1Upérõ Elías, peteĩ Tisbetgua, Galaadgua yvýgui, he’i Acábpe: Ñanderuete, Israel Jára, pe oikovéva tapia g̃uarã chejokuái che ha’e hag̃ua ndéve ko’ã áño pukukue javeve ndoikomo’ãiha ama ni ysapy, che ñe’ẽ rupímante.
2Ha Ñanderuete he’i Elíaspe:
3Ejei ko’águi ha tereho jevy kuarahyresẽ gotýo, ha ekañy Querit yakãme, opytáva ysyry Jordángui kuarahyresẽ gotýo.
4Rey’úta pe yakãgui, ha Che ha’éma yryvukuérape nemongaru hag̃ua upépe.
5Ha ha’e oho Ñanderuete he’i haguéicha, ha oiko Querit yakã rembe’ýre, opytáva Jordángui kuarahyresẽ gotýo.
6Ha pyhareve ha ka’aru yryvukuéra ogueru ichupe so’o ha pan, ha Elías hoy’u pe yakãgui.
7Péicha ohasa ohóvo umi ára ha ou ikã pe yakã, ndokyvéigui yvy apére.
Elías ha kuña imenave’ỹva Sarepta pegua8Upéi Ñanderuete he’i ichupe:
9Epu’ã, tereho Saréptape, peteĩ Sidon pegua táva, ha eiko upépe, péina ápe Che ha’émakuri peteĩ kuña imenave’ỹvape nemongaru hag̃ua.
10Upémaramo ha’e opu’ã ha oho Saréptape. Ha og̃uahẽvo pe táva rokẽme, péina upépe peteĩ kuña imenave’ỹva ombyaty jepe’a, ha Elías ohenói ichupe he’ívo: Ajerure ndéve eguerumína chéve peteĩ váso ymi hay’u hag̃ua.
11Ha ha’e oho ogueru pe y. Upéi Elías he’i jevy ichupe: Ajerure ndéve egueru avei peteĩ pan pehẽnguemi nde pópe chéve.
12Ha ha’e he’i: Ñanderuete, nde Jára rérape, ha’e ndéve ndarekoiha che mba’yrúpe pan ojypyréva; trígo ku’i michĩmímante hemby che ña’ẽme ha pe acéite opapotaitéma avei, ko’ág̃a ambyatymi jepe’a, ambosako’i hag̃ua pe pan paha che ha che membýpe g̃uarã, ha upéi toromano.
13Elías he’i ichupe: Ani rekyhyje; tereho ejapo ere haguéicha; ejapo raẽ katu chéve peteĩ pan michĩva ojýva, ha egueru chéve, ha upéi ejapo nde ha ne membýpe g̃uarã.
14Israel Jára he’ígui péicha: Pe trígo ku’i ne ña’ẽme ndopamo’ãi ha pe acéite ne mba’eryrúpe namichĩvemo’ãi, Ñanderuete omongy jevy peve yvy apére.
15Upémaramo ha’e oho ha ojapopa Elías he’i haguéicha ichupe; ha Elías okaru pe kuña imenave’ỹva ha imemby ndive heta ára pukukue.
16Ha pe trígo ku’i oĩva iña’ẽme ndopái, ni pe acéite oĩva hyrúpe namichĩvéi, Ñanderuete he’i haguéicha Elías juru rupi ichupe.
17Ko’ã mba’e rire, ko kuñakarai memby hasyete ha pe mba’asy ojopyve ohóvo ichupe naipytuhẽvéi meve.
18Ha pe kuña he’i Elíaspe: Moõpa che ajavy nendive nde kuimba’e Ñanderuete reheguáva, rejupi piko ra’e che rendápe chemomandu’a hag̃ua che reko vai rehe, ha rejuka hag̃ua che membýpe.
19Ha Elías he’i ichupe: Eme’ẽ chéve ne memby. Upémaramo Elías ohupi ichupe isy jyva árigui, ha ogueraha pe mitãme pe koty ha’e oikohápe, ha omoĩ hupápe.
20Upéi omba’ejerure asy Ñanderuetépe ha he’i: Che Jaratee, ko kuña imenave’ỹva róga che aikohápe chemyangekõiete, Nde rehejávo imemby omano.
21Ha Elías ojepyso ipo pe mitã ári mbohapy jevy, ha omba’ejerure asy Ñanderuetépe ha he’i: Che Jaratee, ajerure ndéve embou jevy ko mitã ángape.
22Ha Ñanderuete ohendu Elías ñe’ẽ, ha pe mitã ánga ojevy, ha ha’e oikove jevy.
23Upéi Elías ojapyhy pe mitãme, ha ogueru ikotýgui, isy rendápe ha ome’ẽ ichupe, he’ívo: Ma’ẽ, ne memby oikove jevy.
24Upémaramo pe kuña he’i Elíaspe: Ko’ág̃a che aikuaáma nde Ñanderuete remimbouha, ha Ñanderuete ñe’ẽ añetegua oĩha nde jurúpe.
Who We AreWhat We EelieveWhat We Do
2025 by iamachristian.org,Inc All rights reserved.
