Isaías 11 - Biblia en Guaraní - ?anderuete ?e’? Por? 2015

Hesu Crísto, pe Mesías, oikova’erã mburuvichaguasu hekoite peguáva ramo

1Osẽva’erã peteĩ yvyra rakã Isai yvyrágui, ha peteĩ hoky pyahu hi’ava’erã hapokuéragui.

2Ñanderuete Pytu Porãite oguejyva’erã hi’ári; Pytu oikuaapáva ha arandu reheguáva, Pytu ohekombo’éva ha ipu’akapáva, Pytu omoarandúva ha omongyhyjéva oúta Ñanderuetégui.

3Ha’e ohekombo’éta iñe’ẽrendu hag̃ua ha okyhyje hag̃ua Ñanderuetégui, nombojovakemo’ãi hesa ohecha háicha, térã ijapysa ohendu háicha,

4ombojovakéta hekoitépe umi imboriahúvape, ha ijustíciape ombojovakéta umi tetãygua oñemomirĩvape, oinupãta katu umi iñañávape ha Ipytu Porãitépe ojukáta umi hese ojeroviase’ỹvape.

5Ha pe justícia iku’a jokuaha, ha teko jeroviaha (fidelidad) hete mo’ãha.

6Pe aguaraguasu oikóta ovecha ra’yrusu ndive, ha pe jaguarete oñenóta kavara ra’y ndive; pe vaka ra’yrusu, pe leõ (África pegua) ndive, ha mymba iñarõva’ekue oikova’erã oñondive, ha peteĩ mitã oñangarekóta hesekuéra.

7 Vaka ha óso ho’úta kapi’i, ita’yrakuéra oñenóta oñondive; ha pe leõ ho’úta avei kapi’i vakakuéraicha.

8Ha pe mitã okambúva oñembosaráita pe mbói raity ykére, ha pe mitã opo’oramóva ipojáita mbói raity rehe.

9Ndojapomo’ãi ivaíva ha nomongy’amo’ãi che cérro amboykeva’ekue; pe tetã henyhẽta pende Ruete arandúgui ku y omyenyhẽ háicha pe yguasu.

10Ojehuva’erã upe ára upévape umi tetã ohekava’erã Isai rapo oñembo’y ramo ipoyvivevévaicha tetãnguérape g̃uarã, ha pe tenda Ha’e oikohápe ojajaipáta.

11Ha ojehuva’erã avei upe ára upévape, Ñanderuete omopu’ã jevýta ipo oguenohẽ jevy hag̃ua hetã rembyre Asíriagui, Egípto, Patros, Etiopía, Elam, Sinar, Hamat ha umi ísla yguasu peguágui.

12Ha Ñanderuete omopu’ãva’erã ipoyviveve umi tetãme, ha ombyatypava’erã umi Israelgua oñemosẽva’ekuépe ha ombyatypa jevyva’erã avei umi Judaygua oñemosarambiva’ekuépe umi irundyve yvy apýra guive.

13Ha’e omboguéta Efrain py’arasy (envídia) ha umi Juda rehe ija’e’ỹva oñehundipava’erã. Efrain ndaipy’arasymo’ãi Juda rehe, ha Juda ndaipy’arasymo’ãvéi Efrain rehe.

14Ovevéta hikuái kuarahyreikeha gotýo umi Filisteaygua ati’y ári, ombopoguy hag̃ua kuarahyreike gotyoguápe, ha oipe’apava’erã mba’erepyeta umi kuarahyresẽ gotyoguágui, Edom ha Moab oikova’erã hembiguái ramo ha umi Amon ñemoñare ojapova’erã ha’ekuéra he’íva guive.

15Ñanderuete omboja’ova’erã Egípto yguasu kũnguéra ha oipysóta ipo pe ysyry Éufrates rehe, Ha’e ombyaíta Ipytu Porãite pu’aka rupi ha hembýta 7 ysyry ha péicha ojehasáta upérupi sapatu ikã rehevénte.

16Ha oĩta tape hetãyguakuéra rembyrépe g̃uarã, opytava’ekue Asíriape, ku tape oĩ haguéicha Israélpe g̃uarã osẽ ramoguaréicha Egíptogui.