Deuteronómio 20 - Biblia en Guaraní - ?anderuete ?e’? Por? 2015

Tembiapoukapy ñorãirõ reheguáva

1Pesẽ ramo peñorãirõ penderehe ija’e’ỹva ndive, ha pehechávo ikavaju, icárro ha isoldadokuéra hetave pendehegui, ani pekyhyjétei ichuguikuéra, Ñanderuete, Ñandejára, oĩva’erã penendive, Ha’e voi peneguenohẽva’ekue avei Egípto retãgui.

2Ha peñemoag̃uívo peñorãirõ hag̃uáme, pe pa’i oñembo’y ha oñe’ẽva’erã hetãyguakuérape,

3ha he’iva’erã ichupekuéra: Peẽ Israelgua, pehendu porãke, peẽ peñembyatýva ko árape pejeity hag̃ua penderehe ija’e’ỹva ári; ani pendepy’akangýtei, ani pekyhyjétei, ani peñemondýitei ha aníke pendepy’amirĩtei henondepekuéra;

4Ñanderuete, Ñandejára ohova’erã penendive, Ha’e oñorãirõta penderehe ija’e’ỹva ndive pendesalva hag̃ua.

5Ha umi mburuvicha oñe’ẽva’erã avei hetãyguakuérape, ha he’iva’erã: Upe omopu’ã ramóva hóga pyahu, ha ndoiporúi jepe ra’e, toho jevy hógape, anítei ág̃a omano ramo ñorãirõme ambue oiporu hóga pyahu,

6ha upe oñotỹramóva parral, ha ne’ĩra gueteri ohupity ichugui vy’a, toho jevy hógape, anítei ág̃a omano ramo ñorãirõme ambue ovy’a iparral’akue reheve.

7Ha oime ku ome’ẽva’ekue tenondéva iñe’ẽ peteĩ kuñataĩme omenda hag̃ua hese, ha ne’ĩra gueteri omenda, toho jevy hógape, anítei omano ramo ñorãirõme ambue omenda hese.

8Ha mburuvichakuéra oñe’ẽ jevyva’erã tetãyguakuérape, ha he’iva’erã: Pe kuimba’e okyhyjéva ha ipy’amirĩva toho jevy hógape, ani hag̃ua ombopy’amirĩtei ipehẽnguekuérape ipy’amirĩ rupi.

9Ha umi mburuvicha oñe’ẽmbávo tetãyguakuérape, umi soldádo ruvicha oñemoĩva’erã isoldádo aty renondépe omotenonde hag̃ua ichupekuéra.

10Peñemoag̃uívo peteĩ táva rehe pejeity hag̃uáicha hi’ári, peporandu raẽva’erã ichupekuéra oikesépa penendive jekupitýpe (peteĩ ñe’ẽme).

11Ha he’i ramo hikuái: Roñembopy’apeteĩta penendive, ha penemog̃uahẽ porã ramo itávape, upérõ tome’ẽ ndéve pirapire ha topyta pene rembiguái ramo.

12Ha ndoikeséi mba’e ramo jekupytýpe penendive, ha oñemoĩ ramo oñorãirõ hag̃ua penendive, upéicharamo pemongoráta itáva.

13Ñanderuete, pende Jára, omoĩ rire nde pópe, pejukava’erã mayma kuimba’épe kyse puku hãimbekuépe.

14Ha umi kuña ha mitãkuéra, hymbakuéra ha opaite imba’erepy reheve opytáta pene mba’erã ramo, peẽ pevy’a hag̃ua umi mba’e reheve Ñanderuete omoĩma pe tava pende pópe.

15Péicha pejapova’erã umi táva opytáva rehe mombyryete pendehegui, ndopytáiva Canaan retãme.

16Ha Canaan tavakuéra Ñanderuete, pende Jára, ome’ẽtava peẽme pene mba’erã ramo, peike guive ipype pejukava’erã opaite itavayguakuérape, ani peiporiahuvereko avavépe.

17Pehundipaiteva’erã: Umi Hetgua, Amorgua, Canaangua, Feresgua, Hevgua ha Jebusguakuérape, Ñanderuete, pende Jára, he’i haguéicha peẽme;

18ani hag̃ua ha’ekuéra penembo’evai pemomba’eguasu hag̃ua avei ijarakuérape, ha ani hag̃ua peñemoangaipa Ñanderuete, pende Jára renondépe.

19Pemongora vove oimeraẽ táva ha peñorãirõta ramo heta ára, pembopoguy peve, napehundiriva’erã ijyvyrakuéra, ani peity háchape, pe’u uvei hi’akuéra, umi yvyra ndaha’éigui soldádo oñemoĩva penderehe.

20Ha umi yvyra peikuaáva ndahi’áiva, ikatu peikytĩ, peiporu pejapyhara hag̃ua pe táva tápia ári ho’a peve pende pópe.