1Ojehu uperiregua áñope, umi ára tetã ruvichakuéra osẽ jepi oñorairõ hag̃ua, David katu omondónte Joábpe, hembiguaikuéra ha ambue Israelguakuéra ndive ohundi hag̃ua Amonguakuérape, upévare Joab omongora itáva Raba; David katu opyta Jerusalénpe.
2Ojehu ningo peteĩ árape Israelguakuéra osẽ rire ñorãirõme, David opu’ã ka’aru hupágui ha oho oguata hóga ape ári, ha upeguive ohecha peteĩ kuña iporãitéva ojahuhápe.
3Upérõ David oporanduka mávapa pe kuña, ha oje’e ichupe: Péva ningo Betsabe, Eliam rajy, Urías, Het ñemoñaréva rembireko.
4Ha David omondo hembijokuái ogueru hag̃ua ichupe hendápe, ha ha’e oke hendive. Upéi ha’e oñemopotĩ heko ky’águi ha oho jevy hógape.
5Betsabe oikuaa guive hyeguasuha, omombe’uka Davídpe, he’ívo: Cheryeguasúma ndehegui.
6Upéramo David he’iuka Joábpe: Embou chéve Urías, Het ñemoñarépe. Ha Joab ombou Uríaspe, David rendápe.
7Urías oúvo hendápe, David oporandu hesãipa Joab, ha tetãyguakuérapa hesãi avei, ha mba’éichapa ohohína pe ñorãirõ.
8Upéi David he’i Uríaspe: Tereho nde rógape, ha ejepyhéi. Ha osẽvo Urías tetã ruvichaguasu rógagui, David oguerahauka ichupe tembi’u porãitéva mburuvicha meságui.
9Urías katu oke pe tetã ruvicha róga rokẽme opaite ijára rembiguaikuéra apytépe, ha ndohói hógape.
10Ha oñemombe’u ko’ã mba’e Davídpe, oje’évo ichupe: Urías ndohói hógape. Ha David he’i Uríaspe: Nde ndereguata pukúi pikora’e. Mba’éreiko nde nderehói nde rógape.
11Ha Urías he’i jevy Davídpe: Ñande Ruete karameg̃ua oĩ carpaguýpe, Israelgua ha Judayguakuéra, che jára Joab, ha che jára rembiguaikuéra oikopa ñúre. Ha chépa aikéta che rógape akaru ha amboy’u hag̃ua ha ake hag̃ua che rembireko ndive. Nde rekove rehe, ha ne ánga rekove rehe, che ndajapomo’ãi ko’ãichagua mba’e.
12Ha David he’i Uríaspe: Epyta ko’ápe ko árape gueteri, ha ko’ẽ ramo romondóta, Urías katu opyta Jerusalénpe pe ára ha uperiregua árape avei.
13Ha David ohenói Uríaspe okaru ha omboy’u hag̃ua hendive, omonga’u peve ichupe. Ha ha’e osẽ pe ka’aru oho hag̃ua hupápe ijára rembiguaikuéra ndive, ha ndohói jevy hógape.
14Ambue ko’ẽme, David ohai peteĩ kuatiañe’ẽ Joábpe g̃uarã, ha oguerahauka péva Urías po rupi ichupe g̃uarã.
15Ha ohai pe kuatiañe’ẽme: Emoĩ Uríaspe ñorãirõhára renondépe, pe ñorãirõ ipohyivehápe, ha peñemomombyry ichugui, tojekutu ha tomano ha’e.
16Ha Joab ojeitývo pe távare, omoĩ Uríaspe oikuaahápe oĩha kuimba’ekuéra ipy’aguasuvéva.
17Ha osẽvo umi tavaygua ondyry Joábre ha ojuka mbovymi David soldadokuérape; ha ijapytépe omano avei Urías, pe Het ñemoñare.
18Upémaramo Joab omondo peteĩ hembijokuái oikuaauka hag̃ua Davídpe opaite mba’e ojehúva guive pe ñorãirõme.
19Ha Joab he’i hembijokuáipe: Remombe’upávo tetã ruvichápe ojehúva guive ñorãirõme.
20Ha rehechávo tetã ruvicha oñepyrũ ramo ipochy, ha he’írõ ndéve: Ma’erãpa peñembojaiterei táva rehe peñorãirõ hag̃ua, ndapeikuaái piko ha’ekuéra pendejapitaha tápia yvate guive.
21Máva piko ojuka Abimelec, Jerobaal ra’ýpe. Peteĩ kuña oityva’ekue pe tápia árigui peteĩ molíno ita apu’áva ha omano ha’e Tebéspe. Mba’érehepa peñembojaiterei pe táva tápia jere yvate rehe. Upéicharamo nde eréta ichupe: Ne rembiguái Urías, pe Het ñemoñare, omano avei.
22Ha Joab rembijokuái, og̃uahẽvo David rendápe omombe’upa ichupe oje’e hagueichaite ichupe:
23Ipu’aka orerehe umi kuimba’e, ojeitývo oreári pe ñúme, jepémo romboguevi ichupekuéra táva rokẽguasu peve.
24Ha pe táva tápia jere yvate guive umi hu’y mombohára ojapi ne rembiguaikuérape, ha omanomimi tetã ruvicha rembiguaikuéra; ha ijapytépe omano avei ne rembiguái Urías, pe Het ñemoñaréva.
25Ha David he’i pe ñe’ẽ rerahahárape: Péicha eréta Joábpe: Ani reñembyasy ko’ã mba’e rehe, pe kyse puku oporombokusugue voínte, pendyry mbareteve katu, pembopoguy peve pe táva. Péicha emokyre’ỹke ichupe.
26Urías rembireko oikuaávo iména omano hague, ojahe’o hese.
27Ha pe ñembyasy ha pe ao vosápe oñemondeha ára ohasapávo, David omondo ha ogueruka Betsabépe hógape; ha ha’e oiko hembireko ramo, ha imemby ichupe peteĩ ta’ýra. Ko’ã David rembiapokue katu ivaiete Ñanderuete resa renondépe.
Who We AreWhat We EelieveWhat We Do
2025 by iamachristian.org,Inc All rights reserved.
