1Upéi ojupi Nahas, Amon retã ruvicha, ha oñemohenda ojeity hag̃uáicha Jabes ári, Galaad reheguápe, ha umi Jabesgua he’i Naháspe: Eikéna orendive jekupytýpe, ha roikóta ne rembiguái ramo.
2Ha Nahas, Amon retã ruvicha, he’i ichupekuéra: Aikéta jekupytýpe penendive, ahekýita ramo opaite pende resa akatúa, opyta hag̃ua ñemotĩrã mayma Israelgua ári.
3Upémaramo Jabes karai ancianokuéra he’i ichupe: Eme’ẽna oréve 7 ára, romondo hag̃ua ñe’ẽ rerahahára opaite Israelguakuérape; ha ndaipóri ramo avave orepytyvõtava rosẽmbáta ne rendápe.
4Ha og̃uahẽvo umi ñe’ẽ rerahahára Gibéa pegua, Saul oikohápe, ohenduka ko’ã ñe’ẽ Israelguakuérape, ha ohendúvo umi ñe’ẽ osapukái ha ojahe’opa hikuái.
5Ha Saul og̃uahẽvo kokuégui hymba gueikuéra rapykuéri; oporandu: Mba’éiko ojehu tetãyguakuérape. Mba’érehe piko hasẽ hikuái. Ha oñemombe’u ichupe Jabesgua ñe’ẽ.
6Saul ohendúvo ko ñe’ẽ, Ñanderuete Pytu Porãitéva ou hi’ári ha ha’e oñeko’õiete.
7Ha ojapyhy hymba gueikuéra jovaivévape oipehe’ãmbaite ha oguerahauka Israel retã rupi, ha he’i: Peichaite ojejapóta pene rymba gueikuéra rehe napeseĩ ramo Saul ha Samuel rapykuéri. Ha Ñanderuete kyhyje ho’a hetãyguakuéra ári, ha osẽmbaite hikuái peteĩ kuimba’éicha.
8Ha ojepapa ichupekuéra Bezécpe, ha ojejohu Israel ñemoñarenguéra apytégui 300.000 ha Judaygua 30.000 kuimba’e.
9Ha he’i hikuái umi ñe’ẽ reruharépe: Péicha pejéta Jabesguakuérape: Ko’ẽ ramo, pe kuarahy oñepyrũvo haku, Ha’e pendesalváta. Ha oñemombe’u rire Jabesguakuérape, ovy’aite hikuái.
10Ha umi Jabesgua he’i Amon ñemoñarenguérape: Ko’ẽ ramo rosẽta pene rendápe, pejapo hag̃ua orehegui peẽme iporãve háicha.
11Ha ambue ko’ẽme Saul omohenda hetãyguakuérape mbohapy atyguasúpe, ha oike hikuái pyharevete Amon ñemoñarenguéra rekohápe ha ojuka ichupekuéra asajepyte peve; ha umi hembymíva guive oñemosarambipa, ndopytavéi peve mokõi oñondive.
12Upéramo Israelguakuéra he’i Samuélpe: Mávapa umi he’iva’ekue: Saul piko oikóta tetã ruvicha ramo ñandeári. Toñeme’ẽ oréve umi kuimba’e jajuka hag̃ua.
13Ha Saul he’i: Ko árape avave nomanomo’ãi, Ñanderuete oipytyvõ porã haguére Israélpe.
14Samuel katu he’i: Peju ha jahapa Gilgálpe, ha ñambopyahu jevy Israel retã ruvicha reko.
15Ha hetãyguakuéra ohopaite Gilgálpe, ha upépe omohendaite Saúlpe tetã ruvicha ramo Ñanderuete renondépe. Ha oikuaave’ẽ upépe kuave’ẽmby py’aguapy reheguáva Ñanderuete renondépe, ha upépe ovy’aite Saul ha opaite Israelguakuéra.
Who We AreWhat We EelieveWhat We Do
2025 by iamachristian.org,Inc All rights reserved.
