járape.
20Ambue pyharevete opu’ãvo osẽ hikuái Técoa desiértope. Ha ha’ekuéra osẽ aja, Josafat, oñembo’yha guive, he’i: Cherendumi peẽ Juda ha Jerusalenguakuéra. Pejerovia Ñanderuete, pende Járare, ha peime kyhyje’ỹre; peguerovia iprofétape ha osẽ porãmbáta peẽme opaite mba’e peipotáva.
21Ha oñomongeta rire tetãyguakuéra ndive, omohenda umi opurahéiva ñorãirõhára renondépe, oguerekóva iñorãirõ rembiporukuéra ipópe omomba’eguasu hag̃ua Ñanderuetépe, ha ko’ã opurahéiva oñemonde ao jeguakápe ojeporúva omomba’eguasu hag̃ua Ñanderuete rogaguasúpe, ha opurahéi: Pemomba’eguasúke Ñanderuetépe, oiporiahuverekógui opaite árape hetãyguakuérape.
22Ha oñepyrũvo opurahéi hikuái purahéi omomba’eguasúva Ñanderuetépe, Ha’e oñemoĩ Amon, Moab ñemoñarenguéra ha umi Seir cérro rupigua rehe, umi ñuhãrã ha’ekuéra omoĩva’ekue Judápe g̃uarã, ha ojojuka joa hikuái ojoapytépe.
23Umi Amon ha Moab ñemoñare ojeity umi Seir cérro rupigua rehe ojuka ha ohundi hag̃ua ichupekuéra; ha ohundipáma ramo umi Seir cérro rupiguápe, oñopytyvõ hikuái oñohundi hag̃ua ojoapytépe.
24Ha Judayguakuéra ojupi rire pe cérrope, oma’ẽ hikuái pe atyguasuete rehe, ha péina ojepyso joa yvýre te’õnguekuéra, ha avave nokañýi.
25Upémaramo Josafat ha hetãyguakuéra oúnte, ogueraha hag̃ua imba’erepykuéra, ha te’õngue apytépe ojohu hikuái hetaiterei mba’erepy, heta ao, jeguaka hepýva, tymba atykuéra, hetaitereígui ndaikatúi oguerahapa; mbohapy ára pukukue ombyaty hikuái imba’erepy hetaitereígui.
26Ha pe ára irundyhápe oñembyaty hikuái Beraca cerrokuéra pa’ũme; upépe omomba’eguasu hikuái Ñanderuetépe, ha upévagui ombohéra hikuái pe yvy Beraca (ñemomba’eguasu) válle ko ára kóva peve.
27Ha opaite Judaygua, Jerusalenguakuéra ha Josafat ojere ou jevy hag̃ua vy’apópe Jerusalénpe, Ñanderuete ombovy’águi ichupekuéra, osalvávo ichupekuéra hese ija’e’ỹvakuéragui.
28Ha ou hikuái Jerusalénpe, mbaraka, árpa ha trompéta púpe, Ñanderuete rogaguasúpe.
29Ha Ñanderuete kyhyje ho’a opaite tetãnguéra ári, ohendúvo Ñanderuete oñemoĩ hague hese ija’e’ỹvare.
30Ha Josafat retãme ojeiko pytu’upópe, Ñanderuete ome’ẽgui ichupekuéra py’aguapy.
Josafat rekove ñesãmbyhy31Péicha Josafat oisãmbyhy Juda retãme, 25 áño Jerusalénpe, ha oñepyrũvo oisãmbyhy oguerekókuri 35 áño. Isy réra Azuba, Silhi rajy.
32Ha’e oiko itúva Asa rape rehe, oñemboyke’ỹre ichugui, ha ojapo iporãva Ñanderuete resa renondépe.
33Upeichavéramo jepe ndojepe’ái umi ñemomba’eguasu yvy yvatépe; tetãyguakuéra nombojojapáigui gueteri ipy’akuéra ituvakuéra Jára ndive.
34Ambue Josafat rembiapokue, iñepyrũmby ha ipaha pegua, ojehai Jehu, Hanani ra’y kuatiañe’ẽme, ha péva oñemoĩ Israel ruvichakuéra rembiapo kuatiañe’ẽme.
35Ohasapa rire ko’ã mba’e, Josafat, Juda retã ruvicha, oñemoirũ Ocozías, Israel retã ruvicha ndive, ha’e katu heko ñaña,
36ha oñomoirũ hikuái ojapo hag̃ua barcoguasu oho hag̃ua Tarsíspe; ha umi barcoguasu ojejapo Ezion-géberpe.
37Upéramo Eliezer, Dodava ra’y, peteĩ Maresaygua, oprofetiza Josafátpe, he’ívo: Reñemoirũgui Ocozías ndive, Ñanderuete ombyaíta ne rembiapokue. Ha umi barcoguasukuéra oñembyaipáta, ha ndaikatúi oho hikuái Tarsíspe.
Who We AreWhat We EelieveWhat We Do
2025 by iamachristian.org,Inc All rights reserved.
