Ezequiel 16 - Biblia en Guaraní - ?anderuete ?e’? Por? 2015

Jerusalen omyakãratĩ Ñanderuetépe

1Ñanderuete ñe’ẽ ou chéve, ha he’i:

2Kuimba’e ra’y, eikuaauka Jerusalen oñemohembiapo vaieteha,

3ha ere: Péicha he’i pende Ruete Jerusalen rehe: Nde renace Canaan retãme; nde ru peteĩ Amorgua ha nde sy peteĩ Hetgua.

4Ha reju ramoguare ko yvy apére, nereñepuru’ã kytĩri, nereñemopotĩri ýpe, noñemoĩri nderehe juky ni nderejeku’a jokuaiva’ekue.

5Ndaipóri tesa ndeporiahuverekova’ekue ko’ã mba’épe, reñemombova’ekue ñúre rei, avave nandeapoiva’ekue rejuha ára guive ko yvy apére.

6Ha Che ahasávo nde ypy rupi ha rohechávo nde ruguykuépe ha ndeky’apa jave Che ha’e ndéve: Eikove, eikove.

7Ha rekakuaa ku koga’áicha; ha rekakuaavévo neporãiterei; ha oiko ndehegui kuñataĩ neporãva, nde avakuéra okakuaa puku; reiko gueteri opívo ha nandiete.

8Ha ag̃uahẽ jevývo nde ypýpe, ha ama’ẽ ramo nderehe, péina rejúma mborayhu rekávo; ha aipyso che ahoja ndeári añu’ã hag̃ua nde rete opívo; ha ame’ẽ che ñe’ẽ ndéve, nde Ruete ramo, ha reikova’ekue che mba’e ramo.

9Che romopotĩ ýpe, ha ajohéi ndehegui nde ruguykue, ha romohyakuã porã mba’e ryakuã porãme,

10romonde ao ojeguapávape, ha amoĩ nde py rehe sapatu vaka ypegua pirekuégui, roiku’a jokua ao linoguiguápe ha añu’ã ne akã ahoja ao sédagui (ao hepyetévagui).

11Amoĩ nderehe jeguaka, ha nde pyapy rehe jeguaka ha ame’ẽ ndéve peteĩ ajurigua.

12Jeguaka hepýva amoĩ ne tĩ rehe, ha ne nambi rehe namichãi, ha peteĩ jeguaka techaukaha iporãva ne akã rehe.

13Péicha reñembojeguakapa óro ha óro morotĩgui, ha reñemonde ao séda ha ojeguapávape; re’u trígo ku’i iporãvéva, eíra ha acéite; ha reñemoporãiterei, ha reñemyakãrapu’ã oiko peve ndehegui tetã ruvichaguasu.

14Ne porãngue oñemyasãi opaite tetãme, nde rete iporãiterei, Che rombojegua haguére, he’i nde Ruete.

15Nde neporãite rire reñembotuicha rehóvo ha remaña oimeraẽva rehe ohasáva guive nde ypy rupi reiko hag̃ua hendive; reiko rãngue che mba’etee ramo nde reiko kuña heko vaíva ramo oimeraẽva ndive.

16Nde rejapyhy nde aokuéra, ha rembosako’i ndejupe g̃uarã heta yvy yvate hape remomba’eguasu hag̃ua ambue járape ha reñemongy’a ko’ã mba’e rehe araka’eve ndoikoiva’ekue ne mbytépe ni ndoikoveimava’erã.

17Rejapyhy avei umi nde jeguaka iporãitéva óro ha óro morotĩguiguáva Che ame’ẽmava’ekue ndéve, ha rejapo ndejupe g̃uarã yvyarigua ra’ãnga ha reñemongy’a hendivekuéra;

18nde rejapyhy nde ao iparáva reñu’ã hag̃ua nde jára ra’ãnga ha henondepekuéra reikuave’ẽ che acéite ha che mba’e ryakuã porã.

19Ha pe tembi’u Che ame’ẽva’ekue ndéve: Trígo ku’i iporãva, pan, acéite ha eíra, umíva rehe che romongaruva’ekue, ko’ã mba’e porãite nde reikuave’ẽ (jára gua’ukuérape); ko’ã mba’e ojehu pene mbytépe, he’i pende Ruete.

20Ha ã mba’e ári, reguerahava’ekue avei nde ra’y ha nde rajykuérape Che ame’ẽmava’ekue ndéve, reikuave’ẽ hag̃ua avei ichupekuéra hembi’urã ramo. Výro rei piko ra’e ne rembiapo vaiete rejapóva.

21Reikuave’ẽ che ra’ykuérape nde jára gua’u ra’ãngápe kuave’ẽmby ramo, ha pe tata ombokusuguepa ichupekuéra.

22Ha opaite ne rembiapo vaiete ha nde reko ñaña rehe nanemandu’avéi ne mitã araguare rehe, reiko ramoguare opívo ha nandi, reñemonamba ramoguare nde ruguykue rehe.

23Ha opaite ne rembiapo vaiete rupi rehasa asyetereireína, he’i pende Ruete.

24Rembosako’i haguére ndejupe g̃uarã umi yvy yvate remomba’eguasu hag̃ua ambue járape, ha ichupekuéra g̃uarã rembosako’i kuave’ẽmby renda opárupi.

25Ha opaite tapejuasa rupi remopu’ã nde jára gua’u ra’ãnga, ha rembyai ne porãngue reñeme’ẽvo kuña heko vaíva ramo oimeraẽ ohasáva guivépe upérupi ha upéicha remboheta hetave nde reko vaiete.

26Reiko kuña reko vai ramo Egípto ra’ykuéra ndive, ne retã yke rehegua ndive, iñakãrakúva; ha upéicha remboheta hetave ne angaipa chembopochyete peve.

27Upévarehe, ema’ẽ porãke ndejehe Che aipysóta che po amombovyve hag̃ua ne rembi’urã, ha romoĩta umi Filisteaygua poguýpe, nderehe ija’e’ỹva pópe, ojapo hag̃ua ndehegui ojaposéva, ha umía oguerotĩta voi nde rape heko pegua’ỹva.

28Reiko kuña heko vaíva ramo avei umi Asiriaygua ndive, naneryg̃uatãigui gueteri; ha reikóvo hendivekuéra, naneryg̃uatãi jevýnte avei.

29Upévare reiko avei kuña heko vaíva ramo Canaan retãygua ha Caldeaygua ndive, ha upeichavéramo jepe araka’eve naneryg̃uatãi gueteri reikóvo.

30Nde py’apy itarova, reñeme’ẽgui ku kuña heko vaícha otĩ’ỹre, he’i nde Ruete.

31Rembosako’ireína ndejupe g̃uarã umi yvy yvate opaite tape juasaha rupi, ha opárupi remopu’ã ne kuave’ẽmby renda remomba’eguasu hag̃ua nde jára gua’úpe, nderejoguái umi kuña heko vaípe, ojeruréva hembiapo vai repy.

32Nde reiko ku tembireko ombotavývaicha iménape oiko hag̃ua imena’ỹva ndive.

33Opaite kuña heko vaípe oñeme’ẽ jopói (pirapire); nde katu reme’ẽ jopói ne mborayhu jarakuérape; nde reme’ẽ ichupekuéra jopói, ikatu hag̃uáicha opaite hendáguio rei oñeg̃uahẽ ne rendápe nde reñeno hag̃ua hendivekuéra.

34Ha ojehu ndéve umi mba’e ojehu’ỹva ambue kuña heko vaípe; avave nanderekáigui nde voi reho reheka hag̃ua ichupekuéra ha ha’ekuéra ome’ẽ rãngue ndéve ijopói, nde voi reme’ẽ hi’ári ichupekuéra nde jopói, ko’ã mba’e ndojehúi mamove.

35Upévare nde, kuña heko vaíva, ehendúke pende Ruete ñe’ẽ,

36péicha Ha’e he’i: Remyasãi haguére opárupi ne kuña heko vaiete, ha neretĩri remboi hag̃ua nde retégui ne mborayhu jarakuérape g̃uarã reñeme’ẽ hag̃ua ichupekuéra, ha hi’ári remomba’eguasu ambue járape, reikuave’ẽvo ne membykuéra ruguy ichupekuéra g̃uarã,

37upévagui, eikuaa porãke, Che ambyatypaitéta ne mborayhu jarakuérape, nembovy’ava’ekue, ha opaite nde rehayhuva’ekuépe, ha avei umi nderayhu’ỹvape; ha ambojerepáta nderehe ha ambo’opívota nde rete, ohecha hag̃ua nde rete opívo nde retĩete hag̃ua (umi nderechávagui).

38Upéi Che rombojovakéta oñembojovake háicha umi kuña heko vaíva ha jukahárape, añohẽ hag̃ua che pochy ndeári, ogue peve.

39Che romoĩta ipoguypekuéra, ha’ekuéra ombyaipáta nde yvy yvateguakuéra, oitypa hag̃ua ne kuave’ẽmby renda, ha’ekuéra oipe’áta nde aokuéra ha oguerahapáta ndehegui nde jeguaka hepyetéva, ha’ekuéra nderejáta opívo ha nandi vera retĩ hag̃uáicha.

40Upéi oñembyatýta oñemoĩva nderehe, ndejapíta itápe ndejuka peve, ha ikyse pukúpe ombo’íta nde rete.

41Ha’ekuéra ohapýta nde rogakuéra ha nembojovakéta heta kuña renondépe; péicha ajapóta anive hag̃ua reiko kuña heko vaíva ramo, ha anive hag̃ua reme’ẽ jopói nde rayhuhárape;

42uperire ae opáta che pochy ha amboykéta ndehegui che ñeko’õi, apytu’úta ha ndachepochymo’ãvéima.

43Nderesaráigui ne mitãrusu áragui ha opaite ko’ã mba’e rupi nde chembopochy haguére, Che rohavira ne rembiapo vai rehe, he’i pende Ruete; ha ne’ĩra gueteri reñembyasy nde reiko vai haguére.

44Ema’ẽ porãke, umi oiporúva ko ñe’ẽnga, oiporúta nderehe: Isy oiko haguéicha, péicha oiko jevy imembykuña.

45Ha nde voi ningo nde sy membyre, omboykeva’ekue iména ha imembykuérape; ha nde reiko nde kypy’ýicha, omboykemava’ekue avei iména ha imembykuérape; pende sy ningo peteĩ Hetgua, ha pende ru katu peteĩ Amorgua.

46Ha nde kypy’y Samária imemby kuñakuéra ndive, oikóva nórte gotýo ndehegui; ha Sodóma imemby kuñakuéra ndive, ne ambue ryke oikóva sur gotýo ndehegui.

47Ndereikói hapekuéra rupi, ha nderejapói hembiapo vaiete, reñemboheko vaieteve katu ichuguikuéra opaite nde rapekuérape.

48Che rekove rehe, he’i pende Ruete, nde kypy’y Sodóma ha imemby kuñakuéra ningo ndojapói umi mba’e nde ha ne membykuñakuéra pejapovapeína.

49Eikuaa porãke, kóa ningo nde kypy’y Sodóma ñañangue: Oñembotuicháva, ha’énte okaru porãse, ha’e ha imemby kuñakuéra oiko teko reipópe; ha noipytyvõséi pe ojepy’apy vaíva ni imboriahúvape.

50Oñembotuichaiterei hikuái, ha ojapo tembiapo vaiete che renondépe, ha ahecha vove péva amboyke ichupekuéra.

51Ha nde ryke Samária katu ndohupitýi ni mbyte rupi jepe ne rembiapo vaiete, nde remboheta hetavégui tembiapo vaiete ichuguikuéra, upévare nde rykekuéra heko potĩ ñambojoja ramo nde reko vai rehe.

52Ne rembiapo vaietereirasa rupi rembovevuive nde rykekuéra rembiapo vai, opyta heko potĩva ramoguáicha nde ykére, upévagui eñemotĩ ne rembiapo ñaña rejapova’ekue rehe ha rembohekojoja haguére umívape.

53Ha Che amopu’ã jevýta Sodóma ha imemby kuñakuérape (itava’ikuérape), ha avei Samária ha imemby kuñakuérape ha ijapytépe amopu’ãta avei Jerusalen ha imembykuérape,

54reraha hag̃ua nde apére ne rembiapo vaikue ha retĩ hag̃ua opaite mba’evai rejapova’ekuégui, ha péicha remyangapyhykuaa ichupekuéra.

55Ha nde kypy’y Sodóma ha imemby kuñakuéra ha nde ryke Samária, imemby kuñakuéra reheve, ojehovasa jevýta ymaguaréicha; nde ha ne memby kuñakuéra ojehovasa jevýta avei ymaguaréicha.

56Reñembotuichaha árape nde reñembohory nde kypy’y Sodóma rehe,

57ojekuaa porãmba mboyve ne ñañangue. Ha péicha avei ko’ág̃a nderehe oñembohory Síria rajykuéra ha mayma Filistéa rajykuéra, oma’ẽvo nde reko vaikue rehe.

58Ha ko’ág̃a rejehavirareína nde reko ky’a ha ne rembiapo vai rupi, he’i pende Ruete.

59Ha Ha’e he’i avei: Che ajapopáta nderehe nde rejapo hagueichaite, nde nderejapoiva’ekue pe ñe’ẽ reme’ẽva’ekue, nde voi ningo repoi ne ñe’ẽme’ẽnguégui.

60Upeichavéramo jepe Che chemandu’a jevýta pe ñe’ẽme’ẽngue rehe aja pova’ekue nendive ne mitãrusuha árape, ha añembopy’apeteĩta nendive tapia g̃uarã.

61Ha nemandu’áta ne rembiapo vaikue rehe ha retĩta ame’ẽ vove ndéve nde kypy’y ha nde rykekuéra ne memby kuñakuéra ramo, ndaha’éi ramojepe ne ñe’ẽme’ẽngue (jekupyty) rupi.

62Che katu amoañetéta nendive che ñe’ẽme’ẽngue, ha reikuaáta Che ha’eha pende Ruete.

63Ikatu hag̃uáicha nemandu’a ha retĩ, ha araka’evéma nderejejurupe’amo’ãvéima retĩetereígui, ág̃a Che roperdona vove opaite mba’e rejapo vaiva’ekuégui, he’i pende Ruete.