Márcos 1 - Biblia en Guaraní - ?anderuete ?e’? Por? 2015

Evangélio ñepyrũ - Juan Bautísta rembiapo

1Hesu Crísto, Ñanderuete Ra’y ñe’ẽ porãite ñepyrũ (evangélio ñepyrũ).

2Ohai haguéicha proféta Isaías: Péina ningo amondo che remimondo ne renonderãme, ombosako’i hag̃ua nde raperã, (Malaquías 3,1).

3Oĩ ningo peteĩ ñe’ẽ osapukáiva desiértope: Pembosako’i Ñandejára raperã, pemopotĩ hape po’i, (Isaías 40,3).

4Ojehechaukava’ekue Juánpe, pe oporobautizáva desiértope, ha oikuaauka Israelguakuérape oñembyasy hag̃ua oñemohembiapo vai haguére, ha upéi ojebautizauka hag̃ua.

5Ha osẽmba Judaygua ha opaite Jerusalengua hendápe ojebautizauka hag̃ua ysyry Jordánpe, omombe’úvo hembiapo vaikuéra.

6Ha Juan ao ojejapo caméllo raguekuégui, vakapígui iku’a jokuaha, ha ho’uva’ekue tuku ha eíra ka’aguy.

7Ha oñemoñe’ẽ ha he’i: Che rapykuéri ou peteĩ ipu’akavéva chehegui, ndaijáiva chéve ajora jayvyhapete jepe isapatu sã.

8Che ningo pobautiza ýpe, ha’e katu pendebautizáta Pytu Porãmbávape.

Hesu ojebautiza

9Ha umi árape Hesu ou Nazaret, Galiléa peguágui, ha Juan obautiza ichupe ysyry Jordánpe.

10Ha osẽvo pe ýgui, ojehecha pe yvága ojepe’aha ha pe Pytu Porãmbáva oguejy hi’ári pykasúicha.

11Upérõ ou ñe’ẽ pu yvágagui he’íva: Nde ningo che Ra’y ahayhúva, ndérupi che py’a rory.

12Ha upéi pe Pytu Porãmbáva ogueraha Hesúpe desiértope.

13Ha’e opyta desiértope 40 ára (día) Satana oipy’ara’ã hag̃ua ichupe, upépe oiko tymba saite apytépe, ha angelkuéra oservi ichupe.

14Juan ho’a rire cárcelpe, Hesu oho Galiléape omyasãi hag̃ua Ñanderuete ñe’ẽ porãite.

15Ha he’i: Pe ára oikopáma ha og̃uahẽma Ñanderuete retãguasu pu’aka, upévare pejevy hendápe ha pejerovia iñe’ẽ porãite rehe.

Hesu ohenói hemimbo’ekuérape

16Ha Hesu oguatávo Galiléa yguasu ypýpe, ohecha Simon ityvýra Andres ndive oity jave ipira red yguasúpe, ha’ekuéra ningo pira renohẽhára.

17Ha Hesu he’i ichupekuéra: Peju che rapykuéri ha ajapóta pendehegui tetãyguakuéra renohẽhára, (umi oikóva Satana poguýpe).

18Ha upepete opoi hembiapógui ha oho Hesu Crísto rapykuéri.

19Ha tenondevemi Ha’e ohecha Jacóbope, Zebedéo ra’y, ityvýra Juan ndive, omyatyrõ jave ired ibárco ryepýpe.

20Ha Hesu ohenói ichupekuéra. Ha upevove oheja itúva Zebedéo ibárcope, hembiguaikuéra ndive, oho hag̃ua Hesu Crísto rapykuéri.

Hesu oñepyrũ ombo’e

21Upéi oike hikuái Capernaúmpe, ha og̃uahẽvo pe sábado ára, Hesu oike Ñanderuete rógape oporombo’e hag̃ua.

22Ha ohecharamoite hikuái umi mba’e Ha’e ombo’éva rehe, ombo’eháre ichupekuéra pu’aka reheve, ndaha’éi imbo’eháraicha (ikuatia haiháraicha).

23Ha sapy’aite oĩ jave Ñanderuete rógape, peteĩ kuimba’e imba’epochýva osapukái ha he’i:

24Mba’épa ore roguereko nendive, nde Hesu, Nazaret pegua. Rejúpa orehundi hag̃ua. Aikuaa porã mávapa nde: Nde ningo Yvága Jára Heko Porãitéva Ra’y.

25Ha Hesu oja’o ha he’i ichupe: Ekirirĩke ha esẽ ichugui.

26Ha pe mba’epochy oityvyro hatã ichupe, ha osapukái hatãvo osẽ ichugui.

27Ha oñemondyipa hikuái ha oporandu ojupe: Mba’e piko kóva. Mbo’epy pyahu pu’aka reheve ombopoguy mba’epochýpe, ha ha’ekuéra iñe’ẽrendu ichupe.

28Ha Hesu rerakuã porã pya’e oñemyasãi opárupi, opaite Galiléa departaméntope.

Hesu omonguera Pédro rembireko sýpe

29Ha Hesu osẽvo Ñanderuete rógagui oho Jacóbo ha Juan ndive, Simon ha Andres rógape.

30Ha Simon rembireko sy oĩhína tupápe tuicha akãnundu reheve, ha omombe’u hikuái ichupe.

31Upérõ Hesu oñemboja hendápe ha oipopyhy ichupe omopu’ã hag̃ua, ha pe akãnundu opoi ichugui, ha opu’ã oservi hag̃ua ichupekuéra.

32Ka’aru, kuarahy oikévo, ogueru hikuái Hesu rendápe opaichagua hasýva, ha oguerekóva mba’epochyeta.

33Umi tavaygua ijatypa pe óga rokẽme.

34Ha Hesu omonguera heta hasývape, opaichagua mba’asýgui, omosẽ avei heta mba’epochýpe, ha ndohejái umi mba’epochy oñe’ẽ, ha’ekuéra ningo oikuaa voi mávapa Ha’e (Hesu).

Hesu ombo’e Galiléape

35Ha opu’ã ko’ẽmbotávo, pytũmi gueteri, osẽ ha oho oñembo’e hag̃ua peteĩ desiértope.

36Simon ha hendive oĩva oheka kyre’ỹme Hesu Crístope.

37Ha ojohúvo ichupe he’i hikuái: Opavave ningo ndereka.

38Ha Hesu he’i ichupekuéra: Jaha ambue távape, uperupiguápe, amombe’u hag̃ua avei upérupi pe evangélio, upevarã ningo aju.

39Ha Hesu oho Galiléa tuichakue javeve omyasãi hag̃ua pe evangélio Ñanderuete rogakuérare, ha omosẽ mba’epochyetápe.

Hesu omonguera peteĩ ilépravape

40Ha peteĩ iléprava oñemboja hendápe ha ñesũháme ojerure asy ichupe: Chemopotĩsérõ, ikatu Nde chemopotĩ.

41Ha Hesu oiporiahuverekoite ichupe, ipojái ha opoko hese ha he’i ichupe: Aipota, tanepotĩ (ha terekuera).

42Ha upevovete ha’e okuera ha ipotĩ opytávo.

43Ha Hesu oavisa porã rire omondo ichupe,

44he’ívo: Ma’ẽ, aníke remombe’u avavépe; terehónte ejehechauka pa’ípe ha eme’ẽ ichupe pe potĩmbyre kuave’ẽmby Moises ome’ẽukava’ekue, ojehechauka hag̃ua rekueramaha.

45Ha’e katu oho guive omombe’u ha omosarambi oparupiete pe ojehumava’ekue ichupe; upévarehe Hesu ndaikatuvéi ojechauka oimeraẽva távape, opytámante okaha rupi, desiertohápe, ha oparupígui ou hendápe.