Provérbios 12 - Biblia en Guaraní - ?anderuete ?e’? Por? 2015

1Pe ohayhúva tekombo’e, ohayhu akãguapy; ha pe omboykéva tekombo’e ningo ivýro.

2Pe heko potĩva ohupityva’erã Ñanderuete ñepytyvõ, ha Ha’e ohundiva’erã upe ojepy’amongeta vaívape.

3Pe tekove iñañáva ndoikove pukumo’ãi; ha umi heko potĩva rapo katu noñemongu’eiva’erã.

4Pe tembireko ikyre’ỹva iména akã jeguaka, ha pe tembireko heko vaíva katu ku úraicha iména akãme.

5Pe heko potĩva oñeha’ã oiko hag̃ua hekoitépe, ha umi iñañáva katu oñeha’ã ombotavy hag̃ua hapichápe.

6Umi iñañáva ñe’ẽ oñohẽse hapicha ruguy; ha umi heko potĩva juru katu oporope’ase jejopy vaígui.

7Ñanderuete omyangekõi vaipava’erã umi iñañávape, ha hekove opa reíta; ha umi heko potĩva róga katu tapiaite oikóta oku’e’ỹre.

8Pe tapicha iñarandu háicha, upeichaite oñemomba’éta avei ichupe, ha pe itie’ỹ ñañáva oñemotĩva’erã.

9Iporãiteve peteĩ imboriahúva oiko hembi’umi reheve, upe oñembotuicha reívagui iñembyahýi ramo.

10Pe heko potĩva oñangareko porã hymba rekove rehe; ha umi iñañáva katu ipy’a hatã.

11Upe omba’apóva ijyvy rehe hyg̃uatãva’erã ikóga ra’ỹigui; ha umi oiko reíva imboriahuve ohóvo.

12Pe tekove ñaña oipotaiterei ambue iñañáva mondapyre; ha umi heko potĩva rapo katu hi’a porãva’erã.

13Pe iñañáva oñemboapajuãi iñe’ẽvaípe; ha pe heko potĩva katu osẽva’erã hi’angekõi vaígui.

14Ñande juru he’iva’ekue guive jahupity jevýta, hekoitépe oñemyengoviava’erã ñane rembiapokue.

15Pe ivýrova oimo’ã hape naikarẽiha; ha pe iñarandúva katu ohenduse tekombo’e.

16Pe itavýva pya’eite ohechauka ipochyha, ndojejokokuaáigui; ha upe omboykéva katu pe ñe’ẽ meg̃ua ohendúva, iñakãguapy porã.

17Upe he’íva añetegua ohechauka heko potĩha, ha pe techahare ijapúva ohechauka ivyroha.

18Oĩ ningo tapicha, iñe’ẽ ha’ete kyse oporokutúva; iñarandúva ñe’ẽ katu pohã iporãva.

19Pe juru ijapu’ỹva opyta tapiaite; ha pe juru ijapúva sapy’aite g̃uarãnte.

20Upe ohekáva mba’evai oñembotavyse voi; ha upe ohekáva mba’eporã, oporombovy’a.

21Pe heko potĩva rekovépe nog̃uahẽmo’ãi mba’evai ha umi iñañáva rekovépe katu henyhẽva’erã mba’evaietágui.

22Ñanderuete ipy’aro umi juru ijapúva ndive; ha umi añetegua he’íva katu ombohory ichupe.

23Peteĩ iñarandúva ndohechaukái iñaranduha, ha umi ivýrova py’apy katu ohechauka ivýro reko.

24Umi ikyre’ỹetéva po oisãmbyhyva’erã hembiapotee voi; ha pe iñate’ỹva katu oikova’erã tembiguái ramo.

25Pe jepy’apy omyangekõi ñande py’apy, ha pe ñe’ẽ porã katu ñanembopy’a rory.

26Pe heko potĩva ohechauka hapichápe haperã, ha umi iñañáva katu ombojavyuka ichupe.

27Pe iñate’ỹetéva nombichýi pe mymba ojapiva’ekue; ha pe ikyre’ỹva katu ohupity heta mba’e iporãva.

28Pe heko potĩva rapépe oĩ tekove ha ipype ndaipóri ñemano.