1Peguerahauka peteĩ ovecha ra’yrusu tetã ruvichápe, Selágui, desiérto rupi, Sion cérro peve.
2Ha Moab og̃uahẽvo Arnon ysyry jehasahápe, ojogua umi guyra oñemondýivape ha pya’e ovevéva haitýgui.
3Pejehekombo’e porãke ha pehechauka mba’épa iporãve; emyasãi ne kuarahy’ã arakuépe ku pyharekue ramoguáicha, emokañy umi oñemuñávape, ani remombe’u ha’ekuéra okañy haguépe.
4Ehejána toike ne retãme umi okañymava’ekuépe Moab retãgui, emo’ã ichupekuéra imuñaháragui. Oñehundi rire pe oporohundiva’ekue ha omano rire umi oporombotapereva’ekue,
5tetã ruvicha guapyha oñemohatãta mborayhu rupi, ha David guapyhaguasúpe oguapy hatãta peteĩ mbojovakehára hekoite peguáva.
6Rohendu porã ningo Moab ojejapo hague, oñembotuicha heko ha’éntese, ejererovu hague ha tova mokõi reheve ijapu hikuái.
7Upévare opaite Moabgua tojahe’o puku hetãre; ipyahẽ asyva’erã py’a tarova reheve Kirheres pan he’ẽ parralguigua rehe.
8Hesbon ha Sibma parralty ipirupa; umi tetã ruvicha opyrũmba nde parralty porãite rehe; iparralty og̃uahẽkuri Jazer peve ha iñasãimbákuri desiérto peve ha hakãnguéra oñemyasãi ohóvo yguasu peve.
9Upévare ajahe’óta, Jazer ojahe’o háicha Sibma parralty rehe; nde Hesbon ha Eleale pombohykuéta che resaýpe, oñemono’õ haguépe nde parral ha nde kóga oñehendúgui ñorãirõ megua sapukái.
10Ojeíma ndehegui vy’a ha sapukái rory, parraltýpe ndojepurahéiri ha ndojevy’avéi; ojehykue’o haguépe pe parral’a avave noñamivéi, oñemokirirĩete pe parral’a ohykue’óva sapukái rory.
11Upévagui che ánga oryrýi ku árpa sãicha Moab rehe, ha ajepy’apy Kir-heres rehe.
12Ha Moabgua oho ramojepe oñembo’e hag̃ua umi yvy ijyvateha rupi reiete oñembo’éta, ndohupitymo’ãigui mba’evete.
13Ko ñe’ẽ kóva Ñanderuete he’iva’ekue Moab rehe upe ára upéva guive.
14Ko’ág̃a katu Ñanderuete he’íkuri: Ko’águi mbohapy año haguépe, peteĩ kuimba’e omba’apóva sapy’a ágotyo pégotyoicha, Moab pu’aka ho’áta yvýre, hetaiterei ramojepe hetãyguakuéra, mbovymínte hembýta ha ikangypa joáta hikuái.
Who We AreWhat We EelieveWhat We Do
2025 by iamachristian.org,Inc All rights reserved.
