1Ha nde, kuimba’e ra’y, ejapyhy peteĩ kyse puku hãimbéva, tahãimbe ku tendyva kytĩhára ojeporu háicha ha embohasa ne akã ha ne rendyva rehe; ha upéi eha’ã ne akã rague pohyikue peteĩ balánzape ha emboja’o mbohapy atýra ojojáva.
2Táva mbytépe, ehapy peteĩ ne akã rague atýrami tatápe, umi táva ñemongora ára opa vove; upéi ejapyhy ambue atýra ha eikytĩ kytĩ kyse pukúpe pe táva jerekue rehe; ha pe atýrami mbohapyha emosarambi yvytu rehe, ha Che aguenohẽta kyse puku hyrúgui hapykuerikuéra.
3Ne akã rague atýra mbohapyhágui ejapyhy mbovymi ha eñapytĩ nde ao rembe’ýre.
4Ha ejapyhy jevy ijapyteguikuéra mbovymimi, ha eity tata mbytépe ojehapy hag̃ua, upégui osẽta pe tata oñemosarambíva opaite Israelguápe.
5Péicha he’i pende Jára, pende Ruete: Kóa ningo Jerusalen, Che amoĩva’ekue tetãnguéra apytépe ha heta tetã ijerekuévo.
6Jerusalen oñemoĩ cherehe ha omboykeve che rembiapoukapy ambue tetãnguéra oikóvagui ijerekuévo, ojahéi che ñe’ẽ rehe ha ndoguatái che rapére.
7Upévagui, péicha he’i pende Ruete: Peñemoĩve haguére cherehe ambue tetãnguéra oikóvagui pende jerekuévo, ha ndapeikói Che ha’e haguéicha ha ndapejapói avei che rembiapoukapy, peguata vaive uvei ambue tetãnguéragui,
8upévare, péicha he’i pende Ruete: Eikuaa porãke, Che avei añemoĩta penderehe, ha Che pohaviráta ambue tetãnguéra resa renondépe.
9Ha ajapóta penderehe araka’eve ndajapoiva’ekue, ha araka’eve ndajaposevéi, ko’ã mba’e ajapóta pende reko iñañagui.
10Upévare pende apytégui oĩta umi túva ho’útava ita’ýra ro’o, ha oĩta ta’yrakuéra ho’útava itúva ro’o; ha Che pohaviravéta amosarambipávo umi irundyve yvytúre umi hembýva gueteri pende apytégui.
11Upévare, che rekovére ame’ẽ che ñe’ẽ, he’i Yvága Atykuéra Jára, pende Ruete, añetehápe Che poipy’apýta peẽ pemongy’a haguére che rogaguasu, pemomba’eguasúvo ambue jarakuérape; upévare che resa napeneperdonamo’ãi, ha Che ndapoporiahuverekomo’ãvéima.
12Opaite kuimba’e mbohapyha ne retãyguakuéra apytégui omanóta mba’asy oñemosarambíva térã ñembyahýigui; ha meme kuimba’e mbohapyha pende apytégui ho’áta kyse puku rupi; ha umi hembýva amosarambíta opaite yvytu rehe, ha hapykuerikuéra aguenohẽta gueteri che kyse puku amuñave hag̃ua ichupekuéra.
13Añohẽta che pochy hi’arikuéra, amyengoviávo hembiapo vaikuéra añembopy’aguapy jevy peve; uperirémante oikuaáta hikuái Che Ijaraha ha añe’ẽ hague ñeko’õipópe, ambogue peve che pochy hesekuéra.
14Ha ajapóta ndehegui peteĩ tapere ha romotĩta ambue tetãnguéra renondépe oikóva guive nde jerekuévo ha ohasáva guive nde resa renondépe.
15Ág̃a, Che pombojovake jave che pochýpe peikóta ñemotĩme ha ñembohoryha ramo, jaheipópe ha poromondyiha ramo umi tetã pende jerekuévo oĩvape g̃uarã. Che, pende Ruete, añe’ẽmbava’ekue.
16Aity pendeári ñembyahýi, hu’y ivaietéva ha oporohundíva, ha amondo ñehundi ha ñembyahýi tuicháva pendeári, ha Che aipe’áta pende apytégui pene rembi’urã.
17Upéicha amondóta pendeári ñembyahýi ha mymba saite ñarõ penehundi hag̃ua; ha mba’asy oñemosarambíva ha tuguy añohẽtava pene mbytépe, ambou aja pendeári che kyse puku. Che, pende Ruete, añe’ẽmbáma.
Who We AreWhat We EelieveWhat We Do
2025 by iamachristian.org,Inc All rights reserved.
