1Hendaguépe oisãmbyhy ita’ýra Josafat, ha ha’e oñemoĩ Israel retã rehe,
2omoĩ isoldádo atykuéra itáva Juda pegua oñemongorapyrévape, ha omoĩ isoldádo aty Juda retãpy rehe, ha Efrain tavakuérape, itúva Asa ojapyhyva’ekue.
3Ha Ñanderuete oĩ Josafat ndive, ha’e oikógui David rape rehe, ha ndohekáigui umi Baálpe (ambue jarakuérape).
4Ohekánte itúva Járape, ha ojapo Ñanderuete rembiapoukapykuéra, ha ndoikói ambue Israel tribukuéra oiko háicha.
5Upévagui Ñanderuete omoĩ hatã Juda retã ipópe, ha opaite Judaygua ome’ẽ Josafátpe ijopoikuéra; ha oguereko heta mba’erepy, ha herakuã porã oñemosarambive ohóvo.
6Ha omoĩ ipy’apýpe Ñanderuete reko rehe, ha oipe’a umi ñemomba’eguasu yvy yvatépe ha Asera ra’ãngakuéra Juda retãgui.
7Ha pe áño mbohapyhápe ha’e oisãmbyhývo omondo hembiguaiguasu Ben-háil, Abdías, Zacarías, Natanael ha Miquéaspe oporombo’e hag̃ua Juda tavayguakuérape;
8ha hendivekuéra omondo Leviguakuéra apytégui: Semaías, Netanías, Zebadías, Asael, Semiramot, Jonatan, Adonías, Tobías ha Tobadonías, ha hendivekuéra pa’ikuéra Elisama ha Joram.
9Ha ombo’e hikuái Juda tavayguakuérape, ogueraha hikuái Ñanderuete rembiapoukapy kuatiañe’ẽ ombo’e porãve hag̃ua hetãyguakuérape.
10Ha Ñanderuete kyhyje ho’a opaite ambue tetã ári oikóva guive Juda jerekuévo, ha ndaipy’aguasuvéi ojeity hag̃ua Josafat ári.
11Ha Filisteayguakuéra jepe ogueru Josafátpe ijopoikuéra, ha pláta oñemomirĩ haguére ipoguýpe. Umi Arabiayguakuéra ogueru avei ichupe g̃uarã hymbakuéra, 7.700 ovecha mácho ha 7.700 kavara mácho.
12Péicha Josafat oñembotuicha tuichave ohóvo, ha Juda retãme omopu’ã umi táva oñemongoráva oñongatu hag̃ua ipype hi’upyrãnguéra.
13Oguereko heta hi’upyrã Juda tavakuérape, ha heta kuimba’ekuéra ipy’aguasuetereíva oiko Jerusalénpe.
14Péicha ojepapahína Juda rogaguasu rupi; ha Juda soldádo aty 1.000 pegua ruvicha Josafat omoĩ Adnas pópe, ha ipoguýpe oĩ 300.000 kuimba’e ipy’aguasúva.
15Ha’e rire oĩ ambue soldádo aty ruvicha, Johanan; ipoguýpe oĩ 280.000 kuimba’e ipy’aguasúva.
16Ha kóva rire oĩ ambue soldádo aty ruvicha Amasías, Zicri ra’y, ha’e oñeme’ẽva’ekue ijeheguieténte Ñanderuetépe, ha ipoguýpe oĩ 200.000 kuimba’e ipy’aguasúva.
17Benjamin tríbugui oĩ Eliada, kuimba’e ipy’aguasuetereíva, ha ipoguýpe oĩ 200.000 kuimba’e oiporu porãva iguyrapa ha isoldádo retemo’ãha.
18Kóva rire oĩ Jozabad, ha ipoguýpe oĩ 180.000 ñorãirõhára ikatupyrýva.
19Ko’ãva tetã ruvicha rembiguái, ojepapa’ỹre umi soldadokuéra tetã ruvicha omoiva’ekue umi táva ñemongorapyrépe oñangareko hag̃ua.
Who We AreWhat We EelieveWhat We Do
2025 by iamachristian.org,Inc All rights reserved.
