1Nemandu’amíkena, Nde, ore Ruete, umi mba’e ojehumava’ekue oréve; ema’ẽmína, ha ehechami ore rotĩeteha ropytávo.
2Ore yvytee ohasa tetã ambuépe, ore rogakuéra opyta tetã ambueyguápe.
3Tyre’ỹ roiko ndaoreruvéigui; ore sykuéra oiko imenave’ỹrõ guáicha.
4Pe y roy’uséva rojoguava’erã ha péicha avei ore jepe’arã.
5Roiko roñemuña muñaháme, ha orekane’õ ramojepe, ndaipóri oréve ropytu’u hag̃ua.
6Ore roiko Egiptoygua ha Asiriaygua poguýpe, ha roñepomoĩ (rojerure) oremohyg̃uatã hag̃ua.
7Ore rukuéra, hembiapo vaikuégui, omanomba hikuái, ha ore rojehavira hendaguekuérape.
8Umi tembiguaikue oñembojára orerehe ha ndaipóri avave orenohẽva ipoguýgui.
9Ore rembi’u romono’õ kyhyjepópe, rokyhyjégui umi desiértope oikóvagui, orejukaségui kyse pukúpe.
10Ore pire hakuvopa ku tatakuáicha, ipohyietereígui ore ñembyahýi.
11Jerusalénpe orãirõ hikuái kuñakuérape; ha ambue Juda tavakuérape, kuñataĩkuérape.
12Ha’ekuéra omosãingo ore retã ruvichakuérape ipógui ha ndorespetái ni karaiancianokuérape.
13Umi mitãrusúpe ogueraha pe molíno omongu’i hag̃ua itrígo, ha umi mitã ikangypáva oñepysãnga pe jepe’a atýra ipohyietereígui.
14Umi karai anciánope ndojekuaavéi táva rokẽme, ha umi mitãrusu ndopuraheivéi.
15Ore py’apy pegua vy’a opa ha ore jerokýgui oiko ñembyasy.
16Ho’a ore akãgui pe akã jeguaka (coróna), ore rembiapo vai haguére roñehundíma,
17upévagui orepy’a rasy ha iñypytũ ore resa.
18Sion cérrogui oiko tapere, ha upérupi aguarámante oiko.
19Ha Nde, ore Ruete, opaite ára reikóva nde guapyhaguasúpe peteĩ ára atyguasu guive ambue ára atyguasu jevy peve, ha upéicha tapia g̃uarã.
20Mba’érehepa nderesaraiete orehegui, ha mba’érehepa areitereíma repoi orehegui.
21Nde, ore Ruete, orembojevy jeýna ne rendápe, toroguata jevy nde rapykuéri iñepyrũ ramoguaréicha.
22Térã piko oremboyketéma, térã piko ndepy’aro tapia g̃uarã orendive.
Who We AreWhat We EelieveWhat We Do
2025 by iamachristian.org,Inc All rights reserved.
